1 Ferisawa anuŋ ben abɛ tsar atɔra ne nyɛ ben Yesɔ arɛ urshelima te arib, 2 <<Ayi anii duŋ abɛ tsene maa akyak zǝ taada ayɔu anunkub? Ba aŋla aŋɔk te shi ali ki li ba!>>

3 Fe Yesɔ asaga, <<Aye anii te zhineba min yime zǝ taada amin te tsi ilɛ kǝ Arik kluk?>> 4 Arik ne di, <Nek Tetɛɛ ben iyah mi ŋgɔŋ men> te <waŋ ndi a te yen Tetɛɛ ma kɔ ya ma atei ŋunu. 5 Izhineba di <<waŋ ndi ate di <Ki yiŋ ndi me ni ndi mǝ ntei ndigǝ nugu ma, M tei kame nek Arik> 6 Ba tei nek Tetɛɛ maa ne yi ba. Amɛ une kyak zǝ lɛ kɛ Arik ne atu ayi taada amin. 7 Izhin abɛ kamgli! Ishaya ne men abla anenen ndi ane bla lɛkǝ nyɛ ne atu amin:

8 <Anere abaŋa azǝm ne bɛrenu ankyak,

Asusun amene ayi gbagbaŋ ben abɛm.

9 Azekur me sha;

Itsar mǝne ayi lǝlɛ yi rɛ ben aneshir.>>>

10 Yesɔ ne zhɔ ntsan aneshire tedi, <<Wɔ zhin te na zhi zhin. 11 Bai ki yiŋ ndi iyir anu neshir iyi duŋ neshir <cɔk la ba,> ama ayi kɛ yiŋ ndi ru rɛ anu amaa, iyi duŋu <Ayi ne rik.>>>

12 Fe abɛ tsene maa anyɛ bǝn bau te blau te di une zhi Ferisawa a te mfu ndi ne wɔ lɛ mi?

13 A tanyɛmɛ te di, <<Iwu keŋ ndi Tetɛɛ bai ŋgɔŋ ne gbarshu wa ne shi kɛ ba atei tun kɛ ne ririŋ maa. 14 Duŋ ba; ba duŋ aneshir tɔ kɔ ne ti ba. Te yi ndi ner ne amfik wa gli ner ne amfik tsǝne, yaa mǝne atei zhaku ne dudu.>>

15 Biturus a di,<< Hria ta nkanlɛ yiŋɛ.>>

16 <<Ba zhin ne zen zhi ki bla muŋɔ kai?>> Yesɔ ne rib ba. 17 <<Ba zhin ne zhi te ki yiŋ ndi yir anu, igar miŋ te ru ne kpa maa kai? 18 Fe iki yiŋ ndi ne ruu rɛ anu ire susun, iyi duŋ neshir<cɔk la.> 19 Iki mimin iru rɛ susun, ŋun neshir, wɔb amba bǝn wɔb alulum, izhib, bla ki yiŋ ndi bau ne yige ba, bǝn ti mu. 20 Waŋa ki yiŋ ndi duŋ neshir< cɔk la>; Ili ki li yaŋ ŋla aŋɔk ba yi duŋɔ <ayi ne rik ba.>>>

21 Ndi ne duŋ amkpama, Yesɔ ne lu te kɔmɔ ne tun yi Taya ben Sidon. 22 I wanuŋ ne Kananiya vǝŋɔ ne ntuno anyɛ bǝn bau, te lɛk kɔr te di, <<Ŋgɔŋ, lǝla Doda, lɔ susun muŋ! anerim ne yir kpa kɛ va muŋ te nǝgu ya tetɛk.>>

23 Yesɔ bane di kinuŋ ba. Fe abɛ tsene maa anyɛ abenu te di, <<Duŋu akam atibe, te azǝn ya ta atɔŋ.>>

24 A tanyɛmɛ te di, <<Ne shar me bǝn abɛ yi ndi awanta abɛ dɔ ne Isrela ankyak.>>

25 Iwama anyɛ zekuru ne ti maa te di, <<Ŋgɔŋ, lɔk me ma!>> Iwa ma adi.

26 Fe Yesɔ a tanyɛmɛ te di lɛ didik, <<ba rɛ te abɛ nek ane viu kili amumun ba.>>

27 <<Iyeme, Ŋgɔŋ,>> Fe iwa ma adi, ane viu ma ataŋ mbumbur yiŋ ndi ne kye hrie rɛ ne mimi ali.>>

28 Yesɔ a ta anyɛ me te di, <<Iwa, tanyɛmɛ mi iyi ngɔŋ! Ne nugu iki yi wɔb mi.>> Ne amkpamkpama ma iva maa ne rɛ.

29 Yesɔ ne duŋ amɔ te atsine goŋ ari anyaŋ nek ne Galili. Ne yuŋ itu gbu te azǝ asɔŋ. 30 Ntsan aneshir anyɛ akamu azǝk, te gli abɛ aglugluk, abɛ amfik, abɛ amkpuk, abɛba, bǝn anuŋ tetɛk, te anyɛ shur ba ne ti ma; fe ne duŋ ba rɛ. 31 Aneshire ne yik ki yi shak susun ndi ayik abɛba akli zen lɛ, aglugluk alu atsǝn abɛ amfik ayik. Akɔ gbar Arik ane Isrela asak.

32 Yesɔ ne zhɔ abɛ tsene maa agli anyɛ me te di, <<Me lɔ susun kɛ aneshir abaŋa; Ayi bene bɛm bɛr tar azizaŋ bane yik kinuŋ ali ba, Bam tei nduŋ ba akam akɔmɔ ne kasa ba, atei mlik kɔŋ ne ankɔŋ.>>

33 Abɛ tsene maa adi, <<Ta tei yik ki li tetɛk neme ndi ntsan aneshir abaŋa atei lii ahri?>>

34 Yesɔ a rib ba, <<Izhin Gli mbwab borodi ben?>> Adiu,

<<Itaŋgba,>> <<Bǝn ambɛ watsɔb.>>

35 Adi ntsan aneshire abɛ azǝ asɔŋ ne mimi. 36 Fe avu mbwab borodi taŋgba yiŋɛ ben ambɛ me, ndi ne nyɛr Arik, fe amlik kɛ anǝk abɛ tsene maa, aba ata kɛ agab aneshir. 37 Bɔbɔk mǝne ne li te hri. Abɛ zeu tsǝn ne taŋ nki kili me avu ashak sisa me taŋgba. 38 Abaŋ ndi ne li kili me ane yi alulum azhiin anas ban di amba bǝn amumun. 39 Ndi ne duŋ ba akɔmɔ, ne ayir igu te kɔmɔ ne ŋaa kɛ Magadan.