1 Yesɔ ne duŋ akabakɔŋ te sɔŋ akɔmɔ ndi abɛ tsene maa anyɛ bene bɔu te tsa ru imɛ akɔb. 2 <<Izhin yik kiki yiŋɛ bɔbɔk?>> Arib. <<Mbla zhin izub, mkpaŋ nuŋ ayaŋa batei sɔŋ ne tu ye nuŋ ba; atei zire atyak ahrie.>>

3 Ndi Yesɔ ne kɔ sɔŋ ne Gbu yi Zetun, abɛ tsene maa ne nyɛ bene bɔu ne kɔnsa. Te di, <<Bla ta,>> <<kiki yiŋɛ tei na atenta, fe anii tei yi ngir kɛ nyɛ mi ben mkpaŋ kɛ klɛtu yi gɔnmimi?>>

4 Yesɔ adi ba: Shur zhin ayi kǝr zhin bɛ duŋ nuŋ a cɔk zhin ba. 5 A ner tetɛk atei nyɛ ne sak muŋ, te di, <me ye Kristi,> atei cɔk aneshir tetɛk. 6 Izhin te wɔ lǝlɛ yi te kum ben mbumbur lǝlɛ yi te kum, amɛ kǝr zhin bɛ te sisik ba. Ikiki yiŋɛ itei na, fe iklɛ tu goŋ mimi bane zen nyɛ ba. 7 Ntun ngɔŋ tei wɔb tun ŋgɔŋ ne mgbu, aŋaa atei wɔb aŋaa nuŋ ne mgbu. Izhɔŋ tei te, mimi tei na zhaŋ ne mkpǝmkpa tetɛk. 8 Ikiki yiŋɛ bɔbɔk iyi ndi kuti yik iyah iyi ŋli. 9 <<Amɛ aneshir atei nek zhin iya tena ŋlɔk zhin, atei na kyak zhin ne goŋ mimi bɔbɔk ne lɛ kɛ sak muŋ. 10 Ne mkpaŋ yuŋɔ aneshir tetɛk atei kam goŋ anǝk ita nyɛmɛ men te baŋ anuŋ alɛb te kyak akpa yi, 11 Abɛ shar abɛ Arik abɛ timu atei mwaŋ aru te cɔk aneshir tetɛk. 12 Ndi zumimin tei ŋar shak abɛm, te duŋ nyer akpa itei sik, 13 Uwaŋ ndi te tsi klɛ mgbamgbaŋ gar klɛ tu iwa atei yik ta zhɔk. 14 Atei nak du iLɛ didik kɛ kɔb Arik kǝŋe azǝ gɔnmimi bɔbɔk teduŋ aneshir abɛ wɔ kɛ aŋar, fe klɛ tu yi gɔnmimi ishi nyɛ.

15 <<Fena izhin te yik ner mimin ndi aklɛ ne Akabakɔŋ <Ane tsetser iki mimin yi la lɛ,> Ndi Daniel ine bla shar yi Arik ne lɛ duŋ nnɛ tɔ abɛ vuŋ agli 16 Amɛ abaŋ ndi ayi ne Yahudiya abɛ klu akɔmɔ te yuŋ gbu. 17 Waŋ ndi ne tu ki kǝr abɛ di iwa atei kama te baŋ kinuŋ ne kɔb maa ba. 18 Kǝr nuŋ ndi te dɔ na ndum ne ahwaŋ abɛ di wa kam agar baŋ anklu ne kɔb ba. 19 Atei yi mkpaŋ mimin bǝn amba abɛ ŋli bǝn abɛ nek amumun yak. 20 Ben zhin Arik te klu mine kǝr bǝ yi ne kus bǝn bɛr yi sɔŋ sik ba. 21 Amɛ atei yik iyah ne gɔnmimi tetɛk, yiŋ ndi bane zǝn yigǝ ba ivuŋ rɛ kuti gar nyak mkpaŋ kǝŋe. 22 Ama Arik ne ka gyak berɛ ate watsɔb ba, abe di bane na ame ba, inuŋ bai bɛ yik ta zhɔk ba. fe aye tu ayi aneshir abe yi nǝ kpa abaŋ ndi ne hria ba, neme, Arik abe gyak ibɛre te watsɔb. 23 Ne mkpaŋ yuŋɔ nuŋ ate di zhin <Tɔ, Kristi yuŋ!> kɔ, <Tɔ yuŋ amɔ!> Duŋ tanyɛmɛ zhin ba. 24 Abɛ timu te di aba yi Kristi abɛ timu atei mun aru; atei na ikiki ngɔngɔn yi vun anu te aba abe lɔm aneshir abaŋ ndi Arik ne hria ba, ndi atei ya nama. 25 Tɔ, mne nak mblazhin rɛ kukub.

