1 Ndi Yesɔ ne tsǝtsen kiki maa, ne yik ner nuŋ waŋ ndi ne ŋliu amfik. 2 Abɛ tsene maa aribu te di, <<Ne tsar, ai zumimin yi ŋɔwa ne duŋ ner waŋa ne yi amfik? ai wa ka ayi abɛ ŋliu maa ini?>>

3 Yesɔ adi ba, iku amfik maa bai zumimin maa kɔ tetɛɛ maa kɔ iyah maa ba. Ayi amfik te Arik abɛ tsar mgbyamgbyaŋ maa ne tu maa. 4 Ta bǝ na ndum kɛ iwaŋ ndi ne shar me ndi arik anak ri laŋ, ibu tei te ndi ba nuŋ atei ya na ndum ba. 5 Ndi me nak ri yi ne gɔnmimi, me yi lu kɛ laŋ ne gɔnmimi.>>

6 Nǝ bla yiŋɛ, Yesɔ ne ruk ante shur ne mimi, te cɔk mimi ne ante maa te kin ne ayi ner ne amfik ge 7 te diu, <<kɔte ŋla ti mi ne nkam amashir ne silɔm.>> (ndi ai <<ne shar.>>) ankyak nɛrɛ agar te kɔte ŋla ti maa te kam aŋyak ne bu ayi.

8 Abɛ sɔŋ yaŋu, ben abaŋ ndi ne bene ayigu azǝn ben arib te di, ba waŋa aneshir waŋ ndi akɔsɔŋ te ben kai?>>

9 Anuŋ adi, <<Ai wa,>> ama anuŋ adi, <<Ba ai wa ba; ne nak ruu.>>

Ankyak iner ndi ne ben yi amfik adi ba, <<Ai nga Me yi wa.>>

10 Aribu te di, <<Tǝ u na kikin te yik amkpa azizaŋai?>>

11 Atanyeme te di, <<Iner waŋ ndi azhɔu te Yesɔ ne cɔk mimi ne ante maa te kin me ne yi, te di me kɔte ŋla ti muŋ ne nkam amashir ane silɔm, ankyak me kɔte ŋla ti muŋ, fe ayi amuŋ akɔ bu ankyak mku yik amkpa.>>

12 Arib te di, <<Tǝ ayi ne mei?>>

Adi, <<Bam ne zhi ba.>>

13 Ankyak aneshire ne Gli iner waŋ ndi ne yi amfik ge te gar ben Ferisawa. 14 Ibɛr yiŋ ndi Yesɔ ne cɔk ante ne mimi te kin ner ne amfik ge te duŋu areme ai ibɛr yi sɔŋ sik. 15 Neme Ferisawa ne na rib bu ir keŋ ndi ayi amaa ne bumɔ. Adi ba, <<Ne kin me mimi ne ayi amuŋ, ankyak mne ŋlai fe mku yik amkpa.>>

16 Anuŋ ne miŋ kɛ Ferisawa ma adi, <<Iner waŋ ndi ne na iki yiŋɛ batei rɛ bǝn Arik ba, te ba ze ibɛr yi sɔŋ sik ba.>>

17 Fe Ferisawa ma ana rib bu te di, <<Udi iner waŋa ne bu ayi ami, utei di anii ne atu maa?>>

Iner waŋ ndi ne yi amfik ge adi ba, <<Ai ine bla shar yi Arik.>>

18 Yahudawa ba ne tanyɛmɛ te iner waŋa ne men ayi ne amfik te ayik azizaŋa ba, se ndi ne zhɔ abɛ ŋliu ma ne liŋ 19 te rib ba te di, iner waŋa ayi vǝvǝn min yi? Izhin di ne ŋliu amfik; te ana kikin te ayik azizaŋa?>>

