1 Nǝ mkpaŋ yuŋɔ ikɔb kǝ gbarshu itei yi ndi asun aŋɔ awur ndi ne baŋ iki yi laŋlu men te gar mla bǝn vǝnenzak ne tei ta wa yayas. 2 Atuŋ ne miŋ mǝne neyi bliblik atuŋ neyi mgbemgbebɛ. 3 Abliblik ne vu iki yi laŋlu men yaŋ anyɛ ne miŋǝ. 4 Atuŋ abɛ mgbemgbebɛ, aba ne vu iki yi laŋlu men bǝn anyɛ ne miŋ mpempem abiŋ bǝn kiki yi laŋlu mǝne. 5 Ivenenzak ne tei ta wa ma bane anyɛ andanda ba, teduŋ ba ne kurna.

6 <<Ne atsutsu bu ne wɔ te ahwa: <Tɔ zhin Ivenenzak ayou wa yayas waŋ anyɛ! Ru zhin te mla ben abɔu! 7 <<Amɛ asun aŋɔ mɔ ne akam asi te akɔ sak lu ne iki yi laŋlu mǝne. 8 Abliblik aŋɔ adi abɛ mgbemgbebɛ, <<Dik zhin ta anyɛ min; te iki yi laŋlu mɔrɔ rim>>

9 Adi, <<Ta kyak,> anyɛ me batei mla ta ben zhin ba. Gar zhin ben abɛ lɛb anyɛ te lɛb zhin amin.>

10 <<Ndi ayi ne ankɔŋ ane gar lɛb anyɛ me, Ivenenzak nga akɔ ayir. Asun amunamba mgbemgbeb abaŋa ne yir kɔb gyaŋa ndɔ ben Ivenenzak nga. Ankyak ne tur ankɔŋɔ aku.

11 Nki amunamba ma ne anyɛ. <Ŋgɔŋ amɔr! Ŋgɔŋ amɔr!> Te di, <Bu ta ankɔŋ!>

12 <<Ankyak adi ba, <Mbla zhin izub, bam nǝ nzhi zhin ba.>

13 Amɛ shur zhin ayi, te ba zhin ne zhi bǝne kɔ mkpaŋa ba.

14 Itei, nak nayi ndi ner ndi atei gar tsǝn, ne azho agene maa te agab ba adudunki ama. 15 Ne nek kote ŋowa azɔb irkǝ mgbyamgbyaŋ maa: ne kuti ne nuŋu azhin atuŋ, te na nek nuŋ azhin ayaa, te na nek nuŋ azhin azhiin. Fe ta gar tsǝn ma. 16 Waŋ ndi ne ta azhin atuŋ aru andanda te kɔte kam aŋɔk ne azɔbɔ har azɔb azhin atuŋ ne na yuŋ tu mɔ. 17 Waŋ ndi ne anak ana ta azhin aya ne nak ana yuŋ tu mɔ. 18 Fe waŋ ndi ne ta azhin ne kɔmɔ shaan, te gar ai ka dudu ne mimi te asu azɔb ayi atukɔ ama ayir.

19 Ndi ne baŋ mkpaŋ atukɔ ayou agene ne kam aŋyak te zhɔ ba te abɛ nyɛ bla wa ki yiŋ ndi ne na ne azɔbɔ. 20 Ner waŋ ndi ne ta azɔb azhin atuŋ ma ne agli azhin atuŋ agli anyɛ me ne tu mɔ. Adi, <Atukɔ,> <Une nǝm azɔb azhin atuŋ. Tɔ, mne yik azhin tuŋ ne tu mɔ.

21 <<Atukɔ ama ablau, <Une na ki didik, igen didik, ne na izub! Une na zub ne ki watsɔb; M tei nek kiki tetɛk ne aŋɔk ami. Nyɛ nyer bǝn atukɔ ami!>

22 <<Ner waŋ ndi ne ta azɔb azhin aya ne nyɛ maayi te di, <Atukɔ,> une nǝm azɔb amɛ ya tɔ mne yik aya ne tu mɔ.>

23 <<Atukɔ ama asagu ma, <Une na ki didik, igen didik ne na zub! Une nak na izub ne kiki watsɔb; M tei nek kiki tetɛk ne aŋɔk ami. Nyɛ nyer bǝn Atukɔ ami!>

24 Fe ner waŋ ndi ne ta azɔb zhin ne anyɛ te di, <Atukɔ, mne nak nzhi te uyi neshir ne klɛktu> user ne amkpa waŋ ndi bau ne tib kinuŋɔ ba te na biŋ ne amkpa ndi bau ne yi bǝbǝ ki me ba. 25 Tǝduŋ mne ntǝ sisik te ngar ru azɔb mi ne mimi. Tɔ, iki mi yiŋ.>

26 Atukɔ ama adi, <<Uwa uyi igen mimin, ne ankɔtiŋ! Amɛ une zhi te di nga msɛr ne amkpa ndi bam ne ntibɛ ba te na vu ne amkpa ndi bam ne yi bǝbǝ mei? 27 Amɛ, ai ubɛ shur azɔb amuŋ nyak ne abɛ ne nyak azɔb, te duŋ mkpaŋ keŋ ndi mbǝ nyak mbǝ nyɛ nta kǝ ndɔ bǝn azɔb ayi sɔŋ ne tu mɔ.

