1 Ndi Yesɔ ne bla lǝlɛ yiŋɛ bɔbɔk, ne bla abɛ tsene maa te di, 2 <<Zhin ne men zhi, igyaŋ yi tuk glak ne dǝk bɛr ya, atei vuŋ Izu Neshir anǝk teduŋ abɛ kpaŋu ne nkunkun.>>

3 Amɛ ngɔŋ ne abɛ na ndum kǝ Arik bǝn anunkub abɛ aneshir ne tuŋ abiŋ ne amkpa ne sɔŋ ngɔŋ ne abɛ na ndum kǝ Arik, ndi azhɔu te Kayafa, 4 Ne kpa lɛ ndi aba atei vuŋ Yesɔ ne yaŋ zhi aneshir te aba abɛ tsǝgu aŋun. 5 <<Bata tei vuŋu ne mkpaŋ kɛ igyaŋ ba,>> adi, <<te kǝr mgbu bǝ lu zhaku ba.>>

6 Ndi Yesɔ ne yine Batanya ne kɔb kɛ Siman ndi azhɔu te ne lɔ amgbyak, 7 uwa nuŋ ne nyɛ bǝn abɔu te gli anye albasta ane yegbo didik ane te anyaŋ, te tsǝu ashuru ne tu ne mkpaŋ keŋ ndi ne sɔŋ ali kili.

8 Ndi abɛ tsene maa ne yik amɛ, ne baŋ afuk. Te rib te di, <<Ayi anii te iwa ma acɔk wurdi waŋa ala ir kǝŋe?>> 9 Anyɛ waŋ ndi abɛ baŋu alɛb ne zɔb tetɛk te nek abɛ iyah neyi.>> 10 Ndi Yesɔ ne zhi ki ndi azǝnǝ dime, adi ba, Anii dam zhin ben wa waŋa? Ne nam ki didik. 11 Zhin nak yi ndɔ bǝn abɛ ya atei nga bam yi bǝn zhin atutuk ba. 12 Ndi a nuk me anye waŋa ne kpa, ayi ndi ne zhi te iku muŋ ne te gbahir. 13 Mbla zhin izub, amkpa waŋ ndi ate du ilɛ didik kǝŋe kab ne gɔnmimi, atei lǝlɛ kɛ iki yiŋ ndi wa waŋa ne nai, te abɛ bene ashuu azhi.>>

14 Ankyak zhin ne miŋ kɛ awur ane ya abɛ zeu tsǝne waŋ ndi azhɔu te Yahuda Iskariyɔti ne gar bǝn ngɔŋ ne abɛ na ndum kǝ Arik 15 te rib, <<izhin tei nǝm anii tem vuŋu nek zhin?>> Fe akɔ abla azɔb sɔk tar anugu. 16 Nak baŋ rɛ mkpaŋ yuŋɔ Yahuda ne vuŋ wɔb ankɔŋ ane vuŋ Yesɔ nek ba.

17 Nǝ bɛr yi zhin yi igyaŋ yi li kili yi yaŋ sa, abɛ tsene maa anyɛ ben Yesɔ te rib bu, <<Usɔ ta bǝ na kili yi igyaŋ yi tuk glak nyak neme?>>

18 Asak bama, <<kɔmɔ zhin ne miŋ ntun bǝn ner nuŋ waŋa te bla zhin newu, <Ine tsar adi: Mkpaŋ keŋ ndi ne nyak me kɛ ne te gbahir M tei na igyaŋ yi tuk glak bǝn abɛ tsene maa ne kɔmi.>>> 19 Fe abɛ tsene maa ne na kiyiŋ ndi Yesɔ ne di aba neka na kili yi igyaŋ yi tuk glak nga.

20 Ndi amgbalu ne te, Yesɔ ne zǝ sɔŋ ndɔ ben awur ane ya ma. 21 Ndi kab mǝne azǝn li kili, a diba, Mbla zhin izub, izhiin ne miŋ mine atei baŋ me alɛb.

22 Asusun amene ne cɔk ala tetɛk akɔ adiu azhizhin Ŋgɔŋ, ayi ngai?

23 Yesɔ adi, <<waŋ ndi ta sɔŋ li agbǝgba zhin wa atei baŋ me lɛb. 24 Izu neshir atei kɔmɔ ir keŋ ndi ne cɛr ne atu ma. Abɛ kpa kpa ayaa klikli aŋub waŋ ndi ai vuŋ Izu Neshir alɛb! Iya ngɔŋ itei vuŋ neshir waŋa. Nǝ rɛ ndi bai bɛ ŋliu ba.

