1 Iferisawa awɔ te isak Yesɔ kɔmɔ ngɔŋ te ana su aner tetɛk abɛ zeu inaŋ abɛ Yɔɔna, 2 Nǝ yiŋɛ bai Yesɔ wa ayi ne su aneshire ba, ayi abɛ zeu tsǝn amaa. 3 Yesɔ ne duŋ ba ne Yahudiya te kama kɔmɔ ne Galili.

4 Fe ne kama zǝ Samariya. 5 Ankyak ne yir ntun nuŋ yiŋɛ ne Samariya azhɔi te Sika, yaŋ ahwaŋ awaŋ ndi Yakubu ane lɛb zu maa Yusuu. 6 Irijaa kǝ Yakubu iyi amɔ, ndi Yesɔ nɛ dǝk, nɛ rɛ itsin maa, alɔ zǝ sɔŋ nenu irijaa ma. Nɛ atsutsu arik.

7 Ndi iwa ane Samariya ne nyɛ fa amashir, Yesɔ adi iwa ma, <<Udik amashir nǝm msɔi?>> 8 Abɛ zeu na ndum amaa ne gar lɛb ikili ne miŋ ntun.>>

9 Iwa ane Samariya ma adi Yesɔ, <<Uyi awɔnǝ Yahudawa te ngam yi iwa ane Samariya. Udi urib me amashir kikini?>> (Tǝ Yahudawa ate zor ne akpa ben aner abɛ Samariya.)

10 Yesɔ adiu, <<Abɛdi une zhi inǝk yi Arik ben waŋ ndi aribu amashir ane somɔ, ubǝ rib bu ai bɛ nǝgu amashir atsitsir.>>

11 <<Ŋgɔŋ,>> Iwama adi, <<Bau yi ne goga ka te rijaa ma ilak ngɔŋ. Utei yik amashir ane so te yi tsitsir nemei? 12 Uwa unaŋ ntsǝntsǝm amɔr Yakubu, uwaŋ ndi wa ne kaa ta rijaa kǝŋe tena so amashire maayi, neme amun amaa bǝn inarum abɛ yɔk amaa ne so amashire?>>

13 Yesɔ adiu, <<Iwaŋ ndi ate so amashir awaŋa ihrie tei na teu, 14 ama iwaŋ ndi ate so amashir ane nek amuŋ ba ihrie tei na teu ba. Iyeme, amashir ane nek amuŋɔ atei kama yi ane yaŋ gbur agbub te gar ivli kɛ yaŋ klɛtu.>>

15 Iwama adi Yesɔ, <<Ŋgɔŋ, nǝm amashir ayuŋɔ te kɛ ihrie bena tem ba tem mkana nduŋ nyɛ fa amashir ayaŋa.>>

16 Yesɔ ablau, <<Tsǝn, tǝ zhɔ ilu mi te kam nyak.>>

17 <<Bam yine lulum ba,>> iwama asagu ma, Yesɔ adiu, <<Ubla zub ndi udi bau yine lulum ba. 18 Ilɛ kǝ zub keŋ, une ŋa alulum ndi ne te amɛ tuŋ, fe iwaŋ ndi uŋau ma ba yi ilu mi ba. Iki yiŋ ndi usɔŋ blai ma ai lɛ didik.>>

19 <<Ŋgɔŋ, iwama adi, <<Myik te uyi ine bla shar yi Arik. 20 Atsentsem amɔr azekur Arik ne gbu yiŋɛ, ama izhineba Yahudawa kyerta tedi amkpa awaŋ ndi tabǝ zǝ kuu Arik ge ayi ne Urshelima.>>

21 Yesɔ abla iwama, <<Ta nyɛmɛ bene bɛm, iwa, mkpaŋ nyɛ ndi izhin ntei zekuru Tetɛɛ bane gbu yiŋɛ kɔ ne Urshelima ba. 22 Izhineba aner abɛ Samariya izhin zǝ kuu iki yiŋ ndi ba zhin ne zhi ba; taba Yahudawa ta zekuru ki ndi tane zhi, te ita zhɔk ire ben Yahudawa. 23 Neme mkpaŋ nyɛ fe azizaŋa ne nyɛ ndi abɛ zekuru Arik Tetɛɛ mɔr anenen atei zekuru ne Izhu bǝn izub, te aba ayi abɛ aner abaŋ ndi Arik awɔb. 24 Arik ayi Izhu, fena ne mgbyamgbyaŋ kɛ zhu abɛ zekuru ne izhu bǝn zub.>>

25 Iwama adi, <<Mni nzhi Mezaya>> (azhɔu te Kristi) <<anyɛ. Ate nyɛ, atei bla ta kɔte nii.>>

26 Fe Yesɔ abla ilɛmɛ arumɔ, <<Ŋgɔŋ ndi mli bene bɔu myi wa.>>

27 Ndi abɛ zeu tsǝn amaa ne nyak akɔ vuŋ anu ndi ayigu azǝn lɛ ben iwa ane Samariya. Ama inuŋ bane ne rib iwama ba, <<Uwɔb anii?>> kɔ <<Aye nii te Ulɛ ben iwa waŋai?>> 28 Ankyak, akɔ duŋ ancomɔ ane fa amashir amaa, te klu akama kɔmɔ ne miŋ ntun te azho aneshir,

