1 Azizaŋa, ndi Arik ne nek ta kpa nyak te tabǝ ta sɔŋ sik yiŋ ndi ne blama. Ta bǝ te zee te kǝr inuŋ ne miŋ min abɛ yaŋ ta kpa nyak iyi sɔŋ sik iyiŋɛ ba. 2 Tǝ tane wɔ ilɛ didik, ir keŋ ndi aba menyi ne wɔkɛ. Ndi ne wɔ ilɛmɛ ama bane naa ba ikinuŋ didik ba, ndi ne wɔ kɛ, ba ne takɛ ne susun zhiin ba. 3 Tǝ taba ndi tane tanyɛme, neme, tǝ ta yi iki yiŋ ndi Arik ne akpai aŋyak. Ir keŋ ndi ne di:

<<Mne te mfu ne bla lɛ kɛ kpa nyak:

<Ba tei yir amkpa awaŋ ndi Mbǝ nek ba te bɛ sɔŋ asik ge!>>> Ne bla amɛ ama ndum maa ne ka klɛ ire mkpaŋ kɛ na gɔŋmimi. 4 Icɛr nuŋ ne di ne lɛ kɛ Arik ne atu ayi bɛr taŋgba: <<Arik ne sɔŋ asik ne bɛr yi taŋgba ndi ne na ndum maa bɔbɔk.>> 5 Ilɛ kǝŋe nena lɛ kɛ: <<Ba tei yir ntun yiŋ ndi M tei nek ba te bǝ sɔŋ asik ba.>> 6 Abaŋ ndi ne kuti awɔ lɛ didik ba ne yir amkpa ne sɔŋ sik ba, te bane tanyɛme ne kɛ ba. Fena, aduŋ anuŋ ne ta kɛ. 7 Waŋa iyi ki yiŋ ndi Arik ne nyak bɛr nuŋ, ndi azhɔi te,<<Aliŋ.>> Ase tetɛk ayi gayir Arik ane lɛ ilɛ kǝŋe ne anu akɛ Doda ndi icɛr ne di:

<<Izhin te wɔ lɛ kɛ Arik aliŋe, kǝr zhin bǝ kpa asusun amin ba.>> 8 Ate yi ndi Jeshuwa ne nek aneshir sɔŋ sik iyiŋ ndi Arik ane kpai aŋyak, Arik bai bena lɛ ne atu ayi bɛr nuŋ ba. 9 Ndi iyi amɛ, fena, ana shuzhi aner abɛ Arik te bɛ sɔŋ asik ndi Arik ne sɔŋ asik ne bɛr yi taŋgba. 10 Fe abaŋ ndi ne ta sɔŋ sik yuŋɔ ndi Arik ne kpai aŋyak atei sɔŋ asik ne ndum men, ir keŋ ndi Arik ne sɔŋ asik ne ndum maa. 11 Neme, ta bǝ tsi kli te nek atu mɔr te ta sɔŋ kɛ sik yuŋɔ, te kǝr inuŋ ne miŋ mɔr abɛ zhaku ndi ayuŋɔ nena ne kyak tanyɛme men. 12 Tǝ ilɛ kɛ Arik iyi tsitsir te na ndum, te na li naŋ anzigba akɛ li agar ayaa. Iyir te gar amkpa waŋ ndi susun ben izhu abiŋ, ne amkpa awaŋ ndi alambur abiŋ. Itǝ kiki yi bubu ben lǝlɛ yi susun ambuk. 13 Ba ikinuŋ iyi suyir ne ti kɛ Arik ba; kɔte nii iyi andala tena kam kukur ndende ne ayi amaa. Ayi Wa ndi ne na gɔŋmimi ta tei blau kiki yi na mɔr bɔbɔk.

14 Neme, tabǝ klɛ mgbamgbaŋ ne tanyɛme mɔr. Tǝ tayi ne Ŋgɔŋ ne na ndum Arik iwaŋ ndi ne ka kɔmɔ ben Arik, Yesɔ Izu Arik. 15 Ngɔŋ amɔr ne na ndum Arik ba yi waŋ ndi ayaŋ wɔ lɔ susun ne klu aŋin mɔr ba. Ba yi amɛ ankyak ba, tayi ne Ŋgɔŋ ne na ndum Arik iwaŋ ndi ne tsa ru ne nkuŋkɔŋ bɔbɔk ndi ta yime, ama bane na lalɛ ba. 16 Duŋ tabǝ yi ne zhɔk susun, fe, te gbahir ne mben ye Arik, nena didik maa. Ne mwɔ ta tei ta lɔ susun tena yik ki didik te bɛ lɔk tama ne mkpaŋ kɛ wɔb.