1 Mshur ayi te zhin bǝ nak tɔ bliblik muŋ watsɔb; ama izhin neka kuti izhi kɛ. 2 Mtǝ zɔr nɛ atu min ir izɔr yiŋ ndi Arik ayimɛ; izhin yi ndi tsetser isun vǝnwa iwaŋ ndi Mnǝ mkpa nyak nǝ ta lulum zhiin ankyak, Kristi nǝ tu maa. 3 Ama mtǝ sisik tǝ kǝr bǝ yi ir keŋ ndi iwa nǝ lɔm awawu nǝ lɛ mimin maa, kǝr yiŋe bǝ duŋ asusun amin abɛ tǝ mgbemgbeb nǝ zǝ lɛ didik bǝn nek atu min bǝn Kristi ne ankɔŋ azhiin awaŋa iwa nǝ lɔm Awawu nǝ mgbemgbeb kǝ mu. 4 Te yi ndi inuŋ te nyɛ bǝn abezhin te du lɛ kǝ Yesɔ ndi bai Yesɔ waŋ ndi tane du lɛ kǝ men maa ba, itǝ nayi ndi izhin nǝ ta izhu nuŋ kaaŋkaŋ ndi izhin ne ka tei, kɔ lɛ didik nuŋ kaaŋkaŋ ndi izhin ne ta kǝ, fe izhin takɛ andanda ne ankɔŋ amimin. 5 Ama Nga bam yik tǝ ndi myi mbushɛr bǝn abǝ zhɔ<<abǝ naa Yesɔ ndum>> amin! 6 Nga bam yi waŋ ndi atsaru lɛ ba, ama Mnǝ zhi. Tane duŋ zhin izhi kiki yiŋɛ anenen nǝ kɔte ankɔŋ atawa.

7 Ne yi ilalɛ ndi mne zi tu muŋ zhɔk tǝm lɛk zhin nyak nǝ du ilɛ didik yayas kɛ Arik bǝn abezhin sha i? 8 Mnǝ ta kiki bǝn abǝ zǝ Yesɔ anuŋ tǝm naa izhin ndum. 9 Ndi mne yi bǝn abezhin bam nǝ wɔb iki nuŋ ba, bam nǝ yi ihru bǝn nuŋ ba, amunya abǝ rɛ Makidɔniya nɛ gliim ikiki yi wɔb muŋ. Mnǝ yar itu muŋ nǝ yi ihru ne atu min ne kɔte nii, M tei nak na mɛ. 10 Ndi lɛ didik kǝ Kristi iyi nǝ miŋ muŋ, ba nuŋ nǝ gar kǝ Akaya atei yar me ŋur asa ba. 11 Ayi anii? Bam nǝ nyer zhin kai? Arik ne zhi tǝm nyer zhin! 12 Amɛ M tei nak na iki yiŋ ndi mnai te mbǝ ku ankɔŋ yar abaŋ ndi awɔb te abɛba bǝ yi anenen ben abɛta ne ikiki yiŋ ndi aba ŋur asa nai.

13 Tǝ ir aneshir abaŋa ayi abǝ tsar mu, ndum mǝne ai lɔm aneshir, ne baŋ atu amen ndi abǝ na ndum kɛ Kristi. 14 Nemɛ, bai yaŋ zhi ba! Shetan nɛ zhi baŋ tu maa ndi nǝ shar ayou Arik inǝ laŋ! 15 Ame bai kinuŋ ngɔŋ ba ndi agɛn amaa abaŋ atu men tǝ bɛ yi ndi agɛn abǝ yi tsetser. Nǝ klɛtu atei ta kiki yi naa men anenen nǝ wɔb men.

