1 Neme iner nuŋ ndi azhɔu te Lazaru, ne lɔ, ndi ayi ne ntun yi Batanya, ntun anǝ Meryamu bǝn iva men Marta. 2 Meryamu waŋa ai wa ane shur Yesɔ anyɛ ne yemgbo didik ne aza te kinu ne fumfuk tu maa, ai zumen Lazaru ne lɔ. 3 Amunvamene ne ashar te abɛ kɔte bla Yesɔ te di, <<Ŋgɔŋ, iwaŋ ndi unyeru ma alɔ.>>

4 Ndi Yesɔ ne wɔ amɛ, adi, <<Iklɛtu yi ilɔ yiŋɛ ba tei yi ku kɛ Lazaru ba, iki yiŋɛ ina te abɛ nek Arik ngɔŋ, itei na yi ankɔŋ awaŋ ndi Izu Neshir atei ta ngɔŋ maa.>> 5 Yesɔ anyer Marta bǝn iva men Meryamu bǝn Lazaru. 6 Fe ndi awɔ te Lazaru alɔ, ne klɛ ne amkpa awaŋ ndi ayime bɛr yaa.

7 Ankyak Yesɔ adi abɛ zeu tsin te di, <<Ta bǝ kam gar ntun yi Yahudiya.>>

8 Abɛ zeu tsǝne adi, <<Ine Tsar, ne mkpaŋ watsɔb ndi ne gayir, Yahudawa ne wɔb te aba abɛ tyagu ne mkpaŋ, fe u na di tabǝ na kam gar amɔ?

9 Yesɔ adi ba, <<Ndika iber zhiin yi amkpaŋ awur ane yaa ka? Iner waŋ ndi atsǝn aririk ba tara aza ba, te ayik ilaŋ amkpa yi gɔnmimi kǝŋe. 10 Ama atei tsin ne ibu atei tara aza, te amkpa ba laŋ ba.>>

11 Ndi Yesɔ ne bla amɛ, abla ba tedi, <<Ikpa mɔr Lazaru akɔ kurna; ama mgar sǝu.>>

12 Abɛ tsene maa adi, <<Ŋgɔŋ, ate yi ndi akɔ kurna, atei kama sǝ.>> 13 Yesɔ alɛ ilɛ kɛ ku Lazaru, ama aba yik tedi ayi kurna didik.

14 Ankyak Yesɔ akɔ bla ilɛ mɛ agli aru bama te di, <<Lazaru ne ku, 15 ama mne nyɛr ndi bam yi amɔ ba, te izhin bǝ tanyɛmɛ. Ta bǝ gar ben abɔu.>>

16 Ankyak Tɔma (ndi azhɔu te atagwe) adi nki abɛ zǝ Yesɔ tsǝne, <<Ta bǝ zǝ ne Tsar gar amɔ, te tabǝ te ku bene abɔu.>>

17 Ndi Yesɔ ne yir, ne yik neka ru Lazaru neka te iber nas ne bɛ me. 18 Batanya ilak maa bane mla igab yaa ibaŋ ire Urshelima ba, 19 fe Yahudawa tetɛk ne nyɛ tek ane Marta bǝn Meryamu ne iku zumen. 20 Ndi Marta ne wɔ te Yesɔ asɔŋ anyɛ, ne ru akɔ te mla ben abɔu ne ankɔŋ, ama Meryamu ne klɛ ne kɔb.

21 Marta adi Yesɔ, <<Abɛ di une menyi ayaŋa, izumɔr bai bɛ ku ba. 22 Ama Mne zhi kɔ azizaŋa Arik atei nǝgu kɔte nii ndi utǝ rib bu.>>

23 Yesɔ adiu, <<Izumin atei na lu ne ivli maa.>>

24 Marta adi, <<Mne zhi atei lu ne bɛr yi kla tu ndi atei lɛk aneshir ne bɛ.>>

25 Yesɔ adiu, <<Nga wa Myi lu aneshir ne bɛ tena nek ivli. Waŋ ndi te tanyɛmɛ bǝn abɛm atei yi tsitsir, kɔ atei ndi ne ku; 26 abaŋ ndi ayi atsitsir tena tanyɛmɛ bǝn abɛm ba atei ku ba. Izhin ne tanyɛmɛi?>>

27 <<Iyi amɛ, Ŋgɔŋ,>> Marta adi Yesɔ, <<Mne tanyɛmɛ te ndi uyi Kristi, Izu Arik, iwaŋ ndi atei nyɛ ne gɔnmimi.>>

28 Ankyak ndi Marta ne bla amɛ, akama kɔte zhɔ iva men Meryamu te lɛ ben abɔu raraŋ te di. <<Ine Tsar ayi yaŋa, ana zen rib bu.>> 29 Ndi Meryamu ne wɔ amɛ, alu andanda te kɔte yigu. 30 Neme Yesɔ ba ne zen ayir ntuno ba, anak ari yi ne amkpa waŋ ndi Marta ne mla bǝn abɔu ma. 31 Ndi Yahudawa abɛ ayi ben Meryamu ne kɔbɔ, te zen nek ilɛ kɛ vuŋ susun, ndi ne yigu alu andanda te ru, azeu, ayik te di Meryamu agar zhin ne bɛ.

