1 Nǝ ikukub Arik ne lɛ ben atsintsim amɔr ize bǝn abɛ shar amaa amkpaŋ tetɛk ne nkunkɔŋ tetɛk, 2 ama ne bɛr yi klɛtu yiŋɛ ne lɛ ben abɛta ize ben Izu maa, iwaŋ ndi ne hriau te ikiki bɔbɔk ibǝyi maa, ne yi wa ne na gɔŋmimi. 3 Izu maa ai wa ayi ilaŋ yi ngɔŋ iye Arik iwa ana yi ndi Arik, agli ikiki bɔbɔk ne mgbyamgbyaŋ kɛ lɛ maa. Ndi ne ka ŋla ta ne lalɛ mɔr, ne sɔŋ ne ŋɔk li kɛ Arik ne gbarshu. 4 Fe Arik ne duŋ Izu maa ai ŋgɔŋ anaŋ abɛ shar amaa, ir keŋ ndi sak keŋ ndi ne nǝgu ne naŋ mǝne.

5 Fe Arik ba ne di abɛ shar amaa anuŋ te di,

<<Uyi zu muŋ;

Aliŋe myi Tetɛɛ mi.>>

Ka Arik ne di ne shar amaa,

<<M tei yi Tetɛɛ amaa iwa atei na yi Izu muŋ.>>

6 Ama ndi ne tei shar Izu maa ne kuti ne gɔŋmimi, ne gli, abɛ shar Arik bɔbɔk mǝne te gbaru.>> 7 Ama abɛ shar Arik ne di ba,

<<Arik ne duŋ abɛ shar amaa abɛ yi izhu maa,

Te agɛn amaa abɛ yi lǝlɛn lu.>>

8 Ama ne atu ayi Izu maa Arik ne di,

<<Arik, Ikɔb ngɔŋ mi, ba yi ne klɛ tu ba,

Utei gli aneshir ami ne ankɔŋ adidik.

9 Unyɛr iki didik te kyak zumimin.

Waŋa ayi iki yiŋ ndi Arik, Arik ami, ne hriau

Te nǝgu nyɛr ne susun bǝn ngɔŋ

Inaŋ akpa ami.

10 Ne na di,

<<Iwa, Ŋgɔŋ, Une kuti na gɔŋmimi,

Ne aŋɔk ami une na igbarshu.

11 Ikiki bɔbɔk itei naŋadɔ, ama Iwa uyi me;

Itei ce ndi anklu.

12 Utei nyen kɛ ku ndi anklu,

Atei sɛn kɛ ndi anklu.

Ama Iwa unak yi ir keŋ ndi Uyime,

Bau yi ne klɛtu ba.>>

13 Ndi amɛ, Arik bane di abɛ shar amaa nuŋ,

<<Zǝ sɔŋ ayaŋ ne ŋɔk li muŋ,

Se Mne duŋ abɛ te zor ami

Abɛ yi iki caŋ ne aza mi.>>

14 Tǝ ane ŋɔɔ ba ayi abɛ shar Arik? ayi izhu yiŋ ndi anaa Arik ndum ndi iwa ne shar ba te abɛ lɔk abaŋ ndi ne yik ta zhɔk iye Arik.