16 Mna bla: Kǝr nuŋ abɛ yik tedi myi bliblik ba. Ama izhin te baŋ amɛ, izhin bǝ tam ndi myi bliblik, te mbǝ yiŋ ŋur asa watsɔb. 17 Nǝ ŋur asa muŋ bam lɛ ndi ai lɛ kɛ Ŋgɔŋ ba, ama ndi bliblik. 18 Tǝ yi ndi anuŋ aŋur asa ir keŋ ndi abɛ gɔŋmimi ana ma, nga muŋ yi M tei ŋur asa. 19 Izhin vuŋ asusun ne abɛ yi bliblik te di izhin yi abɛ Mgbemgbeb! 20 Le didik, izhin vuŋ asusun ben waŋ ndi akam zhin ate agɛnɛ ben fir kɔmɔ ne ti ben na zhɔk zhin la ŋɔk ne ti. 21 Ne shisha muŋ mne tanyɛme te ndi ba ta ne mla ba!

Tǝ anii duŋ nuŋ aŋur asa. M lɛ ndi ne yi bliblik. Mna ŋur asa ne yiŋɛ. 22 Abaŋa ayi nŋli kɛ Ibraniyawa i? Nga muŋ yi myi amɛ. Ayi ŋli kɛ Isrelawa i? Nga muŋ yi myi amɛ. Ayi nŋli kɛ Ibrai? Nga muŋ yi myi nŋli maa. 23 Ayi agɛn abɛ Kristi yi? (Mli ndi waŋ ndi dur maa iyaŋa i). Mnaŋ ba. Mne na ndum naŋ ba, mne nkur ne jaru amkpaŋ tetɛk, ane tsik me amkpaŋ tetɛk, mne yik iku amkpaŋ tetɛk. 24 Yahudawa ne tsik me amkpaŋ atuŋ sɔknas yaŋ zhiin. 25 Ne tsik me amkpaŋ atar ne tsǝtsa, mkpaŋ zhin ne tyak me ne nkpaŋ, Igu ne ŋar ben abɛm ne miŋe amkpaŋ atar, mne yi ne atu amashir ne bu bǝn aririk. 26 Nǝ min kǝ tsǝn muŋ tetɛk Mnǝ yik iya nǝ shak anca anǝ nǝk bǝn abǝ zhib, iya nɛ aŋɔk aneshir amuŋ bǝn abaŋ ndi bai ŋli Yahudawa ba; iya nǝ yim ma nǝ miŋ ntuntun, iya nǝ zǝzǝk ngɔŋ, iya nɛ atu amshir nǝk ngɔŋ, tǝna yik iya bǝn akpa abǝ ti mu. 27 Mnǝ na ndum tǝ yik iya te yaŋ kurna; Izhɔŋ bǝn ihrie nǝ vuŋ mǝ Mnǝ na ntsǝn yaŋ li kili; Mne tsin ngbawuŋ ne miŋ mvlu. 28 Ndɔ ben ikiki nuŋ tetɛk, myi ne mɔ kɔte bɛr tayi susun muŋ iyi bǝn abɛ zǝ Arik. 29 Inuŋ ate yi nǝ sik kpa, fe M wɔ sik kpa muŋ yi; Ate duŋ nuŋ azhaku nǝ lalɛ, Nga mwɔ lɔmɔ nɔ susun muŋ.

30 Atei ndi M tei ŋur asa, M tei ŋur asa ne ikiki yiŋ ndi tsar klu aŋin muŋ. 31 Arik bǝn Tetɛɛ amɔr Ŋgɔŋ Yesɔ, waŋ ndi anu adidik ayi gbaru asak yaŋ klɛtu, ne zhi te bam timu ba. 32 Nǝ ntun yi Damaskɔ Gomna ndi ayi ne angus akɛ Itum Aritas ne duŋ aku nkunkɔŋ yi Damaskɔ te wa abɛ vuŋ me. 33 Ama nɛ baŋ mǝ azhɔk nǝ sisa tɛ baŋ mǝ aru nǝ mblu kǝ adampɛm tɛ duŋ mǝ ncok ndɔ nǝ ti maa.