1 Iber Tani ne dǝk te igyaŋ yi tuk glak bǝ nyɛ, Yesɔ ne nyɛ Batani, ne amkpa awaŋ ndi Lazaru ayime, iwaŋ ndi Yesɔ ne lɛgu ne ku. 2 Ne naa Yesɔ kili yi tau. Marta azǝn naa ba kili me, Lazaru wa ayi ne miŋ kɛ abɛ kusɔŋ bǝn Yesɔ. 3 Fe Meryamu abaŋ anyɛ wurdi shushum ane te anyaŋ; abuu akɔk ashur Yesɔ ne aza te akam mfumfuk tu maa ai su aza ma. Ankyak imiŋ kɔbɔ iŋur vuŋ ne mgbɔ shushum.

4 Ama izhin ne miŋ kɛ abɛ zeu tsǝn amaa, Yahuda awɔnǝ Iskariyɔti, iwaŋ ndi ne alɔ tun zhi Yesɔ, te kyagu, 5 <<Aye nii duŋ bane abaŋ wurdi awaŋa alɛb te ata azɔbɔ akam anǝk abɛ yini iyah kai? Ibǝ ya abɛ na ndum kɛ ise zhiin.>> 6 Ibla maa iyiŋɛ te abɛ ka nek abɛ yini iyah ba, ama ayi ne zhib; iwa ayi ne nyak mgbɔ iye azɔbɔ, aben avu azɔb anuŋ ana kiyi nyɛr maa.

7 <<Duŋu na iki yi na maa,>> Yesɔ adiu. <<Ne menezhi te Meryamu abɛ nyak wurdi me aŋub bɛr iyi rum. 8 kɔte mkpaŋ takɛ izhin yi ben abɛ yini iyah ne miŋ min, ama ba kɔte mkpaŋ takɛ izhin tei yi bǝn abɛm ba.>>

9 Neme ntsan aneshir abɛ Yahudawa ne wɔ te Yesɔ ayi ne Batanya, fe agar amɔ, ba ne atu ye Yesɔ ankyak ba ama te bɛ yik Lazaru, waŋ ndi Yesɔ ne lɛgu ne bɛ. 10 Fe ngɔŋ ine na ndum kǝ Arik ne kpa abiŋ te wɔb te aba abɛ ŋun Lazaru mayi, 11 ne atu maa Yahudawa tetɛk ne kyak ba te tanyɛmɛ bǝn Yesɔ.

12 Ne bɛr yi kuzi ntsan aneshir ndi ne nyɛ igyaŋ yi tuk glak ne wɔ te di Yesɔ asɔŋ anyɛ Urshelima. 13 Ne vu ayiya ilɛk te gar mla ben abɔu ne ankɔŋ, te te ahwa te di,

<<Igbar asak yi ben Arik!>>

<<Anu adidik ayi ben iwaŋ ndi anyɛ ne sak kɛ Ŋgon!>>

Anu adidik ayi ben Itum ne Isrela!>>

14 Yesɔ ne yik Nŋa te yuŋɔ sɔŋu, ndi ne cɛr te di,

15 <<Kǝr izhin bǝ te sisik ba, ntun yi Siyona;

Tɔ zhin, Itum amin anyɛ, asa vǝvǝn nŋa te asɔŋ anyɛ.>>

16 Nǝ kuti abɛ zǝ Yesɔ tsen ba ne zhi iki yiŋɛ ba. Ama ndi ne nek Yesɔ ngɔŋ maa, fe akɔ shuzhi te ne cɛr iki yiŋɛ ne atu amaa te ne nau iki yiŋɛ.

17 Fe ntsan aneshir abaŋ ndi ne yi bǝn Yesɔ ndi ne lɛk Lazaru ne bɛ ne bla iki yiŋ ndi Yesɔ nenai. 18 Waŋa ayi ki yiŋ ndi ntsan aneshir ne akɔte yigu, te ne wɔ Yesɔ nena iki vuŋ anu. 19 Ankyak Ferisawa adi akpa men, <<Izhin yik, bata ne ya na iki nuŋ ba! Tɔ ir keŋ ndi aneshir bɔbɔk ne gɔnmimi azeu!>>

20 Neme Helenawa anuŋ ne yi ne miŋ abaŋ ndi ne gar Urshelima te kɔmɔ zekuru Arik ne mkpaŋ kɛ igyaŋ. 21 Ne nyɛ ben Filibus, ndi are Batseda ne gar kɛ Galili te di, <<Ŋgɔŋ, ta wɔb te ta bǝ yik Yesɔ.>> 22 Fe Filibus akɔte bla Anduru; ankyak yayaa men akɔte bla Yesɔ.

23 Yesɔ adi ba, <<mkpaŋ neka tǝ ndi atei nek Izu Neshir ngɔŋ maa. 24 Mbla zhin lɛ didik, mba ne tib mgbyaŋ alikama ne mimi te duŋǝ ku ba itei yi kiki maa, ama ite ku itei gli mgbyaŋ kpu tetɛk nyɛmɛ. 25 Iner waŋ ndi anyer ivli maa atei suk kɛ, iwaŋ ndi ate kyak ivli maa ne atu amuŋ ne gɔnmimi kǝŋe atei yik kɛ yaŋ klɛtu. 26 Waŋ ndi awɔb te wa abɛ zekuru me atei zǝm; te amkpa awaŋ ndi m yime, agene amuŋ abɛ na yi amɔ. Tetɛɛ amuŋ atei nǝgu ŋgon.

