1 Ndi yiŋ ne gayir, Yesɔ ne tsin agɔŋ ari ntun yi Galili, ne kyak gar Yahudiya te Yahudawa awɔbu ne ŋunu. 2 Ama ndi igyaŋ ye bur yi Yahudawa ne te gbahir. 3 Amunzumen ne Yesɔ adiu, <<Duŋ yaŋa te gar Yahudiya, te abɛ zeu tsin abɛ yik iki yi vuŋ anu ndi unai. 4 Iwaŋ ndi awɔb te aneshir abɛ zhiu ba na kiki asuyir ba. Ndi u na kiki yiŋɛ, tsar gɔnmimi itu mi.>> 5 Te ire kukub amunzumene ba ne tanyɛmɛ ben abɔu ba.

6 Neme Yesɔ ne bla ba te di, <<Mkpaŋ muŋ ba ne zen nyɛ ba; ama izhineba kɔte kpaŋ takɛ yi anenen bene bɛ zhin. 7 Igɔnmimi ba te kyak zhin ba, ama ne kyak me tem bla ba te di iki yi na men yi mimin. 8 Izhineba bǝ tsen gar zhin igyaŋa. Nga bam gar igyaŋa azizaŋa ba, te mkpaŋ muŋ bane zen nyɛ ba.>> 9 Ndi ne bla ba amɛ ne sɔŋ ne Galili.

10 Neme, ndi amunzumen ne Yesɔ ne kɔmɔ ne igyaŋa, Yesɔ ne gar mayi, ba ne zhi ner nuŋ ba. 11 Ne amkpa ne igyaŋa Yahudawa ne zen wɔb bu te rib te di, <<Ayi ne me?>>

12 Ne miŋ ntsan aneshir ne amkpa ne igyaŋa ne zen lɛ raraŋ ne atu ye Yesɔ. Anuŋ adi, <<Ai neshir didik.>>

Anuŋ adi, <<ba yi amɛ ba, alɔm aneshir.>> 13 Ama ba nuŋ ne ru aklɛ te lɛ ndende ba te ate sisik Yahudawa.

14 Ndi igyaŋa ne gab atsutsu Yesɔ ne lu kli ne miŋ Akabakɔŋ te zen tsar. 15 Yahudawa ne vuŋ anu te rib te di, <<Iner waŋa ne na kikin te zhi iki ngɔŋ amɛ te ba ne gar aki aye tsar ka?>>

16 Yesɔ adi ba, <<Itsar muŋ ba yi muŋ ba. Ire ben Arik waŋ ndi ne shar me. 17 Iwaŋ ndi te na iki yiŋ ndi Arik awɔb yi, atei zhi te itsar muŋ ire ben Arik ka me lǝlɛ kɛ tu muŋ. 18 Abaŋ ndi alɛ ne atu maa awɔb te bǝ nǝgu ngɔŋ, ama iwaŋ ndi ana ndum kɛ waŋ ndi ne sharu abɛ nǝgu ngɔŋ ai ner didik; ba timu ba. 19 Ba Musa ne cɛr zhin ilɛ keŋ ndi Arik ne nǝgu ka? Neme ba nuŋ ne miŋ min ndi ne zǝ kɛ. Ai yi duŋ zhin wɔb ŋun me?>>

20 Ntsan aneshire adiu, <<Uyi ne anerim,>> <<Iŋɔwa awɔb ŋunu?>>

21 Yesɔ adi ba, <<Mna iki zhiin yi vuŋ anu ankyak, fe bɔbɔk mine sak aŋɔk ne anu. 22 Neme, te Musa ne duŋ zhin kɔkzik amumun (ba ne rɛ ben Musa ba, ne rɛ ben atsintsim amin), izhin kɔk vǝvǝn lum zǝk ne bɛr yi sɔŋ sik. 23 Neme ate yi ndi atei kɔk vǝvǝn lum zik ne bɛr yi sɔŋ sik te bǝ zǝ cɛr yi Musa, te anii ne duŋ izhin tǝ mfu ben abɛm ndi mne duŋ neshir are bɔbɔk ne bar sɔŋ sik? 24 Izhin bǝ duŋ te neshir ambuk ne yik ayi ankyak, te te zhin ambuk anenen.>>

25 Ne mkpaŋa aneshir anuŋ ne Urshelima arib te di, <<Ba waŋa ai neshir ndi azǝn wɔb te bǝ tsǝgu aŋun ka? 26 Tɔ waŋ me, azǝn lɛ ndende, ama ba ne diu ikinuŋ ba. Ka angɔŋgɔŋ ne ka tanyɛmɛ te iwa ayi Kristi me didik ni? 27 Ta ne zhi amkpa waŋ ndi ner waŋa areme; ama Yesɔ atei nyɛ ba nuŋ atei zhi amkpa waŋ ndi areme ba.>>