20 Tetɛɛ maa ben iyah amaa adi, <<Ta ne zhi te ayi vǝvǝn mɔr, te na zhi te na ŋliu ne amfik. 21 Ama ba ta ne zhi ir keŋ ndi ne na te ayik azizaŋa ba, ba ta ne zhi iwaŋ ndi ne duŋu ayik amkpa ba. Tɔ zhin waŋ te ribbu, ai ne mla ne lɛ ne tu maa!>> 22 Abɛ ŋliu ma adi amɛ te aklu sisik Yahudawa, te Yahudawa ne men akpa aŋyak te di iwaŋ ndi ate tanyɛme te di Yesɔ neyi Kristi atei tunu agli arumɔ ne Akabaŋkɔŋ. 23 Waŋa ayi iki yiŋ ndi abɛ ŋliu ne di, <<Nǝ mla ne lɛ; abɛ rib bu!>>

24 Mkpaŋ kɛ yaa atara zhɔ iner waŋ ndi ne yi amfik ge, te diu, <<Bǝ tanyɛmɛ bǝn Arik utei bla ta lɛ didik! Ta ne zhi te iner waŋa ayi ne na zumimin.>>

25 Adi ba, <<Ka iner waŋa ayi ne na zumimin ka ba yi ne na zumimin ba, bam ne zhi ba. Mne yi amfik, ama azizaŋa myik amkpa.>>

26 Aribu te di, <<Ne anau anii? Nǝ ana kikin te bu ayi amie?>>

27 Adi ba, <<Mneka men bla zhin ba zhin ne wɔ ba. Izhin na wɔb te izhin bǝ wɔ anii? Izhin wɔb te izhin bǝ zeu min yi?>>

28 Ankyak angɔŋgɔŋ abɛ Yahudawa ma akɔ yenu tuk te di, <<Uwa uyi ne zeu; ama taba yi abɛ Musa. 29 Tane zhi te Arik ne lɛ ben Musa, ama tei ner waŋa, ba ta ne zhi amkpa awaŋ ndi areme ba!>>

30 Inere adi, <<Waŋa ayi ki yi vuŋ anu! Ba zhin ne zhi amkpa waŋ ndi areme ba, ama ne bu ayi amuŋ. 31 Ta ne zhi te Arik ba wɔ abɛ na zumimin ba; awɔ aner abaŋ ndi anegu ngɔŋ te na iki yiŋ ndi awɔb te abɛ nai. 32 Ne kuti yi gɔnmimi ba nuŋ ne azen awɔ te iner nuŋ abu abɛ amfik ayi ba. 33 Abɛ di ner waŋa ba rɛ ben Arik ba, bai abɛ na ikinuŋ amɛ ba.

34 Nǝ yiŋɛ aneshire adi, <<Ne ŋliu ne zumimin nena te ngɔŋ ne zumimin; fe utak wɔb te ubǝ tsar tei!>> Akyak akɔ yaru agli aru ne Akabaŋkɔŋ ŋɔ.

35 Ndi Yesɔ ne wɔ ne Gli ner waŋa agli aru ne Akabakɔŋ ŋɔ, awɔb neshire te rib bu te di, <<Une tanyɛmɛ bǝn Izu Neshir yi?>>

36 Inere adi, <<Blam ayi ŋɔwa ayi Izu Neshire, Ngɔŋ, te duŋ me tanyɛmɛ bǝn abɔu!>>

37 Yesɔ adiu, <<Une ka yigu; ai wa aklɛ lɛ ben abɔu azizaŋa.>>

38 Ankyak inere adi, Ngɔŋ, mne tanyɛmɛ,>> Fe akɔ tar agbarum ne ti kɛ Yesɔ te zǝ kuu.

39 Yesɔ adi, <<Mne nyɛ gɔnmimi kǝŋe te mte ambuk, te abɛ amfik abɛ yik amkpa abaŋ ndi ayik abɛ yi amfik.>>

40 Ferisawa anuŋ ndi ne yi bǝn abɔu ne wɔu abla lɛ kǝŋe te rib bu te di, <<Fe udi ta yi amfik, mɔryii?>>

41 Yesɔ adi ba, <<Abɛ di izhin ne yi amfik, ba zhin bǝ yi abɛ na zumimin ba; ama izhin di izhin yik, izhin yi abɛ na zumimin.>>