1 Ne bar nuŋ, Yesɔ ne gar igyaŋ yi Yahudawa ne Urshelima. 2 Nǝ Urshelima nkam yi gbahir ne Ankɔŋ ne Awanta, ne aŋa yi Yahudawa azho kɛ te Betasda ne na abur amɛ tuŋ ndi ne kpaŋa ne gɔŋ nkama ari. 3 Abɛ lɔ tetɛk akɔkur ne aki mɛ, abɛ amfik, abɛ kpuk, ben abɛ ku gar zhin. 4 Amkpa mkpaŋ ne shar ayou Arik anyɛ te ruk amashir ane kama. Atei na amɛ abɛ lɔmɔ awɔb te aba bǝ tuk yir kama. Iwaŋ ndi wa te kuti yir amashire ate rɛ, kɔte yi ne ir lɔ tayi. 5 Iner nuŋ ndi akɔkur amɔ ilɔ ne vuŋu ase sɔk tar ane tender. 6 Ndi Yesɔ ne yigu akɔkur amɔ te zhi te iner waŋ ilɔ ne men vuŋu rɛ kukub, Yesɔ arib nɛrɛ te di, <<Uwɔb te ubǝ rei?>>

7 Ine lɔmɔ atanyɛmɛ tedi, <<Ŋgɔŋ,>> <<Bam yi ne ner nuŋ ndi atei lɔk mǝ ma te baŋ me azhɔk ne nkam amashir ndi ineshar Arik ate ruk nkama. Mte wɔb te bǝ yir amashire, inuŋ ana kumti.>>

8 Ankyak Yesɔ adiu, <<Lu kli! Baŋ atakpa ami te kɔmɔ.>> 9 Inere akɔ rɛ ne amkpamkpama; abaŋ atakpa amaa te kɔmɔ.

Ibar yiŋ ndi iki yiŋɛ ne na ai bɛr yi sɔŋ sik yi Yahudawa, 10 neme Yahudawa adi neshir waŋ ndi Yesɔ ne duŋu arɛ mɛ, <<waŋa ai bɛr yi sɔŋ sik; ilɛ kɛ kpa nyak mɔr ne yaru bǝ baŋ atakpa mi te kɔmɔ.>>

11 Ama iner ne lɔme adi ba, <<Iner waŋ ndi ne duŋ me rɛmɛ ai wa ne dim, <Baŋ atakpa mi te kɔmɔ.>>>

12 Ankyak aribu te di, <<Ai ŋɔwa ne diu ubǝ baŋ agurhwa ami te kɔmɔ?>>

13 Iner waŋ ndi ne rɛ me ba ne zhi ka ai ŋɔwa ne duŋ wa are ba, te Yesɔ ne ka yir miŋ ntsan aneshir ndi ayi amɔ.

14 Nǝ mkpaŋ nuŋ Yesɔ ne yigu ne Akabakɔŋ te diu, <<Uyik, une ka rɛ. Duŋ na zumimin te ikinuŋ mimin ilu vuŋu.>> 15 Inere akɔte bla Yahudawa te di ai Yesɔ wa ne duŋ wa are.

16 Fe ndi Yesɔ ne zen duŋ aneshir are ne bɛr yi sɔŋ sik yi Yahudawa, Yahudawa ne sagu iyah. 17 Yesɔ ne di ba, <<Tetɛɛ amuŋ ana ndum kɔte bar tayi, Nga, muŋ yi, M tei na ndum.>> 18 Neme Yahudawa ne wɔb ankɔŋ ane ŋun Yesɔ; ba yaŋ zǝ bɛr yi sɔŋ sik ankyak ba, ama azho Arik te Tetɛɛ amaa, te tsar itu maa anenen ben Arik.

19 Yesɔ ne bla ba te di: <<Mbla zhin lɛ didik, ivǝn ba na iki nuŋ kiki maa ba; anak ana iki yiŋ ndi ne yik Tetɛɛ maa anai, te iki yiŋ ndi Tetɛɛ te nai ai yi Izu maa anai. 20 Itetɛɛ anyer Izu maa te tsa ru bɔbɔk iki yiŋ ndi anai. Amɛ, ne sak aŋɔk ne anu min atei tsa ru ikiki gɔngɔŋ anaŋ yiŋɛ. 21 Ir keŋ ndi Tetɛɛ alɛk abɛ ku alumɔ te nek ba ivli, neme Izu maa atei nek waŋ ndi asigu susun ivli. 22 Neme, Tetɛɛ ba ne te nuŋ ambuk ba, ama ne nek izu maa mgbyamgbyaŋ kɛ te aneshir bɔbɔk ambuk, 23 te aneshir bɔbɔk abɛ nek zu maa ŋgɔŋ ndi anǝk Tetɛɛ me. Iwaŋ ndi ba te nek Izumɔ ngɔŋ ba ba nek Tetɛɛ me ŋgɔŋ ba, waŋ ndi ne sharu.