25 Fe Yahuda, waŋ ndi atei baŋu alɛbɛ, adi, <<Ne tsar, kɔ ayi nga ini?>>

Yesɔ adiu, <<Anak ayi wa>>

26 Ndi asɔŋ azǝn li kili, Yesɔ abaŋ mbwab borodi, te nyer Arik te amlik kɛ, te agab abɛ tsene maa, te di, <<Ta zhin te ta; waŋa ayi kpa muŋ.>>

27 Fe abaŋ antse me, te nyɛr Arik te gab ba, te di <<So zhin akɛ, bɔbɔk mine. 28 Waŋa ayi azhizhi amuŋ ane kpa lɛ nyak, ndi ne avara hrie te abɛ zuk aneshir tetɛk azhɔk ne zumimin men. 29 Mbla zhin, bam tei na so ama dɔ nkunkun yiŋɛ ba vuŋ rɛ azizaŋ se bɛr yiŋ ndi M tei so kɛ yayas ben zhin ne ikɔb Tetɛɛ amuŋ.>>

30 Ndi ne duk asem, ne ru akɔmɔ ne gbu yi zetun.

31 Ankyak Yesɔ ne bla ba, <<Ne buu yiŋɛ izhin tei klu te duŋ me bɔbɔk mine, te neka cɛr aŋyak:

<<<M tei ŋur ne kyu,

Awanta ma atei ŋar.>

32 Amɛ ndi Mte nkamlu, M tei ku zhin ti te ngar Galili.>>

33 Biturus adi, <<kɔ te yi ndi bɔbɔk atei klu te duŋu, nga bam tei nklu te nduŋu ba.>>

34 <<Mbla zhin izub,>> Yesɔ adiu, <<Nǝ buu yiŋɛ, utei tun zhim amkpaŋ atar teduŋ agbak abɛ shi tuk.>>

35 Biturus akyak te di, <<kɔ te yi ndi M tei nku, bam tei ntun zhiu ba.>> Bɔbɔk men abɛ tsene maa anak ana bla ki zhin yiŋɛ.

36 Fe Yesɔ ne ru ndɔ ben abɛ tsene maa gar amkpa waŋ ndi azhɔu te Getsemani, adi ba, <<Zisɔŋ zhin ayaŋ teduŋ mgar amɔ te kɔte mben Arik.>> 37 Ne Gli Biturus ben amun Zebɛdi me ya bene bɔu, susun ma ku zen cɔk la te zen lɛnu tetɛk. 38 Fe adi ba, <<Susun muŋ len mǝ ndi mtei nku. Kli zhin ayaŋ te bǝn shur zhin ayi ndɔ bǝn abɛm.>>

39 Ndi ne yine tib akɔmɔ watsɔb, ne zhaku akuti ne mimi te ben Arik, te di, <<Tetɛɛ amuŋ, te yi ndi itei te, baŋ vǝn kuca yiŋɛ tibɛ bene bɛm ma. Ne mee ba yik muŋ ba, bɛ yi yik mi.

40 Fe ne kam agar bǝn abɛ tsene maa te yik ba akɔ kur na. <<Ba zhin tak na shur ayi ndɔ bǝn abɛm kai mkpaŋ zhin ka?>> Arib Biturus. 41 Sɔŋ zhin atsitsir te ben zhin Arik te kǝr zhin bǝ zhaku ne iki yi tik yi ba. Izhu ne tanyɛmɛ, ikpa maa kɛ kyak.>>

42 Ne kam agar amkpa ma mkpaŋ kɛ ya te kɔte ben Arik, Tetɛɛ amuŋ, te yi ndi bai te ubǝ baŋ vǝn kuca yiŋɛ gli tib ma te se mne nsɔi, duŋǝ bɛ yi ndi wa une yik.>>

43 Ndi ne kama nyak, ne na nyɛ yik ba kukurna, ayi me ne aluk. 44 Fe ne na duŋ ba te na kam agar amkpa ne ben Arik mkpaŋ kɛ ntar, te na bla ki zhin yiŋɛ.

45 Fe a kam aŋyak ben abɛ tsene maa te di ba, Zhin nak ri kukur na izhin kur sige? Tɔ zhin, mkpaŋa neka te gbahir, atei vuŋ Izu Neshir alɛb ne aŋɔk abe na zumimin. 46 Lu zhin, ta bɛ kɔmɔ! Tɔ ner ne baŋ me lɛbɛ waŋ!>>

47 Ndi ne yine miŋ kǝ lɛ, Yahuda ndi ayi ne miŋ kɛ abɛ tsene maa awur ane yaa ma, azǝ ayir. Ntsan aneshir azeu te gli nzinzi gba bǝn amkpɔk angub, abaŋ ndi ngɔŋ ne abɛ na ndum kǝ Arik bǝn anunkub aneshir ne shar ba. 48 Ne baŋ Yesɔ lɛb ne men atsar ba ngir kǝ vuŋu ma: <<Waŋ ndi tate rim akpa nuŋ ayi neshire wa.>> 49 Yahuda anyɛ bǝn Yesɔ, <<Mtegu Ne tsar!>> Tǝ akɔ rim Yesɔ avuŋ.

50 Yesɔ adiu, <<kpamuŋ, Na kiyiŋ ndi ne Gli zhin nyɛmɛ.>> Ankyak aneshire anyɛ te vuŋ Yesɔ. 51 Ne me, zhin ne abɛ zǝ Yesɔ akɔ tun anzigba ma, te tsem igen ayou ngɔŋ ne abɛ na ndum kǝ Arik ne tɔŋ akyaŋ.