26 <<Fe nuŋ ate di zhin, <Tɔ yuŋ, ne zizik,> kǝr zhin bǝ ru ba; kɔ, <Tɔ waŋ, ne miŋ ki,> kǝr zhin bǝ tanyɛmɛ ba. 27 Ndi laŋ lu ra nas ndi ayikɛ rɛ ti kɛ anzaŋ te yir ti amgbalu, amɛ nyɛ yi Izu Neshir tei yime. 28 Amkpa waŋ ndi akum ate yime, amɔ wa amkpuk go angulu abiŋe.

29 <<Andanda ndi iya ngɔŋ yuŋɔ te gar gayir

<<<Arik ba tena laŋ ba,

Ihwa ba tei na laŋ ba;

Ncinces tei hrie rɛ gbarshu,

Ikiki yi kɔr ne shu tei jaŋ.>

30 <<Fe ne mkpaŋa atei yik ngir kɛ nyɛ Izu Neshir te klɛ ne gbarshu, Aneshir atei munoru ne gbarshu, aneshir abɛ gɔnmimi bɔbɔk atei zhin ndi ate yik Izu neshir asɔŋ anyɛ ne akpa yi shu, ne mgbyamgbyaŋ mben maa. 31 Ankyak atei shar abɛ shar ayou Arik atei vli mpluŋ ne kɔr ŋgɔŋ, atei, duŋ abaŋ ndi ne hria ba abiŋ arɛ agara anas vuŋre kɔtɔŋ kɛ gbarshu te kɔmɔ ne kɔtɔŋ nuŋ.

32 <<Amɛ duŋ zhin tiŋ nglǝnglǝ tsar zhin nkanlɛ. Izhin te yik amgbavu amaa are te zu, zhin bɛ zhi te kus ne te gbahir. 33 Ne me, ndi zhin te yik kiki yiŋɛ bɔbɔk, zhin te ayi gbahir, ayi ne ankɔŋ. 34 Mbla zhin izub, ikab kǝŋe batei gayir ba kiki yiŋɛ tei na. 35 Gbarshu bǝn gɔnmimi tei gar gayir, lɛ muŋ ba te gayir ba.

36 <<Ba waŋ ndi ne zhi bɛr yuŋɔ kɔ mkpaŋa, kɔ abɛ shar ayou Arik ne gbarshu ma, kɔ Izu maa ma, ama Tetɛɛ wa kiki ma ne zhi. 37 Inyɛ Izu neshir, tei yi ndi bɛr yi Nuhu. 38 Nǝ mkpaŋ yuŋɔ ndi alu ba ne zǝne ku ba, aneshir ne zen li te so, ta amba te na zǝk amba, gar yir mkpaŋ ndi Nuhu ne yir gu; 39 Be ne zhi kinuŋ ndi tei nyɛ ba kɔte yir mkpaŋ ndi anca ne nyɛ vu ba agli adɔmɔ bɔbɔk. Waŋ ayi ir keŋ ndi nyɛ yi Izu Neshir tei yime. 40 Aner aya ate kɔ dɔ ne ahwaŋ; atei baŋ zhin te duŋ zhin. 41 Amba aya atei dɔ zen kɔk ne nena atei baŋ zhin te duŋ zhin.

42 <<Amɛ zhin bǝ sɔŋ te shur zhin ayi, te ba zhin ne zhi te ayi bɛr tayi Ŋgɔŋ amine atei nyɛ ba. 43 Izhin bǝ zhi te di: Abɛ di ataki ne kɔb ne zhi mkpaŋ kɛ bu tayi ner ne zhib atei nyɛ, abɛ asɔŋ ablɛ kɔbɔ ndi ba nuŋ atei zhi bu iyi zhib ba. 44 zhineba min yi nak sɔŋ zhin atsitsir, te Izu neshir atei nyɛ ne mkpaŋ keŋ ndi ba zhin ne zhi ba.

45 <<Ayi ŋɔwa ayi ne na izub te ana yi mgbemgbebɛ igen, waŋ ndi atukɔ ama ane anyagu tɔ nki agɛnɛ te abɛ bǝn anǝk ba kili ne mkpaŋ kɛ li kili anenen? 46 Anu didik ayi bǝn igen waŋ ndi atukɔ maa ate nyak te anyɛ yigu azǝn na ki yiŋ ndi ne diu abɛ na. 47 Mbla zhin izub lɛ, atei baŋ adudunki amaa asagu ne aŋɔk bɔbɔk. 48 Tǝ abɛ di igene ayi ne susun mimin te asɔŋ adi tu maa, <Atukɔ amuŋ ayi gbagbaŋ ba tei nyak andanda ba,> 49 Te akɔ tsik anki agene te akɔ yir li te so ben abɛ so ki rǝrǝ. 50 Atukɔ ayou igene atei nyak ne bɛr yiŋ ndi bane di atei nyak ba, ne mkpaŋ keŋ ndi bane zhi atei nyak ba. 51 Atei mligu tsik te turu azhɔk bǝn abɛ kamgli, amɔ atei zhin te ŋuu aŋin.