1 Fe Yesɔ adi ntsan aneshir bǝn abɛ tsene maa: 2 <<Abɛ tsar atɔra bǝn Ferisawa aba be sɔŋ ne mben te nek cɛr yi Musa ma. 3 Neme izhin bɛ tsǝ klɛ te zǝ ba te na kiki yiŋ ndi ablaa zhin. Kǝr zhin bǝ na ki yiŋ ndi anayi ba, te ba ne tɔ mǝne ba na kiyiŋ ndi a bla ba. 4 Akpaa ki yi luk, ben yi lɔ baŋ te baŋǝ sak aneshire ne ampa men, ndi aba menyi bane tanyɛme te aba tei baŋǝ ne vǝn ŋɔk men ba.

5 <<Kiki yiŋ ndi anai te aneshir abɛ yik ba: Ne na guru ngɔngɔŋ, te duŋ aŋɔk anklu amen abɛ lak atar ne gbarum; 6 A nyer kpǝmkpa yi nek ŋgɔŋ ne gyaŋ ben mben didik ne akaba; 7 A nyer te bɛ yik aneshir abɛ tek ba te nǝk ba ngɔŋ men te na zhɔ ba te <Abɛ tsar.>

8 Bane te bɛ zhɔzhin te <Abɛ tsar,> ba izhin yi ne Ŋgɔŋ zhin ankyak fe izhin yi amunya bɔbɔk. 9 Kǝr zhin bǝ zhɔ nuŋ ne gɔnmimi te: <Tetɛɛ ba,> te zhin yi ne Tetɛɛ zhiin, ndi ayi ne gbarshu. 10 kɔka abɛ na zhɔzhin te angɔŋgɔŋ, izhin nak yi ne Almasihu ne Tsar zhin ankyak waŋ ndi ayi Kristi. 11 Ŋgɔŋ ne miŋ mine wa atei yi igɛn amin. 12 Iwaŋ ndi ate lɛk tu maa ne shu atei gliu azime, fe iwaŋ ndi ate gli tu maa azime atei lɛgu agli kɔmɔ ne shu.

13 Zhin zhɔk atu amin, abɛ tsar lɛ kɛ atɔra bǝn Ferisawa, izhin aba abɛ kamgli! Zhin ku anɔkɔŋ akɛ ikɔb kǝ gbarshu ne ti kɛ neshir. Izhineba menyi ba zhin ne yir baa, ba zhin ne duŋ anuŋ ayir ba. 14 Me ja zhin atɔŋ, abɛ tsar lɛ kɛ atɔra bǝn Ferisawa, ner amimin izhin li kiki ye abaŋ ndi alulum amen ne ku, izhin baŋ mkpaŋ te ben Arik te ijin bɛ cɔk aneshir te bɛ nek zhin iyah ŋgɔŋ.

15 <<Zhin zhɔk atu amin, abɛ tsar lɛ kɛ atɔra ben Ferisawa, abɛ kamgli! Izhin gar amkpa lǝlɛ te glɔ nek te wɔb zhin neshir zhiin ndi izhin te yigu, fe izhin duŋu ayi zhin, amkpaŋ ayaa ndi vǝvǝn ne yir lu ndi izhineba.

16 Zhin zhɔk atu amin, abɛ gli aneshir abɛ amfik ndi aye abɛ amfik! Izhin di, <Inuŋ waŋ ndi ate sherim ne akabakɔŋ, bai kinuŋ ba; ama waŋ ndi ate sherim ne zineriya ikɛ iki akabakɔŋ ne yi kisha.> 17 Izhin abɛ amfik te yi ki sha! Itayi naŋ: zinariya, ka iyi akabakɔŋ ne yi tsetser waŋ ndi ne naŋ zineriya mai? 18 Izhin na di, <Waŋ ndi ate sherim ne amkpa ne tsik baŋ, iyi ki sha; iwaŋ ndi te sherim ne kiyiŋ ndi yi nek ne amkpa ne tsik baŋ arim ama tei vuŋu. 19 Izhin aner abɛ mfǝk! Itayi iyi ŋgɔŋ: iki yi nek, kɔ kai amkpa ne tsik baŋ awa yi tsetser ni? 20 Ndi amɛ, waŋ ndi ate sherim ne amkpa ne tsik baŋ ne sherim ne kɛ bǝn kiyiŋ ndi iyi ne amkpama. 21 Waŋ ndi te sherim ne akabakɔŋ ne sherime ne kɛ ben waŋ ndi a sɔŋ ne amkpama. 22 Waŋ ndi te sherim ne gbarshu ne sherim ne mben yi sɔŋ Arik bǝn waŋ ndi akɔ sɔŋɔ neyi me.

