1 Ilɛ kɛ kpa nyak kɛ Yahudawa bane shaga ba bai ankɔŋ ane iki didik ba; ai iki sha bate Gli iki didik igli nyɛ ba. Ai ibaŋ yiŋɛ yi atsǝgǝ yaŋ klɛtu, atsik ibaŋ yiŋɛ kɔte se takɛ. Ilɛ kɛ kpa nyak kǝŋe itei na kikin te itsik ibaŋ yiŋɛ bɛ duŋ aneshir abaŋ ndi azǝ Arik abɛyi tsetser? 2 Ate yi ndi aner abaŋ ndi azǝ Arik neka duŋ ba ayi tsetser ne zumimin men, bate na dam atu men ne zumimin men ba, itsik baŋ yiŋɛ tei gburkli. 3 Ndi iyi amɛ, atsik ibaŋ yiŋɛ kɔte se takɛ te abɛ duŋ aneshir abɛ shu zumimin azhi. 4 Azhizhi Wuwu ben Alandɔŋ lulum batei zuk aneshir shur ne na zumimin men ba.

5 Nǝ yiŋɛ, ndi Kristi ne tei nyɛ gɔŋmimi, ne di Arik:

<<Bau wɔb ibaŋ ben nek ikiki ba,

Ama une na ikpa nyak me.

6 Bau tanyɛme ben inarum iyiŋ ndi ne goŋǝ ne amkpa ne tsik ibaŋ

Ka ibaŋ yi baŋ zumimin tibɛ.

7 Fe mdi, <Te nga waŋ,

M tei na iki yiŋ ndi uwɔbǝ, Arik,

Ir keŋ ndi ne cɛr ne atu amuŋ ne ilɛ kɛ cɛr yi Musa.>>>

8 Nǝ kuti ne di, <<Bau wɔb ka uyer ne tsik ibaŋ ben nek ikiki ka narum yiŋ ndi ne goŋǝ ne amkpa ne tsik baŋ ben ibaŋ yi baŋ zumimin yi aneshir.>> Ne bla amɛ ndi atuk ibaŋ yi ilɛ kɛ kpa nyak. 9 Fe adi, <<Te nga waŋ, Arik, M tei na iki yiŋ ndi uwɔbǝ.>> Ankyak Arik ne baŋ ilɛ kɛ tsik ibaŋ iyi kukub atibe te aŋyak Yesɔ ne amkpa ma. 10 Te Yesɔ Kristi ne na iki yiŋ ndi Arik awɔb te abɛ na, ta yi tsetser ndi Yesɔ ne nek ikpa maa mkpaŋ zhiin ankyak.

11 Kɔte ne na ndum Arik tawa ne Yahudawa ana ndum maa te na tsik ibaŋ amkpaŋ tetɛk; Ama ibaŋ yige ban zumimin tibɛ ba. 12 Neme, Kristi ne tsik ibaŋ yi ban zumimin tibɛ, itsik ibaŋ yige mkpaŋ zhin ankyak gar klɛtu, fe akɔ sɔŋ ne ŋɔk li kɛ Arik. 13 Ankyak ne ŋub se ndi Arik ne duŋu ajaŋ abaŋ ndi ate zor ben abɔu ne aza maa. 14 Ne tsik ibaŋ mkpaŋ zhin ankyak, ne duŋu ashaga yaŋ klɛtu te duŋ aneshir abɛ yi tsetser. 15 Aŋyak Izhu tsetser yi ayi amɔr. Ne kuti ne di, 16 <<Waŋa ai kpa nyak ndi mne tei ben abɛba, Arik adi: M tei duŋ icɛr yak muŋ ne asusun amen tena cɛrǝ ne alambur amen.>> 17 Fe Arik adi, bam te na shuzhi izumimin men ben ikiki yi na men ba. 18 Neme ndi zuk ba zhɔk ne ikiki yiŋɛ, ibaŋ yi ban zumimin ba na yime ba.

