1 <<Te zhin bwe te kǝr <iki yi na didik min> ne ti aneshir, te bǝ yige. Izhin te na mee, ba zhin tei yik kinuŋ bǝn Tetɛɛ min nǝ gbarshu.

2 <<Neme, utǝ nek nuŋ ki, duŋ vli nju ba ndi amɛ abɛ na yik ayi ana ne ki kɛ bla lɛ kɛ Arik ne akabakɔŋ bǝn kuŋkɔŋ te aneshir abɛ gbar ba asak, mbla zhin izub, ne ka ta dǝk men. 3 atei ndi utei nek ne iya kinuŋ, kǝr ubɛ duŋ ŋɔk mlaa mi bǝ zhi iki yi ndi ŋɔk li mi na ba, 4 te iki nǝk mi bi yi kuŋkum. Fena Tetɛɛ mi, waŋ ndi ayik ki na mɔr bɔbɔk, Ai ka nǝgu idǝk mi.

(Luka 11:2-4)

5 <<Ate yi ndi izhin tei ben Arik, duŋ nazhin ndi abɛ kamgli ana, abɛ nyer klɛ adidik te ben Arik ne Akabakɔŋ te aneshir abɛ yik ba, Mbla zhin izub neka ta dǝk men. 6 Teyi ndi utei ben Arik, yir ki, te ku ankɔŋ te ben Tetɛɛ mi, waŋ ndi ba yigu ba. Fe Tetɛɛ mi, waŋ ndi ayik kiki yiŋ ndi anayi kuŋkum, ayi wa atei nǝgu dǝk mi. 7 Ate yi ndi izhin ku ayi, te ben Arik, duŋ bla tena bla lɛ zhin ba ndi abɛ yaŋ zhi Arik, iyik men atei wɔ ba ne bla te na bla ki zhin te duŋ Arik awɔ ba. 8 Duŋ nazhin ndi naa mǝne ba, te Tetɛɛ min ne shum ne zhi iki ndi izhin wɔb te rib bu.

9 <<Waŋai, yir kǝŋ ndi izhin tei benu:

<<<Tetɛɛ mɔr ne gbarshu,

Isak mi bǝyi tsetser,

10 Ngɔŋ mi bǝ nyɛ,

Iki yiŋ ndi une tanyɛmɛ neyi abɛ nai

Nǝ gɔnmimi ndi iyi ne gbarshu.

11 Nǝk ta kili ye aliŋ.

12 Zuk ta zhɔk ne na zumimin mɔr,

Ndi ta zuk abɛ la ta lɛ zhɔk.

13 Duŋ gli ta te gar iten ngɔŋ ka,

Ubǝ ta ta zhɔk ne ŋɔk kɛ shetan.>

14 Atei ndi izhin zuk abɛ la zhin lɛ zhɔk, Tetɛɛ min ne gbarshu atei na zuk zhin zhɔk. 15 Ate yi ndi izhin te kyak zuk abɛ la zhin lɛ zhɔk, Tetɛɛ min ne shu batei na zuk zhin zhɔk ne lalɛ min ba.

16 <<Izhin te kpa anu duŋ kpaa zhin ti, ndi abɛ kamgli ana, aba kpaati atsar aneshir tǝ bɛ zhi te ba kpa anu. Mbla zhin izub neka ta dǝk men. 17 Fena ate yi ndi kpa anu, ubǝ suu ti te kin anyɛ ne tu mi, 18 ndi aneshir ba tei zhi te ne kpa anu ba, Tetɛɛ min ne shu wa ankyak waŋ ndi ba yigu ba, Ayi Tetɛɛ, waŋ ndi ayik iki yi na kuŋkum; ndi bane zhi ba, ai nǝgu dǝk mi.

(Luka 12:33-34)

19 <<Duŋ nyak adudunki ne gɔnmimi ba ndi aden ben bla itei cɔkla, ndi abɛ zhib atei rus te zhib kime. 20 Izhin bǝ nyak adudunki ne gbarshu, ndi aden ben bla ba tei cɔkla, abɛ zhib ba rus tei yir te zhib ba. 21 Amkpawaŋ ndi adudunki ayime, amɔ susun mi yime.

22 <<Iyi kɛ yi pitila iyi kpa, ayi ami ate rɛ, ikpami tei nek laŋ 23 atei ndi ayi ami bate rɛ ba mkpuŋ kpa mi itei tǝ bu. Ate yi ndi ilaŋ amkpa ami ikam yi bu, ibu mi itei yi kikini!

24 <<Nuŋ ba tei na atukɔ ayaa igen ba. kɔ abɛ kyak zhin te nyer zhin, kɔ bǝ na zhin gen te duŋ zhin. Bau di uzǝ Arik tena kam ndi uzǝ iki yi gɔŋmimi ba.

25 Fena mbla azhin, duŋ di zhin lɛ ne ne sɔŋ min, ka anii izhin tei li tena sɔ; kiyiŋ ndi izhin tei su. Ivli min ba naŋ kili, kpa ba naŋ iki yi su kai? 26 Tɔ zhin aŋliŋlɔ abǝ shu; ba tib ba, ba sɛr ba, ba ashur ne wun ba, nemɛ Tetɛɛ ne gbarshu ayok ba. Ba zhin naŋ ba kai? 27 Ŋɔwa ne miŋ mine ne lɛ susun atei sɛr mkpaŋ kɛ vlimaa akɔmɔ ne tii?

28 <<Te izhin lɛ ne kɛ ni ne lɛ kɛ ki yiŋ ndi izhin tei su? Tɔ zhin awu ndi flu. Ba na ndum kɔ hwen ba. 29 Neme mbla zhin, itum Solɔmɔn ne adudunki amaa waŋ ndi ayi ne min kɛ wɔ men iduŋ maa bane duŋ ndi dɔ nkunkun ba. 30 Ate yi ndi Arik aduŋ agǝga aye zizik, ndi ayime aliŋ iber ŋan atuk ashur ne lu, bate nek zhin ki yi suu naŋǝ kai, Tǝ zhineba abɛ tanyɛmɛ watsɔb? 31 Ndi amɛ duŋ lɛ zhiin ne te di, <Aye ni ta tei li?> Aye ni ta tei sɔ?> Ka <Aye ni ta tei sui ne kpa?> 32 Abɛ yaŋ zǝ Arik Ŋgɔŋ agɔŋɔri te wɔb iki yiŋɛ, Tetɛɛ min ne gbarshu ne zhi te zhin wɔ bǝ. 33 Nǝ rɛ izhin bǝ wɔb kɔb Arik neliŋ, te na ki didik yiŋ ndi Arik ne tanyɛmɛ neyi fe ai nek zhin iki yi wɔb min bɔbɔk. 34 Ne mee kǝr zhin bǝ lɛ susun kɛ amblɛ ba, amblɛ ai ka gli ru maa. kɔ te bɛr tayi iyi ne iya maa.