52 <<Su anzigba ami ne yɛnɛ,>> Yesɔ adiu, <<te bɔbɔk abaŋ ndi atun anzi atei ku ne anzi. 53 Zhin yik, te di bam tei ya ben Tetɛɛ amuŋ, te azizaŋ atei shar abɛ shar maa naŋ tek wur na yaa? 54 Amɛ atei na kikin te duŋ ilɛ kǝ ne bla shar ayou Arik kǝŋe ibǝ shaga?>>

55 Nǝ mkpaŋa Yesɔ adi aner tetɛk ge, me yi ngɔŋ abɛ zhib, te zhin ru te nyɛ ne nzizi bǝn angub te nyɛ vuŋ me? kɔte bar tayi me sɔŋ ne akabakɔŋ te tsar lɛ kɛ Arik, bɛ zhin ne vuŋ me ba. 56 Amɛ kiyiŋɛ nena ta ilɛ kǝ ine bla shar yi Arik bɛ shaga. Fe abɛ tsene maa bɔbɔk men akyagu te klɔ ŋar.

57 Abaŋ di ne yen Yesɔ mɔ ashɛu abaŋ te gar bǝn kayafa ngɔŋ ne abɛ na ndum kǝ Arik nɛ amkpa awaŋ ndi abɛ tsar lɛ kɛ Arik bǝn anunkub abiŋɛ. 58 Ankyak Biturus a zeu gbagbaŋ ne miŋ amkpa ne sɔŋ ngɔŋ ne abɛ na ndum kǝ Arik. Ne yir te zǝ sɔŋ bǝn abɛ bla te tɔ kiyiŋ ndi ate na.

59 Ngɔŋ ne abɛ na ndum kǝ Arik bǝn abɛ te ambuk awɔb kiki yi mu netu kɛ Yesɔ te aba bɛ tsǝgu aŋun. 60 Ankyak bane yik kinuŋ ne atu maa ba neme lǝlɛ yi mu ne lɛ ne atu maa. Ne klɛtu abɛ bla amɛ yaa ne ru akɔmɔ. 61 Te di <<Ner waŋ adi, M tei ya zǝr Akabakɔŋ ye Arik te meu ne bɛr tar.>>

62 Fe ngɔŋ ne abɛ na ndum kǝ Arik lu te di Yesɔ, <<Bau tei bla ka? Le kǝŋ di aner abaŋa bla kɛ ne tɔ mi yi kikin?>> 63 Ankyak Yesɔ bane bu anu te di kinuŋ ba.

Ngɔŋ ne abɛ na ndum kǝ Arik adiu, <<Mne biŋu bǝn Arik tsitsir: blam wau yi Almasihu, izu Arik.>>

64 <<Amɛ, une ka bla me,>> Yesɔ di. <<Amɛ me bla zhin bɔbɔk min: Vuŋ rɛ zizaŋ te kɔ ti zhin tei yik Izu neshir akɔ sɔŋ ne ŋɔk li kɛ Ŋgɔŋ ne mgbyamgbyaŋ te anye ne amkpa ne gbarshu.>>

65 Ngɔŋ ne abɛ na ndum kǝ Arik a gbu anklu amaa aŋa te di, <<Ayen Arik! <<Tei na wɔb iki nuŋ nɛ atu maa! 66 Zhin ne yik kikin?>>

<<Ne mla ne ku,>> Adiu.

67 Fe aser ante shuru ne ti, te na yiu ne za. Anuŋ ŋuru ne la ŋɔk 68 Te di, bla ta ki te na ni ti, Almasihu, ayi ŋɔwa ne ŋɔru?>>

69 Ndi Biturus ne kɔ sɔŋ ne amkpa ne sɔŋ ngɔŋ ne abɛ na ndum kǝ Arik igen venwa anyɛ bene bɔu te di, <<Wa mi yi uyi bǝn Yesɔ ndi awɔ ne Galili,>> A di.

70 Ankyak Biturus adi ba bam ne zhi lɛ keŋ ndi izhin lɛ kɛ ba,>> A di.

71 Fe aru te gar anɔkɔŋ, ne mwɔ gen vǝn wa nuŋ ne yigu te bla aneshir abaŋ ndi aklɛ kli ne kpama, <<Ner waŋa ne yi bǝn Yesɔ awɔ nǝ Nazara.>>

72 Ne na kyak lɛ me, te sherim: <<Bam ne zhi ner waŋ ba!>>

73 Ne kpaŋ vǝtsɔb abaŋ ndi ake kli amɔ aye bǝn Biturus te diu, <<Lɛ didik uyi ne min mǝne, Ilɛ mi ne gliu Gli rumɔ.>>

74 Fe akɔ zhɔ tu maa iki mimin, te she arim ne ti men, <<Bam ne zhi ner waŋ ba!>>

Ne amkpamkpama agbak akɔ atuk. 75 Fe Biturus a shu azhi lɛ kǝŋ di Yesɔ ne bla te di: <<Agbak bate tuk ba, utei tsar yaŋ zhim amkpaŋ atar tɛ agbak abe shɛ tuk.>> Ankyak aru abɛm te zhin mgbɔmgbɔŋ.