1 Ndi Yesɔ neka di iyiŋɛ aklɛ, alǝk ayi atɔ shumɔ tedi:

<<Tetɛɛ muŋ, mkpaŋa neka nyɛ. Duŋ sak Izu mi bǝyi Ngɔŋ, te Zu mi abɛ duŋ sak mi bǝyi ŋgɔŋ. 2 Tǝ ai wa une nǝgu mgbyamgbyaŋ netu aneshir bɔbɔk tǝ bɛ nek ivli kɛ yaŋ klɛ netu abaŋ ndi une nǝgu neba. 3 Ivli kɛ yaŋ klɛ: te abɛ zhiu, Arik izhiin ankyak ne izub, bǝn Yesɔ Kristi, iwaŋ ndi une sharu. 4 Mne lɛk ngɔŋ mi ngli nyɛmɛ ne gɔnmimi ne klɛ ndum keŋ ndi une dim mna kɛ. 5 Fe azizaŋa, Tetɛɛ, lɛk ngɔŋ muŋ ne timi ngɔŋ keŋ ndi Me yime ne kǝ bene bɔu te gɔnmimi bǝshi sɔŋ.

6 <<Mǝne duŋ abaŋ ndi une nǝm aneba ne zhiu ne gɔnmimi. Neka yi ami; une nǝm aneba tǝ nɛ wɔm te zǝ ilɛ mi. 7 Azizaŋa neka zhi te kɔte nii ndi une nǝm ire bene bɔu. 8 Tǝ Mne nek ba lǝlɛ mi yiŋ ndi une nǝm neyi tǝ nɛ tei. Ne na zhi tem Mrɛ bene bɔu, tena tanyɛmɛ te iyi zub ai wa une shar me. 9 Mben netu amene. Bam Mben netu ayi gɔnmimi ba, ama netu aye abaŋ ndi une nǝm aneba, te ayemi. 10 Kiki muŋ bɔbɔk iyi mi, neme kiki mi bɔbɔk iyi muŋ. Fe inǝk ngɔŋ ne nyɛ bene bɛm netu amen. 11 Fe bam tei nkam sɔŋ ne gɔnmimi kǝŋe ba; ama aba anaga ri yi ne gɔnmimi, fena Ngam nyɛ bene bɔu. Tsetser Tetɛɛ, tuŋ ba nyak ne mgbyamgbyaŋ kɛ sak mi, isak keŋ ndi une nǝm ne kǝ, teduŋ ba abɛyi azhiin ndi tayi azhiin. 12 Ndi Mne ri yi bene bǝba, Mne kyu ba ngli anenen ne sak keŋ ndi une nǝm ma. Inuŋ bane naŋadɔ ba, se ner waŋ ndi ate duŋ nkan lɛ bǝ shaga ne tu maa.

13 <<M nyɛ bene bɔu azizaŋa, ama mbla kiki yiŋɛ tem nak ri yi ne gɔnmimi, te duŋ ba abɛ Gli nyer muŋ iyi shaga ne akpa mɛn. 14 Mne nek ba nkanlɛ mi fe igɔnmimi ne kyak ba, te aba ba yi abɛ gɔnmimi ba ndi Nga bam yine gɔnmimi ba. 15 Iben muŋ bam ndi te ubǝ baŋ ba igli tibɛ ne gɔnmimi ba, ama ubǝ ŋub ba netu ne na iki mimin. 16 Ba ayi abɛ gɔnmimi ba, ndi Nga bam nayi ne gɔnmimi ba. 17 Duŋ ba aklɛ ne lɛ kɛ zub; ilɛ mi kɛ iyi didik. 18 Ndi une shar me ne miŋ gɔnmimi, Mne na shar ba ne miŋ kɛ gɔnmimi. 19 Ne atu mǝne Mne nek tu muŋ, te aba imenyi abɛ nǝgu atu men inek didik.

20 Iben muŋ bane atu amen ankyak ba. Mna mben ne atu abaŋ ndi atei tanyɛmɛ ne susun bene bɛm ne nkɔŋ kɛ lɛmi, 21 Tǝ duŋ bɔbɔk mǝne abɛyi zhiin, Tetɛɛ, ndi uwa uyi ne miŋ muŋ tem nayi ne miŋ mi. Tǝ abɛyi azhiin ne miŋ mɔr teduŋ gɔnmimi bǝ tanyɛmɛ te ai wa une shar me. 22 Mne nek ba ngɔŋ keŋ ndi une nǝm, te duŋ ba abɛyi zhiin ndi tayi zhiin: 23 Nga ne miŋ men fena uwa ne miŋ muŋ. Tǝ duŋ biŋe tu mǝne bǝ yi zhiin, te gɔnmimi bǝ zhi te une shar me te une nyɛr ba ir keŋ ndi u na nyer me.

24 <<Tetɛɛ, Mdi abaŋ ndi une nǝm aneba ma abɛyi bene bɛm ne amkpa awaŋ ndim yime, tǝ bɛ yik nek ngɔŋ muŋ, nek ŋgɔŋ keŋ ndi uwa une nǝm anekǝ te uwa une nyer me teshe na gɔnmimi.

25 <<Tsetser Tetɛɛ, neme igɔnmimi bane zhiu ba, Nga mne zhiu, fe ne zhi te une shar me. 26 Mne nduŋu izhi ba, M tei zen duŋ ba zhiu, teduŋ nyer mi iyiŋ ndi iyi ne atu ayi sak muŋ bǝ yi ne atu amen te Nga muŋ yi mbǝ yi ne miŋ men.>>