23 <<Zhin zhɔk atu amin, abɛ tsar lɛ kɛ atɔra bǝn Ferisawa, izhin abɛ kamgli! Izhin nek ne miŋ kɛ wur yi kiki yi lɔn bǝn kuŋkun, kumin, ama izhin kyak kiyiŋ ndi iyi rɛ ngɔŋ ne lɛ kɛ atɔra rik lɛ didik, lɔ susun bǝn na didik, bǝn tanyɛmɛ. Ki yi goŋ, iyaŋ kyak iyi kukub. 24 Izhineba abɛ amfik! Izhin kyak mgbugbuk te mli lakurmi.

25 <<Zhin zhɔk atu amin, abɛ tsar lɛ kɛ atɔra bǝn Ferisawa, izhin aner abɛ kamgli! Izhin ŋla goŋ abɛm kɛ akparantse bǝn ki zhɔk te duŋ kǝ yi tsetser, te duŋ imiŋe ne rik. 26 Ferisawa abɛ amfik! Izhin bǝ kuti ŋla imiŋ antse bǝn agbǝgba, te shi ŋla gɔŋ abɛm tǝ bɛ yi tsetser.

27 <<Zhin zhɔk atu amin, abɛ tsar lɛ kɛ atɔra bǝn Ferisawa, aner abɛ kamgli te na zumimin! Izhin yi ndi abɛ ndi ba yi ne kinuŋ ne miŋe ba. Ayik re maa ne bɛm ama imiŋ maa akuku akum aner abɛ ku ne shaga bǝn kiki iyi rik. 28 Ne mee, ne abɛm zhin yi tsetser ne mimin kiki mimin ne shaga te kamgli bǝn abɛ na zumimin.

29 <<Zhin zhɔk atu amin, abɛ tsar lɛ kɛ atɔra bǝn Ferisawa, izhin abɛ kamgli! Izhin abɛ bla lɛ kɛ Arik te duŋ amɛ abɛ bla shar yi Arik ayi tsetser te nai iki didik. 30 Fe izhin di, <Abɛ ndi ta ne yime ne mkpaŋ kɛ atsintsim amɔr, ba tei bǝ yi ne min kɛ tsik abɛ bla shar yi Arik ashur azhizhi te ŋlɔk.> 31 Fena izhin ne tanyɛmɛ te di izhin yi alɛla aye abaŋ ndi ne ŋlɔk abɛ bla shar yi Arik. 32 Zǝ zhine ba, fe, itsar zumimin ye atsintsime amin ne na!

33 <<Izhin ane wa! Abɛ yi ne tus! Izhin tei na kikin te ayaŋ te zhin ambuk te yaŋ yir kɔb lu? 34 Ndi amɛ me shar zhin abɛ bla shar yi Arik bǝn mgbemgbebɛ aner ben abɛ tsar. Anuŋ izhin tei ŋun ba te na kpaŋ ba ne tu kuŋkun kǝ gen; anuŋ atei tsik ba ne asesa ne akaba te yar ba rumɔ ne ntuntun. 35 Ankyak izhin tei nyɛ bɔbɔk abɛ yi azhizhi tsetser abaŋ ndi ne ŋlɔk ba ne gɔnmimi, vuŋ rɛ azhizhi tsetser aye Abila nyak a you Zakariya izu Berikiya, waŋ ndi ane ŋunu ne akabakɔŋ ne tu amkpa ne tsik baŋ. 36 Mbla zhin izub, iki yiŋɛ bɔbɔk itei nyɛ ne tu kab kɛ azizaŋa.

37 <<Urshelima, Urshelima, izhineba ndi izhin ne ŋlɔk abɛ bla shar yi Arik te na tyak abaŋ ndi ne shar ba bene bɛ zhin ne mkpaŋ, mkpaŋ nuŋ mne ntǝ tǝm biŋ zhin amumun amkpa azhiin ndi mun kukɔ, izhin ne kyak. 38 Te, akɔb amin ne duŋǝ ayi akɔ. 39 Tǝm bla zhin, ba zhin tei na yik me ba se izhin ne di, <Anu adidik aye bǝn waŋ ndi ne nyɛ ne sak kɛ Ŋgɔŋ.>>>