HEB - NUMANA 6

1 Neme, duŋ tabǝ zǝ iki yiŋ ndi ne tsar ta neyi ne atu ayi Yesɔ. Ta neka kuti tsar zhin iki didik ndi ba tane tsar zhin ne yi ba. kǝr tabǝ na zǝ itsar yi yik ayi te igli neshir gar iku ta bǝ tanyɛme ben Arik ne susun amɔr. 2 Tane ka men tsar zhin ne atu ayi su aneshir kaaŋkaŋ ne sak kɛ Yesɔ ben saak aneshir aŋɔk. Izhin ne zhi ilɛ kɛ lɛk aneshir ne bɛ ben ŋas iyi klɛtu. Neme tabǝ zǝ itsar didik. 3 Ta tei li ti, ndi Arik ate tanyɛme. 4 Abaŋ ndi neka ta lɛ kɛ Arik tǝ nɛ zhaku ai na kikin te gli ba aŋur akama te bɛ duŋ zumimin?. Ne ka yik didik kɛ Arik tena ta Izhu Tsetser; 5 ne zhi te lɛ kɛ Arik iyi didik ben mgbyamgbyaŋ ne ikab kɛ nyɛ, 6 fe azizaŋa aba ne tu men ne kyak tanyɛme! Itei lɔmɔ te bɛ ana gli ba aŋur akam ne ankɔŋ ayou Arik atara ana kpaŋ Yesɔ tena zhɔ gu shisha ne ti kɛ aneshir. 7 Arik nɛ nǝk imimi anu adidik iyiŋ ndi gbur amalu ndi aku amkpamkpaŋ te duŋ bǝbǝ ki itɔ te nek mgbyaŋ ben abɛ lɔn anu adidik. 8 Ama ate yi ndi ncoŋ ben ishub itɔ ne mimi me, ba yi didik ba. Arik atei nege anu amimin itei gɔŋ.

9 Ama, akpaamuŋ, atei ndi ta lɛ amɛ bata ne yaŋ zhi zhin ba. Izhin ne zhi iki yiŋ ndi yi didik iyi ita zhɔk Arik. 10 Arik ayi nena iki didik ba tei ŋur asuk ne ndum didik kɛ na min ben ir keŋ ndi izhin ne tanyɛme bǝn abɔu ben ndum keŋ ndi nena kɛ kukub ben azizaŋa. 11 Ta wɔb te kɔte ŋɔwa abɛ gli nek tu maa gar klɛtu, te izhin bǝ yik iki yiŋ ndi izhin shur ayime neyi. 12 Ba ta wɔb te inuŋ abɛyi ne te ankɔ ba, ama izhin bǝ yi ndi abaŋ ndi ne ta iki shur ayi men ne tanyɛme yi susun ben vuŋ susun, te bɛ ta iki iyiŋ ndi Arik ne kpai aŋyak.

Ikpa nyak iye Arik

13 Ndi Arik ne kpa ilɛ aŋyak ben Ibrai, ne she arim iwa atei na iki yiŋ ndi wa ne akpai aŋyak. Tǝ ine naŋu ana yime ba, ne she arim ne sak maa. 14 Arik ne di, <<Mne mkpaŋ nyagu te ndi M tei nǝgu anu adidik te nek nga ŋli mi iki tetɛk.>> 15 Neme Ibrai ne vuŋ susun, te ta iki yiŋ ndi Arik ne kpai anyagu. 16 Aneshir ate sherim, asherim me ne sak keŋ ndi iyi ŋgɔŋ inaŋ ba, arim ayiŋɛ aduŋ atam aklɛ. 17 Tǝ abaŋ ndi ai bɛ ta iki yiŋ ndi Arik ne kpai aŋyak ba, Arik ne duŋ ba zhi te iwa batei sen anu ba; te sherim ne lɛ kɛ kpa nyak maa. 18 Waŋa ai ikiki yaa, ndi batei sen ba te Arik ba timu ba. Itaba abaŋ ndi ta ne lieru ne atu maa ta bǝ tsi kli mgbamgbaŋ te shur ayi mɔr. 19 Ishur ayi mɔr yiŋɛ ai yi iyi mgbyamgbyaŋ mɔr. Ita zub tena ta aneshir shur, te zǝ ŋa anklu kɛ miŋ Akabaŋkɔŋ ane gbarshu ndi Arik ayime. 20 Yesɔ ne ka kuuta ti agar amɔ ne atu amɔr, te yi ŋgɔŋ ne na ndum Arik yaŋ klɛtu, ndi nkɔŋ kɛ Macizede.