28 <<Ta zhin azɔb azhin ma ne aŋɔk ama te kam kɛ nǝk waŋ ndi ayi nɛ azɔb azhin awur ma. 29 Waŋ ndi te yi ne ki atei na nǝgu nuŋ, atei yime neyi tetɛk. Waŋ ndi bate yime neyi ba, ivǝtsob yiŋ ndi ayime neyi atei tei bene bɔu. 30 Tuk zhin igen mimin waŋa zhɔk ne abɛm, ne amkpa ane amatib bu, ndi atei zhin te ŋuu aŋin.>

31 <<Ndi Izu Neshir ate nyɛ ne laŋ zar ayi ma, bǝn bɔbɔk abɛ shar ayou Arik, atei zǝ asɔŋ ne mben yi ŋgɔŋ maa yi shu. 32 Aneshir bɔbɔk ne gɔnmimi atei biŋ ne ti ma, atei hria aneshir azhizhin ir keŋ ndi ne kyu a hria awanta are miŋ awuwu mɔ. 33 atei nyak awanta ma ne ŋɔk li ma te aŋyak awuwu mɔ ne ŋɔk mla ma.

34 <<Fe Itumɔ atei di abɛ gar kɛ ŋɔk li maa, <Nye zhin, zhin aba ndi tetɛɛ amuŋ ne nek zhin anu adidik; ta zhin ki yiŋ ndi yi min, kɔb Arik keŋ ndi ne na kɛ aŋyak zhin vuŋ rɛ mkpaŋ kɛ na gɔnmimi. 35 Tǝ kasa ne vuŋ me zhin ne nǝm kili nta li, ihre amashir ne vuŋ me zhin ne nǝm Amashir nta so, Mne yi cen izhin ne tam ne akɔbɔ amin, 36 Mne yaŋ ki yi su zhin ne nǝm ki yi su, Ikpa ne lɔm zhin ne nyɛ tek mǝ, mne yine jaru zhin ne nyɛ tɔm.>

37 <<Abɛ yi tsetser atei sagu ma, <Ŋgɔŋ, atenta tane yik kasa ne vuŋu te nǝgu ki li, kɔ yik hrie ne vuŋu te nǝgu amashir ta so? 38 Atenta ta ne yigu yi cen te tau zhɔk ne ki, kɔ uyaŋ kiki yi su te suu kɛ? 39 Atenta ta ne yigu kur lɔ kɔ ne jaru te gar tegu?>

40 <<Itumɔ atei di ba, <mbla zhin izub, kɔte ki yiŋ ndi zhin ne na zhin ne miŋ kɛ amunzumɔr amɔtsɔtsɔb abaŋa, zhin ne naa nga.>

41 Fe atei di abɛ yine ŋɔk mla ma, kam deme zhin bene bɛm, zhine baŋ ndi ne gbar zhin Arik, yir zhin miŋ ilu kǝ yaŋ klɛtu keŋ ndi ne na kɛ anyak shetan bǝn abɛ shar ayou Arik. 42 Tǝ kasa ne vuŋ me zhin ne ya kili zhim ma. Ihre amashir ne vuŋ me zhin ya amashir zhim ma. 43 Mne yi cen zhin kyak zhɔm gli yire, mne yaŋ kiki yi su zhin ne kyak nǝm ki me, Mne nkur lɔ te na nkur ne jaru zhin ne kyak nyɛ tek me ma.>

44 <<Aba menyi atei rib bu, <Ŋgɔŋ, atenta te tane yik ikasa ne vuŋu ka ihrie ne vuŋu kɔ uyi cen kɔ uyaŋ ki yi su kɔ ukur lɔ kɔ ukur ne jaru, te kyak lɔgu ma?>

45 <<Atei di ba, <Mbla zhin izub, ki yiŋ ndi zhin ne kyak na zhin ne miŋ kɛ amɔtsɔtsɔb abaŋa, zhin ne kyak nam ma.>

46 Fe atei kɔmɔ ne amkpa ane yik iya yaŋ klɛ tu fe abɛ yi tsetser atei yik ivli kǝ yaŋ klɛtu ndɔ ben Arik.