24 Mbla zhin lɛ didik, iwaŋ ndi ate wɔ lɛ muŋ te tanyɛmɛ bǝn waŋ ndi ne shar me ayi ne ivli kɛ yaŋ klɛtu Arik batei teu ambuk ba; ne glɔ iku te yik ivli. 25 Mbla zhin lɛ didik, mkpaŋ te nyɛ ne ka nyɛ ma ndi abaŋ ndi ne ku atei wɔ kɔr kɛ Izu Arik abaŋ ndi ate wɔ te tanyɛmɛ ne kǝ atei yi atsitsir. 26 Ir keŋ ndi Tetɛɛ ayi ne vli ne tu maa, amɛ ne nek izu maa mgbyamgbyaŋ abɛ yi ne tu maa. 27 Nena nǝgu mgbyamgbyaŋ kɛ te ambuk te iwa ayi Izu Neshir.

28 <<Kǝr zhin bǝ sak aŋɔk ne anu ne ikiki yiŋɛ ba, te mkpaŋ sɔŋ nyɛ ndi bɔbɔk abaŋ ndi ayi ne miŋ abɛ men atei wɔ kɔr maa 29 te ru abɛm, abaŋ ndi ne na iki didik atei lu te vli, abaŋ ndi ne na zumimin atei te ba ambuk te shur ba ne lu. 30 Nga kiki muŋ bam M tei na ikinuŋ kiki muŋ ba; mte ambuk ir keŋ ndi mwɔ, mte ambuk tetɛɛ didik, bam wɔb te bǝ na itu muŋ didik ba ama mbǝ na iwaŋ ndi ne shar me.

31 <<Ate yi ndi M tei bla kinuŋ ne atu muŋ, ilɛ kɛ bla muŋ bai zub ba ayi kisha. 32 Ama inuŋ ayime ndi abla ikinuŋ ne atu muŋ, mne zhi te abla zub ne atu muŋ.

33 Izhin ne shar ben Yɔɔna ne bla zhin lɛ didik. 34 Bam ta bla ikinuŋ bǝn neshir ba; ama mne bla amɛ te izhin yik ita zhɔk. 35 Yɔɔna ne yi ilu ndi ilaŋ te nek laŋ amkpa, izhin ne tanyɛmɛ ne mkpaŋ watsɔb te wɔ men kɛ laŋ amkpama.

36 <<Me yi ne iki yi bla ne atu muŋ naŋ yi Yɔɔna. Te ndum keŋ ndi Tetɛɛ ne nǝm ne kɛ te bǝ klɛ kɛ, ai kɛ mna kɛ, itsar te ai Tetɛɛ wa ne shar me. 37 Tetɛɛ waŋ ndi ne shar me ne bla lɛ ne atu muŋ. Ba zhin ne yigu ba ba zhin ne wɔ kɔr maa ba, 38 ilɛ maa ba ne zisɔŋ ne susun amin ba, te ba zhin ne tanyɛmɛ bǝn waŋ ndi ne sharu ba. 39 Izhin nak tɔ icɛr ilɛ kɛ Arik ngɔŋ te yik te di ai yi te nek zhin ivli kɛ yaŋ klɛtu. Waŋ ayi cɛr yiŋ ndi bla lɛ muŋ, 40 neme izhin ne kyak nyɛ ben abɛm te ta ivli.

41 <<Bam nǝ ta gbar asak ben aneshir ba, 42 ama mne zhi zhin. Mne zhi te ba zhin ne tanyɛmɛ bǝn Arik ne susun min ba. 43 Mne nyɛ ne sak kɛ Tetɛɛ muŋ, ba zhin ne tam ba; ama inuŋ ate nyɛ ne sak maa, izhin tei tau. 44 Izhin te na kikin te tanyɛmɛ te yi ndi izhin ta gbar asak ben akpa, te izhin kyak wɔb gbar asak ndi ire ben Arik?

45 <<Ama kǝr zhin bǝ yik te di M tei gli zhin te gar ambuk bǝn Tetɛɛ. Ai Musa wa atei gli zhin te gar ambuk, uwaŋ ndi izhin shur ayi bǝn abɔu. 46 Izhin te tanyɛme ben Musa, izhin tei tanyɛmɛ bǝn abɛm. 47 Ama ba izhin ne tanyɛmɛ ne cɛr maa ba, izhin tei na kikin te tanyɛmɛ bǝn ilɛ kǝ bla muŋǝ?>>