1 Ndi Yesɔ ne klɛ ben maa, iwa ben abɛ zeu na ndum amaa aglɔ agar ndɔ kɛ Kidro. Nǝ gar kɛ yaa ma lɛmbu ayime, fe uwa ben abɛ zeu na ndum amaa ne gar miŋe.

2 Fena, Yahuda ine baŋu lɛbɛ, ne zhi amkpa ane biŋ amene, te amɔ wa Yesɔ ben abɛ zeu na ndum amaa amkpaŋ tetɛk aben abiŋ amɔ. Neme Yahuda ne gar lɛmbumɔ, 3 Fe Yahuda ne nyɛ lɛmbumɔ, te gli aner abɛ kpaakpa tetɛk bǝn abɛ ŋub akabakɔŋ ndi ngɔŋ ine na ndum kǝ Arik bǝn Ferisawa; te gli ilu kɛ laŋ bǝn toci kɛ laŋ ngɔŋ, bǝn ikiki yi tyak kum.

4 Yesɔ ne zhi bɔbɔk iki yiŋ ndi itei teu, fǝ akɔ sɛr akɔmɔ ne ti kɛ aneshire te rib ba, <<Ayi ŋɔwa izhin wɔb bu?>>

5 <<Yesɔ awɔnǝ Nazara,>> asagu ma.

<<Ayi Nga wa,>> Yesɔ adi. (Fena Yahuda ne baŋu lɛbɛ aklɛkli ne miŋ mǝne.) 6 Ndi Yesɔ ne di, <<Ayi Nga wa,>> akama ru gɔgɔŋ te azhaku ne mimi.

7 Atara rib ba, <<Ayi ŋɔwa izhin wɔb bu?>>

Akɔ diu, <<Yesɔ awɔnǝ Nazara.>>

8 <<Mne men blaa zhin te ayi Nga,>> Yesɔ asaga. <<Ate yi ndi izhin wɔb me, fena duŋ zhin aner abaŋa akɔmɔ.>> 9 Iki yiŋɛ neyi amɛ teduŋ lǝlɛ yi bla maa bǝ shaga: <<Ba Mne nduŋ izhiin ne miŋ kɛ abaŋ ndi une nǝm ma adɔ ba.>>

10 Fena Siman Biturus, ne gli anzigba, atunkɛ ne yene te tsɔm mgbatɔŋ kɛ ŋɔk li ikɛ igen ayou ner ngɔŋ ine na ndum kǝ Arik akyaŋ. (Isak kɛ gene azhɔu kɛ te Malkus)

11 Yesɔ adi Biturus, <<Su anzime ne yene! Bam so ne kuca kɛ yik iyah keŋ ndi Tetɛɛ ne nǝm ne kǝ kai?>>

12 Ankyak abɛ kpaakpa Romawa tetɛk bǝn ngɔŋ amene ben aner angɔŋgɔŋ aben Yahudawa avuŋ Yesɔ, te kpau 13 tena kuti agliu te gar bǝn Hanana, iwaŋ ndi ayi iyi maa Kayafa, ngɔŋ ne te ambuk ne se mɛ. 14 Ayi Kayafa waŋ ndi ane nek angɔŋgɔŋ ane Yahudawa lɛ tedi ne rɛ te iner zhiin abɛ ku netu aner bɔbɔk.

15 Siman Biturus bǝn izhiin ne miŋ kɛ abɛ zeu tsǝn amaa atsǝn azǝ Yesɔ. Izhiin yuŋɔ ngɔŋ ne te ambuk ne zhiu ngɔŋ, fe ne zǝ Yesɔ akɔmɔ ne kɔb ngɔŋ ne te ambuk. 16 Ama Biturus ne akam aklɛ ne anɔkɔŋ ake abɛm. Ine yaa ne miŋ abɛ tsene maa waŋ ndi ngɔŋ ne te ambuk ne zhiu, akama ru, te alɛ ben Vǝnwa waŋ ndi wa ayi ne ndum ne bǝn teduŋ Biturus agar ayir miŋ.

17 Vǝnwama ndi akǝkle ne anɔkɔŋ adi Biturus, <<Ndi uyi ne miŋ kɛ abaŋ ndi atsǝn bǝn neshir waŋa kai?>>

Biturus adiu, <<Ɔɔ, bai nga ba.>>

18 Neyi mkpaŋ kɛ mvlu, ndi amɛ agene bǝn abɛ ŋubɔ ne mɔk lu te azǝn vli. Biturus akɛ kli bene ba, azǝn vli lumɔ maa yi.

19 Ndi amɛ ngɔŋ ine na ndum kǝ Arik arib Yesɔ ne atu abɛ tsene maa bǝn tsar maa.

20 Yesɔ adiu, <<Ilɛ muŋ bane yi kuŋkum ba kɔte ŋɔ ne wɔkɛne gɔnmimi.>> <<kɔte mkpaŋ takɛ Mtsar ne akabakɔŋ, amkpa awaŋ ndi Yahudawa abiŋe. Bam ne Mbla kinuŋ yi suyir ba. 21 Tǝ urib me neni? Rib abaŋ ndi ne wɔm. M ne zhi te ne zhi kiyi bla muŋɔ.>>