32 Ndi Meryamu ne yir amkpa awaŋ ndi Yesɔ ayime, ndi ne yigu, azhaku ne aza maa te di, <<Nǝ Tsar, abɛ di une men yi ayaŋa, izumɔr bai bɛ ku ba.>>

33 Ndi Yesɔ ne yigu azhin, ane Yahudawa abaŋ ndi ne zǝ Meryamu anyɛ azhin menyi, susun maa ne lɛnu, Izhu tsetser ne shɔgu. 34 Yesɔ adi ba, <<Izhin ne ruu ne amei?>> Adi,

<<Nyɛ tɔ, Ŋgon,>>

35 Yesɔ azhin.

36 Ankyak Yahudawa adi, <<Tɔ ir keŋ ndi anyer Lazaru dei!>>

37 Ama anuŋ ne miŋ mǝne adi, <<Bai waŋa ayi waŋ ndi ne bu ne amfik yuŋɔ ayi ka, te bai bɛ ana yar lazaru ne ku kai?>>

38 Susun kɛ Yesɔ nena lɛnu ŋgon, agar bɛ me. Ibǝ me azhɔk mkpaŋ ndi ne subǝ te ku kɛ nǝ mkpaŋ ŋgon. 39 Yesɔ adi ba, <<Ŋli zhin mkpaŋ yiŋɛ gli tibɛ.>>

Ama Marta iva men ane Lazaru ndi ne kumɔ adi, <<Ikumɔ tei ye mgbɔ mimin ngɔŋ, te neka te bɛr nas ne miŋ bɛme.>>

40 Ankyak Yesɔ adiu, <<Bam ne Mbla zhin te di izhin te yik ngɔŋ kɛ Arik te zhin bǝ tanyɛmɛ kai?>>

41 Fe akɔ ŋli mkpaŋa agli atibe. Ankyak Yesɔ alǝk ayi atɔ shu te di, <<Tetɛɛ, mne nye ru ndi une wɔm. 42 Mǝne zhi te uwɔm kɔte kpaŋ takɛ, mbla amɛ ne atu ayi aneshir baŋ ndi aklikla ayaŋa, te bǝ tanyɛmɛ te ai wa ne shar me.>>

43 Ndi ne bla amɛ, azho ne kɔr ŋgon te di, <<Lazaru, ru abɛm! 44 Aru abɛm, ne kpa aŋɔk amaa bǝn aza maa ne ririk anklu kɛ ruu aneshir, te na ku ti maa.

Yesɔ adi ba, <<Zuk zhin ne wu mplɛ klu kɛ ruu aneshir kǝŋe te duŋɔ akɔmɔ.>>

45 Neme Yahudawa tetɛk ndi ne nyɛ tek Meryamu, ne yik iki yiŋ ndi Yesɔ ne nai, ankyak a tanyɛmɛ ben Yesɔ. 46 Ama anuŋ ne miŋ men ne kam akɔmɔ te akɔte bla Ferisawa iki yiŋ ndi Yesɔ ne nai. 47 Fe ngɔŋ ine na ndum kǝ Arik ben Ferisawa ne zhɔ sɔŋ ben angɔŋgɔŋ abɛ te ambuk.

Adi,<<Ta te na anii? Tɔ ikiki yi vuŋ anu ndi ner waŋ azǝn nai! 48 Ta te duŋɔ akɔmɔ amɛ, kɔte ŋɔwa atei tanyɛmɛ bǝn abɔu, fe Romawa atei nyɛ tǝ ta ntun mɔr ben aneshir amɔr.

49 Ama izhiin ne min men ndi azhɔu te kayafa, ndi wa ai ngɔŋ ine na ndum kǝ Arik ne se mɛ, adi, <<Izhin ye bliblik! 50 Ba zhin ne zhi te ire te iner zhin abɛ ku te aneshir bɔbɔk ne itun abɛ yik iyah.>>

51 Ba ne bla lɛ kǝŋe ne yik maa ba, ama ndi wa ayi ngɔŋ ine na ndum kǝ Arik ne se mɛ ne bla te di, Yesɔ atei ku ne atu ayi aneshir abɛ Yahudawa, 52 bai abɛba ankyak ba, ama bǝn aner abɛ Arik abaŋ ndi ne var ate nten, te abɛ gli ba aŋyaga te na duŋ abɛ yi zhiin. 53 Fe vuŋ rɛ bɛr yuŋɔ Yahudawa ne wɔb te aba abɛ ŋun Yesɔ.

54 Neme Yesɔ bane na tsin ndende ne miŋ Yahudawa ba. ama ne duŋ amɔ te gar ntun yiŋ ndi iyi gbahir ne zizik, ne ntun ndi azhɔi te Iferemu, amɔ wa ne sɔŋ ben abɛ zeu tsin.

55 Ndi mkpaŋ kɛ na igyaŋ yi tuk glak yi Yahudawa ne te gbahir, aneshir tetɛk ne ru are ntuntun te nyɛ Urshelima te na iki yi ben na men yi duŋ ba yi tsetser te mkpaŋ kɛ na igyaŋ bǝ te. 56 Ne zen wɔb Yesɔ, ndi ne aklikla ne ti kɛ Akabakɔŋ, ne rib akpa mɛn te di, <<Izhin yik kikini? Atei nyɛ igyaŋ yiŋɛi?>> 57 Ngɔŋ ine na ndum kǝ Arik bǝn Ferisawa ne nek ilɛ te di iwaŋ ndi atei zhi amkpa waŋ ndi Yesɔ ayime, abɛ nyɛ bla te abɛ kɔte vuŋu.