1 Ndi iber yi na igyaŋ yi tuk glak bane zen nyɛ ba. Yesɔ ne zhi te mkpaŋ ne te ndi wa atei duŋ gɔnmimi kǝŋe te gar ben Tetɛɛ maa. Ne nyɛr aneshir amaa ŋgɔŋ ndi ne yi ne gɔŋmimi, ne nyɛr ba gar klɛtu.

2 Yesɔ ben abɛ zeu tsin ne zen li ikili yi amgbalu, shetan ne ka men shɔk Yahuda Iskariyɔti ne susun maa, izu Siman, te abɛ vuŋ Yesɔ alɛb. 3 Yesɔ ne zhi te Tetɛɛ maa ne ka men anugu mgbyamgbyaŋ ne atu yi kɔte ni, ne zhi te iwa are ben Arik iwa atei na kama kɔmɔ ben Arik; 4 ankyak Yesɔ alu ne amkpa ne li ikili mǝne, te tun anklu akɛ abɛm amaa, te baŋ nŋa anklu kɛ yis amashir akpa ne tiŋ maa. 5 Fe ashur amashir ne amkpadeb akǝ ŋla ki te aŋla abɛ zeu tsen aza, te zuk nŋa anklu kɛ yis amashir ndi ne kpa kɛ ne tiŋ te yis aza mǝne.

6 Ndi ne nyɛ ben Biturus, fe adiu, <<Ŋgɔŋ utei ŋlam azai?>>

7 Yesɔ adiu, <<Bau ne zhi iki yiŋ ndi mnai ba, ama utei zhi ne mkpaŋ watsɔb.>>

8 Biturus adi, <<Bau tei ŋlam aza ba.>>

Yesɔ adiu, <<Mba mte ŋlau aza ba, bau tei yi ne zǝm tsen ba.>>

9 Biturus adi, <<Ŋgɔŋ, kǝr ubǝ ŋla aza muŋ ankyak ba, ama ubǝ ŋlam ben aŋɔk amuŋ ben itu muŋ, biŋe!>>

10 Yesɔ adi, <<Iwaŋ ndi ne ka su ayi tsetser ba na wɔb te bɛ su ba atei ŋlau aza maa ankyak. Izhin yi tsetser, ama ba kɔte ŋɔwa ne miŋ min ba.>> 11 Yesɔ neka men azhi iwaŋ ndi atei vuŋu alɛb, waŋ ayi ki yiŋ ndi adi ba kɔte ŋɔwa ayi tsetser ba.

12 Ndi ne ka ŋla ba aza ma bɔbɔk, abaŋ anklu amaa akɛ bem asu te kama te zǝ sɔŋ ne amkpa ane sɔŋ amaa. Arib ba tedi, <<Izhin ne zhi iki yiŋ ndi mne na zhin ne yi?>> 13 <<Izhin zhɔm te ine Tsar, ben <Ŋgɔŋ,> iyi anenen amɛ, waŋai ir keŋ ndi m yime. 14 Azizaŋa ndi nga, myi ne Tsar amin bǝn Ŋgɔŋ amin, mne ŋla zhin aza, izhine ba min yi izhin bǝ ŋla akpa min aza. 15 Mne nka ntsar zhin iki yiŋ ndi izhin tei na ir keŋ ndi mne na zhin. 16 Mbla zhin lɛ didik, igen ba naŋ atukɔ amaa ba, ka iwaŋ ndi asharu anaŋ waŋ ndi ne asharu ma. 17 Neme ndi izhin ne zhi ikiki yiŋɛ, izhin tei ta anu didik ndi izhin te nai.

