1 Bam M tei nduŋ ŋur asa ba. Mne zhi te ba ikinuŋ iyi rɛ yime ba, M tei zǝ arimla bǝn kiki yi tsar ndi ire bǝn Ŋgɔŋ. 2 Mne zhi ner nuŋ ne zǝ Kristi iwaŋ ndi ne te ase awur anenas Yesɔ ane baŋu te kɔmɔ gbagbaŋ nǝ gbarshu, ne amkpa waŋ ndi Arik ayime. Ka ne baŋu ne kpa mɔr kɛ yi ne gɔŋmimi kǝŋe ka ane yi kpa keŋ ndi ba ta ne zhi kɛ ba, Arik wa ne zhi. 3 Fena mne zhi te ner waŋa, kɔ ne baŋu ne kpa kǝŋe ka ite naŋ kpa keŋ ndi mne zhi kɛ, ama Arik ne zhi, 4 Yesɔ ne baŋu ate nyak ne amkpa ane sɔŋ sik ndi azhɔu te Paradas ne amkpa anǝ sɔŋ sik abaŋ ndi nɛ ku nǝ nkɔŋ kǝ zǝ Arik bǝn kiki yiŋ ndi bam mblai yir ba, kiki yiŋ ndi Arik bane nǝk neshir mgbyamgbyaŋ kɛ blai ba. 5 M tei ŋur asa ne atu ayi ner yuŋɔ, ama bam ŋur asa ne atu amuŋ ba, se mŋur asa ne klu aŋin muŋ. 6 kɔ atei ndi M tei ŋur asa, bam yi bliblik ba, tem mbla izub. Fe nga bam tei ŋur asa ne kiki yiŋɛ ba, te kǝr inuŋ abɛ yik me te agbar me asak ne ki ndi mblai kam mdii ma.

7 Ndi kǝr me yine ŋur asa ne atu kiki yi vuŋ anu ngɔngɔŋ yiŋɛ ndi Arik ne nai ba, ane zhɔk me ncoŋ ne kpa muŋ, neshar ayou shetan, te abɛ sak me iyah. 8 Amkpaŋa tar mne ben te Arik abɛ gli ki yiŋɛ ate shaan bene bɛm. 9 Amɛ Yesɔ adim, <<Ita zhɔk muŋ ne mlau ma.>> Ndi amɛ iŋur asa muŋ itei yi ŋgɔŋ netu ayi klu aŋin muŋ, te mgbyamgbyaŋ kɛ Kristi bǝ sɔŋ netu amuŋ. 10 Waŋa ai kime, netu ayi Kristi, Mta nyɛmɛ ne zhi ikluoŋin muŋ, ne iyen, ne yik iyah, ndi asak me iyah, ne yaŋ kiki yi sɔŋ iyi gɔŋmimi. Mkpaŋ keŋ ndi myik klu aŋin muŋ, fe myik iklik muŋ.

11 Mne kam tu muŋ ntǝ bliblik, tǝ ayi izhineba nǝ duŋ mǝ na mɛ. Abɛ yik izhin ne gbar me, te bam yine miŋ kɛ abɛ klɛtu ben <<abɛ lǝk tu nǝ shu tɛ aba yi abǝ na ndum kɛ Arik,>> kɔ nɛ mɛɛ bam yi kinuŋ ba. 12 Ikiki yiŋ ndi iduŋ nǝ na ndum kɛ Arik, ina kiki iyi klik bǝn iyi vuŋ anu, ne nai nǝ miŋ min nǝ vuŋ susun ŋgɔŋ. 13 Tǝ aye nii tsǝn ndi izhin di ba zhin nǝk atu ba ndi abǝ zǝ Arik ba zhin nǝk atu ba anuŋ kai, ka izhin kam te lɔgɔnu nǝ yaŋ nǝk zhin ihru muŋɔ? Zuk izhu muŋ zhɔk zhin ne ŋa anu muŋ!

14 Azizaŋa Mnǝ nka mkpa iki muŋ iyi nyɛ bǝn abɛ zhin mkpaŋ kǝ ntar, bam tei yii zhin ihru ba, tǝ iki yi wɔb muŋ bai kiki ndi izhin yime neyi ba ama ayi izhineba. Izhin bǝ zhi te ayi atetɛ aba baŋ hru kɛ amumun amen. 15 Neme M tei nyɛr tǝm ŋlɔk kiki yiŋ ndi m yime neyi bɔbɔk tena nǝk tu muŋ. M tei ntanyɛmɛ bǝn abɛ zhin tetɛk, izhin tei tanyɛmɛ bǝn abɛm watsɔb iyi? 16 Ir keŋ ndi te yime, izhin ne zhi te bam ne yi zhin hru ba. Ne me, mzhi zǝb aza aneshir, mvuŋ zhin ne mfab! 17 Ka aner abaŋ ndi mne shar ba mgar ben zhin ne cɔk zhin nii? 18 Mne shar Titus ben abɛ zhin tena shar izumɔr iwaŋ ndi izhin ne zhiu te bǝ gar ndɔ. Titus bane gar te wa abɛ acok zhin ba, kɔ nɛ cok zhinii? Ba ta nǝ nak na amɛ bǝn abɛ zhin te zǝ ankɔŋ azhin kai?

19 Ama izhin nǝ zhi tǝ ta zǝn gɔŋri iyaŋ sɔŋ sik ne atu amin? Ta zǝn lɛ nǝ tii kɛ Arik nǝ miŋ kɛ Kristi; nǝ kɔte nii ndi ta na, izhin akpa amuŋ, inama yi duŋ zhin klik. 20 Ŋgam tǝ sǝsǝk ndim ntǝ nyɛ bam nyɛ yik zhin ir keŋ ndi mta nyɛmɛ tǝm yik zhine ba, neme ba zhin tei na yik me ir keŋ ndi izhin bǝ yik me ba. Mte siksik kǝr ivǝh, ikyak akpa yi, te mfu ngɔŋ, ŋar akpa, te zor ne akpa, ter akpa, iyaŋ wɔ lɛ ben yaŋ vuŋ kpa. 21 Isǝsǝk muŋɔ yi mtǝ nyɛ Arik amuŋ atei gli tu muŋ azimɛ nǝ ti min, tena tǝ mfu ne atu abɛ lalɛ bǝn abǝ kuti ndi bane duŋ lalɛ iyi, yaŋ gli kpa tsetser,bǝn vu amba kɔ alulum kurɔ bǝn itsǝn mimin.