19 Neme amunya, ta yi ne zhɔk kpa te yir amkpa ne tsetser ngɔŋ ne iku Yesɔ. 20 Ne bu ta ankɔŋ ayayas, ankɔŋ atsitsir, ne lablɛ ndi ai kpa maa. 21 Tayi ne ne na ndum kɛ Arik ngɔŋ ndi iwa agli ikɔb Arik. 22 Neme tabǝ nyɛ gbahir ben Arik ne susun didik ne tanyɛme, ne asusun ayiŋ ndi neka nai azhɔk tsetser ne iku azhizhi ben akpa ayiŋ ndi ne ŋlai ne amashir. 23 Tabǝ kli mgbamgbaŋ shur ayi ndi ta ne tanyɛme neyi, te ta ne tanyɛme ben Arik tena yak ikpa nyak maa. 24 Tabǝ na kam tɔ akpa amɔr, te na lɔk akpa amɔr tena nyɛr akpa tena na akpa mɔr iki didik. 25 Kǝr ta bɛ duŋ biŋ akpa mɔr ka, ndi anuŋ ana. Neme, tabǝ shɔk akpa mɔr ne lǝlɛ didik, te ta ne yik ibar yi isɔŋ te gbahir. 26 Te ba tena tsik ibaŋ yi baŋ zumimin gli tibɛ ba nta te na kam na zumimin ndi neka duŋ ta zhi didik. 27 Neme, tabǝ sɔŋ ŋub ambuk ayi sɔŋ nyɛ ne sisik ben ilu kɛ wu ngɔŋ ikeŋ ndi te ŋɔk abɛ kyak zǝ Arik! 28 Iwaŋ ndi ate kyak zi icɛr yi Musa atsǝgu aŋun yaŋ lɔ susun ndi aneshir ayaa kɔ naŋ te bla ikinuŋ ne tu maa. 29 Te itei yi kikin ben abaŋ ndi ne kyak Izu Arik? Ndi ne var azhizhi awaŋ ndi Arik ne kpa nyak ane duŋ ta yi tsetser ne zumimin? Ndi ne kyak izhu yi na iki didik? Tɔ ir iyah ngɔŋ yiŋ ndi atei nek ba neyi! 30 Te ta ne zhi iwaŋ ndi ne di, <<Nga M tei baŋ iki yiŋ ndi ne na neshir, M tei na nek neshir iki yiŋ ndi ne nai>>; Nena di, <<Arik atei te aneshir amaa ambuk.>> 31 Ai iki mimin ubɛ yir aŋɔk ayi Arik tsitsir! 32 Izhin bɛ shuzhi ndi ne yi Mkpaŋ kɛ gayir. Ne bǝn, ndi ilu kɛ Arik ne laŋ ku zhi, izhin ne yik iyah ne ikiki tetɛk, neme ta ne vuŋ susun Gli ne yik ya mɔr. 33 Nena yen zhin ne miŋ du aneshir ne kpaŋ nuŋ, ne kpaŋ nuŋ izhin ne wɔb kam zǝ abaŋ ndi ne naa ba amɛ. 34 Izhin ne wɔ lɔ susun kɛ abaŋ ndi ne ku ba ne jaru, ndi ne ta ikiki min bɔbɔk, izhin ne nyɛr ne vuŋ susun ne yaŋ ikiki min, te izhin ne zhi te izhin tei yik iki nuŋ yi naŋ iyuŋɔ shaan, ndi ba yi ne klɛ tu ba. 35 Kǝr zhin bɛ duŋ vuŋ susun Gli ba, te atei nek zhin idǝk ngɔŋ. 36 Izhin bɛ vuŋ susun, te izhin bɛ na iki yiŋ ndi Arik awɔbǝ te izhin bɛ ta iki yiŋ ndi ne di iwa atei nek zhin ne yi. 37 Fe ndi ilɛ kɛ Arik ne di, <<mkpaŋ ne dǝk watsɔb, iwaŋ ndi anyɛ atei nyɛ; batei ban mkpaŋ ba. 38 Aneshir tsetser muŋ, neme, ne tanyɛme yi susun atei yi atsitsir; ama inuŋ ate kam gɔŋ, bam tei wɔ men maa ba. 39 Bata aneshir abaŋ ndi ne kam ŋɔk te ku ba. Neme, itanyɛme mɔr itei ta ta zhɔk.