28 Fe ndi Yesɔ, ne nak azǝn tsar ne Akabakɔŋ, ankyak alǝk kɔr tedi, <<Iyi amɛ, izhin ne zhim, izhin ne na zhi amkpa waŋ ndi mreme. Bam ne nyɛ yaŋa ne tu muŋ ba, ama waŋ ndi ne shar me ai nǝ bla lɛ didik. Ba zhin ne zhiu ba, 29 ama nga mne zhiu te mrɛ bǝn abɔu ai wa ne shar me.>>

30 Neme ne wɔb te aba abɛ vuŋu, ama inuŋ bane ne cogu ŋɔk ba, te mkpaŋ maa ba ne zen te ba. 31 Neme, aneshir tetɛk ne miŋ kɛ tsǝn aneshir ne tanyɛmɛ bǝn Yesɔ. Adi, <<Kristi me ate nyɛ, atei na iki vuŋ anu anaŋ iner waŋai?>>

32 Ferisawa ne wɔ ntsan aneshir zen lǝlɛ raraŋ ne tu kɛ Yesɔ. Ankyak ngɔŋ ine na ndum kǝ Arik bǝn Ferisawa ashar abɛ blɛ Akabakɔŋ abɛ kɔte vuŋu.

33 Yesɔ adi, <<Myi ben abɛ zhin ne mkpaŋ watsɔb, ankyak M tei kam kɔmɔ ben waŋ ndi ne shar me. 34 Izhin tei wɔb me, ama ba zhin tei yik me ba; amkpa waŋ ndi mgara, ba zhin tei ya nyɛmɛ ba.>>

35 Yahudawa adi akpa men, <<Iner waŋa atei kɔmɔ ne amɛ te di ta te wɔb wa lakɛne? Atei gar amkpa waŋ ndi aneshir amɔr ne gar ne miŋ kɛ abaŋ ndi bai ŋli kɛ Yahudawa ba, te tsar abaŋ ndi bai Yahudawa ba? 36 Iner waŋ adi anii ndi adi, <Izhin te wɔb me, ama ba zhin te yik me ba,>bǝn <amkpa awaŋ ndi m yime, ba zhin te ya nyɛ ba>?>>

37 Ne bɛr klɛ ben iber ngɔŋ yi igyaŋa, Yesɔ ne lu kli te lɛ ne kɔr ngɔŋ, iwaŋ ndi ihre te vuŋu, abɛ nyɛ ben abɛm te so. 38 Iwaŋ ndi ate tanyɛmɛ bǝn abɛm, ndi ne cɛr, angyak atuk amashir ane nek vli atei gbub ne miŋ maa.>>> 39 Yesɔ ne bla yiŋɛ ne lɛ kɛ Izhu tsetser, abaŋ ndi ne tanyɛmɛ bǝn abɔu atei ta. Ne mkpaŋ yuŋɔ bane zen anek ba Izhu tsetser ba, te bane zen lek Yesɔ te negu ngɔŋ maa ba.

40 Ndi ne wɔ lɛ maa, aneshir anuŋ adi, Le didik iner waŋa ai ine bla shar yi Arik.>>

41 Anuŋ adi, <<Ai Kristi.>>

Ama anuŋ ne rib te di, Kristi bate rurɛ Galili ba 42 Ne cɛr te di Kristi atei rɛ nga ŋli kɛ Doda ne Batalami, ntun yiŋ ndi Doda ayimei?>> 43 Fe ntsan aneshir ne ŋar akpa ne atu ye Yesɔ. 44 Anuŋ wɔb te aba bǝ vuŋu ama ba nuŋ ne cogu ŋɔk ba.

45 Ankyak abɛ blɛ Akabakɔŋ akama gar bǝn ngɔŋ ine na ndum kǝ Arik ben Ferisawa, arib ba te di, ayi nii duŋ zhin gliu te nyɛ ayaŋa?>>

46 Abɛ blɛ Akabaŋkɔŋ ŋɔ adi, <<inuŋ bane zǝn lɛ ndi iner waŋa ba.>>

47 Ferisawa adi abɛ blɛm te di, <<izhin di ne cɔk zhin iminyi?>> 48 <<kɔ inuŋ ne miŋ kɛ angɔŋgɔŋ bǝn Ferisawa ne tanyɛmɛ bǝn abɔu? 49 Ba yeme ba, Ama ibiŋ aneshir ndi ba ne zhi iki nuŋ ne cɛr yi Musa ba, Arik atei ti zhin ambuk.>>

50 Nikɔdimu, waŋ ndi ne gar ben Yesɔ kukub ndi ne na yi ne miŋ men, arib, 51 <<Ilɛ kɛ cɛr yi Musa ne di batei te aneshir ambuk ndi ba ne wɔ iki nuŋ ne anu maa te zhi ana anii kai.>>

52 Mtanyɛmɛ te di, uwa ure Galili, miyii? Ubǝ tɔ te yik, utǝ yik ine bla shar yi Arik ba te rurɛ miŋ Galili ba.>> 53 Fe kɔte ŋɔ a kɔmɔ ne kɔb maa.