18 Yesɔ adi,<<Bam di izhineba bɔbɔk min ba; mne zhi abaŋ ndi mne hria ba. Ama iki yiŋ ndi ne cɛrǝ ibǝ shaga: <Iwaŋ ndi ta li ikili muŋ ai wa ate zor ben abɛm.>

19 Mbla zhin ilɛ kǝŋe te iki yiŋɛ ibǝ shi na, ndi ite na izhin tei tanyɛmɛ te Ayi nga myi Ayi nga. 20 Mbla zhin lɛ didik, iwaŋ ndi ate ta waŋ ndi mne sharu ne ta nga.>>

21 Ndi Yesɔ ne bla lɛ kǝŋe, ne wɔ lɛn susun te lɛ ndende te di, <<Mbla zhin lɛ didik, izhiin ne miŋ min atei vuŋ me alɛb.>>

22 Abɛ zeu tsin akɔ lɛ ne akpa men te di, tei ayi ŋɔwa ne miŋ mǝnei. 23 Izhin ne miŋ kɛ abɛ tsene maa ndi Yesɔ anyeru, akɔ sɔŋ anyaŋu. 24 Siman Biturus adi Yesɔ, <<Bla ta ulɛ ne atu ayi ŋɔwai?>>

25 Abɛ zǝ Yesɔ tsin ate gbahir ben abɔu te rib bu te di, <<Ŋgon, ayi ŋɔwai?>>

26 Yesɔ adi ba, <<Ai waŋ ndi M tei nǝgu mbwab borodi ndi mne baŋ kɛ ne agbǝgba.>> Fe akɔ su ŋɔk ne agbǝgba ma te baŋ mbwab borodi me, te nek Yahuda Iskariyɔti, izu Siman. 27 Ndi Yahuda ne ta borodi me shetan iyir susun maa.

Yesɔ adiu Yahuda, <<nama andanda tena iki yiŋ ndi utei nai!>> 28 Ama inuŋ ne miŋ kɛ li iklime bane zhi iki yiŋ ndi Yesɔ ne di Yahuda ilɛ kǝŋe ba. 29 Ndi Yahuda iwa ayi ne Gli mgbɔ iyi shur azɔbɔ, abɛ zeu tsin anuŋ ayik tedi Yesɔ adiu abe te alɛb iki yiŋ ndi atei na igyaŋa neyi, kɔ abɛ nek abɛ iyah iki nuŋ. 30 Ndi Yahuda ne ta borodi me, aru abɛm. Ibu ne ka te ne kpaŋa.

31 Ndi Yahuda ne kama tibɛ, Yesɔ adi, <<Azizaŋa ne nek Izu neshir ngɔŋ maa; nena nek Arik Ŋgon ne atu maa. 32 Atei nek Arik ngɔŋ ne atu yi Izu maa, Arik wa ne tu maa atei duŋ anǝk Izu Neshir ŋgɔŋ maa, atei na amɛ mkpaŋ zhiin.

33 Amumun amuŋ ndi m nyɛr ba, M tei yi ben abɛ zhin ne mkpaŋ watsɔb. Izhin tei wɔb me, ir keŋ ndi mne bla Yahudawa, mna bla zhin amɛ: Amkpa awaŋ ndi mgaru ba zhin tei garu yir ba.

34 Me nek ilɛ yayas: Izhin bǝ nyɛr akpa min. Ir keŋ ndi mne nyɛr zhin, neme izhin bǝ nak nyɛr akpa min. 35 Izhin te nyer akpa, neme aneshir bɔbɔk atei zhi te izhin yi abɛ tsene amuŋ.

36 Biturus aribu te di, <<Ŋgon, ugar amei?>>

Yesɔ adiu, <<Amkpa awaŋ ndi mgaru, bau tei zǝm yir azizaŋa ba, ama uka zǝm ne mkpaŋ kɛ nyɛ ne ti.>>

37 Biturus adi, <<Ŋgɔŋ, ayi nii duŋ bam tei zeu yir azizaŋa kai? M tei nek tu muŋ tem ku ne atu min te izhin bǝ yik ivli.>>

38 Ankyak Yesɔ adi, <<Une nek tu mi te bǝ ku ne atu amuŋ? Mblau lɛ didik, utei kyak zhim amkpaŋ atar agbak ateishe tuk!