22 Ndi Yesɔ ne bla amɛ, ngɔŋ nuŋ ne miŋ kɛ angɔngɔŋɔ akɛ kli gbahir te asagu laŋɔk nenu ti. <<Waŋa ir keŋ ndi utei sak ngɔŋ ne te ambuk goi?>>

23 Yesɔ adiu, <<atei ndi Mne mbla kinuŋ mimin,>> <<Bla kɔte ŋɔwa abɛ wɔ ilɛ mimin kɛ di muŋɔ. Ama ate yi ndi Mǝ mbla lɛ didik, te uŋur me nenii?>>

24 Fe Hanana asharu, tena shuru atabɛrbɛr ne aza, te duŋ abaŋu tǝ gar kɔb Kayafa ngɔŋ ne te ambuk.

25 Ndi Siman Biturus azǝn vlilu maayi, ne rib bu, <<Ndika u na yi zhiin ne miŋ kɛ abɛ tsene maa?>>

Ama Biturus a tun tedi, <<Ɔɔ bam yi ndɔmɔ ba.>>

26 Izhiin ne miŋ kɛ agen abɛ ngɔŋ ne te ambuk go, ayi nga ŋli kɛ waŋ ndi Biturus ane tsɔm mgbatɔŋɔ, awɔbu nǝ lɛ, <<Dikam Mne yigu bene bɔu ne ahwaŋ lɛmbu?>> 27 Neme Biturus atun, fe ne amkpamkpama agbak akɔ tuk.

28 Nǝ gab ye amblimblɛ Yahudawa agli Yesɔ arumɔ bǝn Kayafa te gar ben ŋgɔŋ ine Romawa. Ndi bɛr neka ŋen klɛ, te kǝr abɛ na igyaŋ ne yaŋ yi tsetser ba Yahudawa ba ne yir iki kɛ te ambuk ba; ne wɔb te aba abɛ yi tsetser ne igyaŋ yi tuk glak. 29 Fe Bilatus Itum aru abɛm te rib te di, <<Izhin di nena anii?>>

30 Adi, <<Abɛ di bane lalɛ ba, ba ta bǝ gliu te nyɛ ben abɔu ba.>>

31 Itum adi, <<Vuŋ zhin ne wu ne tu min te te zhin ambuk kiki min.>>

Yahudawa adi,<<Ama ba ta yi ne mgbyamgbyaŋ kɛ ŋun nuŋ ba.>> 32 Iki yiŋɛ ne na te lɛ keŋ ndi Yesɔ ne bla kɛ ir keŋ ndi iku maa itei yime.

33 Itum Bilatus akama kɔmɔ ne amkpa ne te ambuk, te zhɔ Yesɔ te rib bu te di, <<Uyi itum ne Yahudawai?>>

34 Yesɔ adi, <<Ilɛ kɛ rib kǝŋe ire ben abɔu ka aneshir anuŋ ne blau?>>

35 Itum Bilatus asaga te di, <<Uyik te di myi awɔ ne Yahudawai? Ai aneshire ami bǝn ngɔŋ ine na ndum kǝ Arik aba ne gliu anyɛ bǝn abɛm. Une na anii?>>

36 Yesɔ adi, <<Ngɔŋ muŋ bai kɛ gɔnmimi ba. Abɛ di iyi kɛ gɔnmimi, agɛn amuŋ abɛ tsik mgbu te atam azhɔk ne aŋɔk ayi Yahudawa. Ama ngɔŋ muŋ ire amkpanuŋ.>>

37 Itum adi, <<Uyi Itum, fena!>> Yesɔ adi, <<Une bla anenen te di Me yi Itum. Le didik, waŋa ai iki yiŋ ndi ne ŋlim, ne me mne nyɛ gɔnmimi, tem mbla zub. Iwaŋ ndi ayi ne na izub awɔm.

38 Itum Bilatus arib, <<Anii yi izub o?>> Neme nena ru gar ben Yahudawa te di ba, <<Bam ne yik ner waŋa ne la lɛ nuŋ ba. 39 Ama ai iki na min te abɛ zhɔk zhin izhiin ne miŋ kɛ abaŋ ndi ne ku ba ne jaru kɔte bɛr yi igyaŋ yi tuk glak. <<Izhin wɔb te bǝ zhɔk zhin <Itum ne Yahudawai>?>>

40 Aneshir anuŋ adi, <<ɔɔ, bai wa ba! Nǝk ta Barnaba!>> Ankyak Barnaba ayi ner ne zhib.