27 Yesɔ adi<<Azizaŋa susun muŋ ilɛn me, M tei ndi kikin? <Tetɛɛ, tam zhɔk ne mkpaŋ keŋɛi?> Mm, ama waŋa ayi ki yiŋ ndi mne nyɛ te mbǝ yik iya ne mkpaŋ kǝŋe!>> 28 Tetɛɛ, duŋ sak mi ibǝ yi ngɔŋ!>>

Ankyak ikɔr ilɛ rɛ igbarshu te di, <<Mne ka nek Isak mi ngɔŋ, M tei na nek ngɔŋ.>> 29 Ntsan aneshir ndi ne yi ne amkpama te wɔ ikɔro adi ai inas ŋur, anuŋ adi ai ine shar ayou Arik alɛ ben abɔu.

30 Ama Yesɔ adi ba, <<Ikɔr kǝŋe iyi ne atu min, ba atu amuŋ ba. 31 Azizaŋa waŋa ai mkpaŋ kɛ te aneshir abɛ gɔnmimi ambuk; azizaŋa atei tun ine gli gɔnmimi kǝŋe atibe. 32 Ama nga, atei lɛk me ne bɛ te baŋ me ne gɔnmimi te gli akɔmɔ ne shu, M tei gbur aneshir bɔbɔk ngli nyɛ ne atu muŋ.>> 33 Yesɔ ne bla amɛ te abɛ tsar ir iku keŋ ndi tei vuŋ wa.

34 Ntsɛn anɛshire adi, <<Icɛr yi Musa nǝ bla ta tedi Kristi batei ku ba, fe tǝ aye ni duŋu udi, <Atei lik Izu neshir ne bɛ te gliu akɔ ne shu? Iŋɔwa ayi, Izu neshirɛi?>>

35 Ankyak Yesɔ adi ba, <<Ilaŋ amkpa itei yi bǝn abɛ zhin mkpaŋ watsɔb. Izhin bǝ tsen ndi amkpa anak ari laŋ, kǝr ibu ibǝ nyɛ vuŋ zhin ba. Iner waŋ ndi atsǝn ne bu ba zhi amkpa awaŋ ndi agaru ba. 36 Izhin bǝ tanyɛmɛ bǝn ilaŋ amkpa, ndi nak iri yi ben abɛ zhin, te izhin tei yi aneshir abɛ laŋ amkpa.>> Ndi Yesɔ lɛ klɛ, ne duŋ ba te akɔte su tu maa ayir.

37 Neme ndi Yesɔ nena iki yi vuŋ anu yiŋɛ bɔbɔk ne ayi men, ba ne tanyɛmɛ bǝn abɔu ba. 38 Te duŋ lɛ kɛ bla Ishaya ine bla shar yi Arik ibǝ shaga:

<<Ŋgon, iŋɔwa ne tanyɛmɛ ne lɛ kɛ bla mɔr? Arik nena tsar iŋɔwa mgbyamgbyaŋ maa?>>

39 Neme bane tanyɛmɛ ayir ba, te Ishaya nena bla te di,

40 <<Arik ne ku ayi amene

Te na ku asusun amen,

Te duŋ batei yik ne ayi amen ba, ba tei na zhi ne asusun amen ba, batei na kam aŋyak ben abɛm ba, tem duŋ ba are.>>

41 Ishaya ne bla shar iye Arik ne bla te di, mne yik ngɔŋ kɛ Yesɔ te lɛ ne atu maa.

42 Fe ne mkpaŋa angɔngɔŋ Yahudawa anuŋ ne tanyɛmɛ bǝn abɔu. Ama atu ye Ferisawa ba ne lɛ agli arumɔ ba, te kǝr abɛ gli ba arumɔ ne miŋ Akabakɔŋ ba; 43 te anyer igbar yi aneshir anaŋ yi Arik.

44 Ankyak Yesɔ alɛ ne kɔr ngɔŋ te di, <<Iwaŋ ndi ate tanyɛmɛ bǝn abɛm, ba ne tanyɛmɛ bǝn nga ankyak ba, ama ne tanyɛmɛ bǝn waŋ ndi ne shar me. 45 Waŋ ndi ate yik me ne yik waŋ ndi ne shar me. 46 Mne nyɛ gɔnmimi ndi laŋ amkpa, te waŋ ndi ate tanyɛmɛ bǝn abɛm kǝr abɛ sɔŋ ne bu ba.

47 Iwaŋ ndi ate wɔ lɛ muŋ te kyak zǝ kɛ, bam M tei te ba ŋas ba, te bam ne nyɛ te gɔnmimi ambuk ba, ama mbǝ ta kɛ zhɔk. 48 Abaŋ ndi ne kyak me te na kyak ta lɛ muŋ ayi ne waŋ ndi atei te ba ambuk. Ilɛ keŋ ndi mne lɛ kɛ tetɛɛ ba ambuk ne bɛr klɛtu. 49 Tǝ bam ne lɛ ne mgbyamgbyaŋ muŋ ba, ama Tetɛɛ waŋ ndi ne shar me ne nǝm lɛ keŋ ndi M tei bla te na lɛ kɛ. 50 Mne zhi te ilɛ keŋ ndi ne nǝm ne kǝ igli ivli kɛ yaŋ klɛtu nyɛmɛ. Neme iki yiŋ ndi Mblai ayi ki yiŋ ndi Tetɛɛ ne blam tem blai.>>