29 <<Nye zhin, tɔ zhin ner ndi ablam kiki ndi mne nai. Ka uwa ayi Kristi me ini?>> 30 Fe aner aklu aru ne miŋ ntuno te gar ben Yesɔ. 31 Neme abɛ tsene maa adiu, <<Ŋgɔŋ, li kinuŋ.>> 32 Ama adi ba, <<Myi ne kili yi li ndi ba zhin ne zhi atu amaa ba.>> 33 Fe abɛ zeu tsǝn amaa arib akpa men, <<Tǝ iner nuŋ nǝ lɔ gliu kili mei?>> 34 Yesɔ adi ba, <<Ikili muŋ,>> mbǝ na kiyiŋ ndi ne shar me ne dim nai tem mklɛ ndum maa. 35 Dika izhin di, <Ihwa nas ne dǝk tǝ bɛ Gli kili ye ahwaŋ aŋyak kɔbɔ>? Mblaazhin, bu zhin ayi te tɔ zhin ahwaŋa! Ikime ne rǝ mla sɛr gli nyak kɔb. 36 kɔ azizaŋa iner ne ahwaŋa ai ta idǝk maa, kɔ azizaŋa ikili yi biŋe iyi ndi aneshir abaŋ ndi ne gli ba te gar ikɔb kɛ yaŋ klɛtu tǝ bɛ ta idǝk men. 37 Iyiŋɛ ne idi, <Inuŋ atib fe inuŋ ana sɛr > ayi izub. 38 Mne shar zhin te sɛr kiyiŋ ndi ba izhineba ne na ndumo ba. Aye nuŋ aba nena ndum kɛ lɔk akpa, fe izhin ne te sɛr idǝk keŋ ndi iyi mǝne.>>

39 Aner abɛ Samariya tetɛk ne ntuno ne tanyɛmɛ bene bɔu nǝ lɛ kɛ bla iwama, <<Ne blam kiki ndi mne nai.>> 40 Fena ndi aner abɛ Samariya ma ne nyɛ bǝn abɔu, abenu te abɛ sɔŋ bene ba, fe ne te bɛr yaa amɔ. 41 Ndi ne atu ayi lǝlɛ maa anuŋ tetɛk tanyɛmɛ te zeu. 42 Adi iwama, <<Ba ta ne tanyɛmɛ bǝn Yesɔ te une bla ta ba; azizaŋa tane wɔ ne atɔŋ amɔr, tena tanyɛmɛ te iner waŋa ilɛ didik ayi ne ta aner abɛ gɔnmimi azhɔk.>>

43 Ndi bɛr yaa ne gayir alu akɔmɔ ne Galili. 44 (Fe Yesɔ ne tu maa ne bla tedi ine bla shar yi Arik ba nǝgu ngɔŋ ne ntun maa ba.) 45 Ndi ne yir Galili, aner abɛ Galili atau aŋɔk ayaa. Neyik kiki iyi na maa ne Urshelima ne igyaŋ yi glak, te aba ne yime amɔ. 46 Nena akam agar Kana ne Galili, ndi ane kam amashir ate ayime. Ankyak iner ŋgɔŋ nuŋ waŋ ndi ŋur zu maa zhɔk ne Kafanahum. 47 Ndi neshire ne awɔ te Yesɔ ne nyɛ Galili are Yahuda, agar bene bɔu te benu te abɛ nyɛ na zu maa, ndi akur agbaŋ iku. 48 Yesɔ adiu, <<Ba nuŋ atei tanyɛmɛ ba se izhin aneshir ne yik kiki iyi vuŋ anu be bǝn shur ayi.>> 49 Iner adi, <<Ŋgɔŋ, nyara te zumuŋɔ aku.>> 50 Yesɔ adiu, <<kɔmɔ kimi; Izumi atei rɛ!>>

Iner ne tanyɛmɛ bǝn Yesɔ te kɔmɔ. 51 Ndi ayi ne miŋ kɛ tsǝn kɔmɔ, igen amaa amla bene bɔu te blau te vǝvǝne neka rɛ. 52 Ne rib bu mkpaŋ keŋ ndi vǝvǝne ne rɛ, adiu, <<Ilɔmɔ ne duŋu alaŋ aririk ne Kǝrfe zhin.>>

53 Fe itetɛɛ me akɔ shuzhi te ayi mkpaŋa kɛ anenen Yesɔ ne diu, <<Izumi atei rɛ.>> Amɛ uwa bǝn aner abɛ kɔb maa ne tanyɛmɛ bǝn Yesɔ.

54 Iyiŋɛ ai mkpaŋ kɛ yaa nena ki ngɔngɔŋ iyi vuŋ anu ndi Yesɔ nena, ne rɛ Yahudiya maa te kɔmɔ ne Galili.