(Luka 7:18-35)

1 Ndi Yesɔ ne lɛ klɛ bǝn abɛ tsene maa awur ane yaa, ne kɔmɔ ne ntuntun yi Galili te zen tsar bǝn du ba lɛ.

2 Fe Yɔɔna ndi ne kukur ne jaru ne awɔ kiki yiŋ ndi Kristi azǝn nai, ashar abɛ tsene maa 3 abɛ rib bu te di, <<Ayi waa uyi ne tei nyɛ waŋa, kɔ ta bǝ shur ayi ben nuŋ ini?>>

4 Yesɔ ata anyɛ me, <<Kam kɔmɔ te bla zhin Yɔɔna iki yiŋ ndi izhin ne wɔi te na yik: 5 Abɛ amfik ayi ne ta iyik, abɛ aglugluk alu atsǝn, abɛ amkpuk nɛ rɛ, abɛ amfik atɔŋ awɔ lɛ, ne lǝk abɛ ku kama lu, azǝn du lɛ didik kǝ Arik shur aner abɛ iya. 6 Anu didik ayi ne atu abaŋ ndi bane tun zhim ba!>>

7 Ndi abɛ zǝ Yɔɔna tsǝn akama atibe, Yesɔ akɔ lɛ ben ntsan aneshire ne atu ayi Yɔɔna: <<Izhin ne kɔmɔ gar na nii ne zizige? Ikyuru keŋ ndi ŋguŋgu fuk kei? 8 Mba ite ye mee ba, izhin ne ru gar tɔ anii? Ner ndi ne asu iki didige? Ba yi mee ba, abɛ su ki didik ayi ne akɔb ayi atɔ itum. 9 Fe izhin ne ru gar tɔ anii? Ine bla shar yi Arik ge? Iyeme, Mbla zhin, te Yɔɔna anaŋ ne bla shar you Arik. 10 Waŋa ayi iner ndi ne cɛr ne atu amaa te di:

<<<M tei shar ne shar amuŋ abɛ lii zhin ti,

Iwa atei kun wa ankɔŋ.>

11 Mbla zhin izub: Ne min kɛ abaŋ ndi amba ne ŋli ba, ba waŋ ndi ne naŋ Yɔɔna ne su aneshir ne ngɔŋ; Ne mee, waŋ ndi ayi vǝtsɔb ne ikɔb kǝ gbarshu ne naŋu. 12 Nak rǝ mkpaŋ kɛ Yɔɔna ne su aneshir te nyak azizaŋ, ikɔb kǝ gbarshu zen yik iya tetɛk, te aner abɛ mgbyamgbyaŋ awɔb takǝ. 13 Ne me abɛ bla shar yi Arik bǝn icɛr yi Musa ne bla lɛ kɛ ikɔb Arik nyɛ yir mkpaŋ kɛ Yɔɔna. 14 Ate yi ndi zhin tei ta kɛ, iwa ayi Iliya ndi ane tei nyɛ. 15 Waŋ ndi ayi ne atɔŋ ayi wɔ, abɛ wɔ.

16 <<M tei mbiŋ kab kǝŋe nenii? Ayi ndi amumun abaŋ ndi akɔ sɔŋ ne dub te azǝn zhɔ akpa men:

17 <<<Ta ne vli zhin mgbemgba,

Ba zhin ne glu ba;

Ta ne zhin asem ku.

Ba zhin ne zhin ba.>

18 Yɔɔna ne nyɛ, te kyak li kili ben so, adi, <Ayi ne anerim.> 19 Izu Neshir ne nyɛ te li te so, aba tara di, <Tɔ zhin ne mli ki rǝrǝ waŋa, ikpa abɛ ta gendu ben abɛ <<Na zumimin.>>> Ne mee Mgbemgbeb kɛ Arik ne tsar iki yi zub.>>

(Luka 10:13-15)

20 Ankyak Yesɔ akɔ yir tsǝn aneshir abɛ ntuntun yiŋ ndi wa ane na kiki yi vuŋ anu, te nɛ kyak duŋ na zumimin men. 21 <<Zhin zhɔk atu amin aneshir abɛ kɔrasinu! Zhin zhɔk atu min, aneshir abɛ Batseda! Abɛ di kiki yi vuŋ anu ndi ne nai ne atsutsu amin iyi ane anai ne Taya bǝn Sidon, abɛ men duŋ na zumimin men ire asese te su amkpɔk anklunklu te zǝ sɔŋ ne miŋ ntun. 22 Mbla zhin zub, iyik iyah min ne bɛr yi te ambuk itei naŋ yi aner abɛ Taya ben Sidon. 23 Izhin aba, aner abɛ Kafanahum, atei lik zhin akɔmɔ ne gbarshu? Ba yeme ba, atei zhɔk zhin shisha te gar min lu. Abɛ di kiki yi vuŋ anu yiŋ ndi ne nai ne miŋ min ai yi ne nai ne Sodɔm, aner abɛ Sodɔm abɛ duŋ ki mimin men. 24 Fe na mbla zhin ne bɛr yi te ambuk iyik iya min itei naŋ yi aner abɛ yi ne gar kǝ Sodɔm.>>

(Luka 10:21-22)

25 Nǝ mkpaŋ yuŋɔ Yesɔ ne di, <<Mni nye ru, Tetɛɛ Ŋgɔŋ ne gbarshu bǝn gɔnmimi, ndi une su kiki yiŋɛ yir abɛ mgbemgbebɛ bǝn abɛ zhi ki. 26 Iyime, Tetɛɛ, ne reu te ubǝ na amɛ.

27 <<Tetɛɛ amuŋ ne nek me kiki yiŋɛ bɔbɔk ne aŋɔk amuŋ, ba nuŋ ndi ne zhi Izu Arik se Tetɛɛ. Amɛ inuŋ ba ne zhi Tetɛɛ ma ba sǝ Ivǝn maa ben abaŋ ndi Vǝvǝne ne hria ba te abɛ tsar tu maa.

28 <<Nyɛ zhin ben abɛm, izhin abɛ yik iyah, izhin abɛ hru ki yi luk, M tei nek zhin vli kɛ sik. 29 Baŋ zhin ihru muŋ ihru zhin te vuŋ tsar muŋ, te Nga me yi ne shur kpa ne susun bǝn yaŋ lǝktu, te izhin tei yik sɔŋ sik. 30 Tǝ ihru muŋ ba luk ba ikiki muŋ iyi fogɔtɔk.>>