1 Iki yiŋ ndi mblama atei ndi ilǝla ayi vǝvǝn, ba yi kaaŋkaŋ bǝn igɛn ba, ne zhi te akɔb ayi Tetɛɛ me ayi amaa. 2 Nɛ tǝ nǝ shur ayi anuŋkub bǝn acicɛ abaŋ ndi atɔ ba shak ayi sɛ nǝ mkpaŋ keŋ ndi tetɛɛ amaa nɛ duŋɔ sɔŋsɔŋ kɛ tu maa. 3 Nɛ ankɔŋ azhiin awaŋa, taba mɔr yi, ta nǝ yi agɛn ngli izhu ŋgɔŋgɔŋ yi shu tǝ shi yir izhu tsetser yi duŋ ta flu. 4 Fena ndi mkpaŋ ne nyɛ, Arik ne shar Izu maa, iŋle kɛ iwa, iŋle ne miŋ lɛ kɛ cɛr yi Musa, 5 te abaŋ ndi ayi ne angus ayi cɛr yi Musa be yik itazhɔk, te duŋ ta bǝ ta ishak ayi mgbyamgbyaŋ kɛ amumun amaa. 6 Tǝ izhin yi amumun, Arik ne shar Izhu Tsetser iyi Zu maa nǝ min asusun amɔr, Izhu ndi azhɔ tedi, <<Tetɛɛ, Tetɛɛ muŋ Ŋgɔŋ>> 7 Neme bau na yi igɛn ba, uyi izu; fena teyi ndi uyi izu, Arik ne duŋu bǝ yi lǝla.

8 Ikukub, ndi ba zhin nǝ zǝn zhi Arik ba, izhin nǝ yi agɛn nɛ angus abaŋ ndi neyi abǝ zǝn zǝ ishetan. 9 Fe azǝzaŋa ndi izhin nǝ zhi Arik ka, mbǝ ndi, azǝzaŋa ndi Arik nɛ zhi zhin fe anii tǝ zhin kam gɔŋ nǝk abaŋ ndi asuk kpa tɛna wɔ lɔ susun men nǝ izhu ŋgɔŋgɔŋ? Aye nii duŋ zhin sɔ yi agɛn amen tǝ na yi amɛ? 10 Izhin ŋub iber ndi iyii zhin didik bǝn ihwa yi rɛ zhin bǝn mkpaŋ kǝ rɛ zhin bǝn asɛ i! 11 M nklu sǝsǝk min, tǝ ayi ndi mnǝ nku hrie nɛtu amin.

12 M ben zhin, akpa amuŋ na zhin kiyiŋ ndi M nai. Nǝ iyiŋe bɔbɔk, M yi ndi izhineba. Ba zhin nǝ laam lɛ nuŋ ba. 13 Izhin nǝ shuzhi iki yiŋ ndi nǝ duŋ M nǝ du zhin lɛ didik kɛ men nǝ kuti; nǝ min kǝ zǝn lɔ kpa muŋ. 14 Ne mɛ ilɔ muŋɔ nɛ yi lɛn susun nɛ atu amin zhin, ba zhin nǝ tam nǝ kpa ti ba kɔ iyar mǝ ba. Ama, izhin nǝ tam aŋɔk ayaa ndi Myi inǝ bla shar ayou Arik, ayii ndi ngam yi Yesɔ Kristi ne tu maa. 15 Izhin nǝ nyɛr ngɔŋ! Anii nǝ na? Nga muŋ yi mdi izhin ibǝ kpɔb ayi amin, izhin tǝ yaa ma, tǝ baŋɛ nǝm. 16 Tǝm nǝ nkam yi inǝ tǝ zɔr amin ndim mbla zhin lɛ didik yi?

17 Aneshir ayuŋɔ anǝk atu tǝ aba bɛ ruk zhin anaŋ, ama banǝ nkɔŋ kǝ rɛ ba, iki ndi awɔb nai ma ate te ba abɛ gbaŋ zhin agli atibɛ bǝn abɛta, te zhin bǝ nǝk atu bǝnɛ ba. 18 Ire tǝ bɛ nǝk atu, teyi ndi iname ire, bǝ nai kɔte bɛr tayi, kǝr bǝyi se mkpaŋ ndi myi ben abɛ zhin ba. 19 Izhineba amumun amuŋ! mtar ndi, ir keŋ ndi iyaa aŋli, M wɔ amɛ nǝ lɔ kpa ne atu amin se ikpa kǝ Kristi nǝ ŋlɔ nǝ miŋ min. 20 ka abɛdi myi ben abɛ zhin tena sen kɔr kɛ ilɛ muŋ, tem lɛ ncɔk netu amin!

21 Duŋ mǝ rib abaŋ ndi nɛ tanyɛmɛ nǝ ki ndi icɛr yi Musa: ba zhin nǝ zhi ki ndi icɛr yi Musama ibla ka? 22 Nɛ di tǝ Ibrai neyi nɛ amumun amɛ yaa, izhin ayi ŋli kɛ iwa gɛn fe nuŋɔ ayou iwa nǝ ne bun amaa. 23 Izu maa nǝ ŋli iwa gɛne nɛ ŋliu ir keŋ ndi aŋli me, fena inǝ ŋli iwa nǝ bun amaa ayi kpa nyak iye Arik.

24 Iki yiŋɛ atei ya baŋǝ ndi nkanlɛ, te iwama ayi ntǝk yaa iyi kpa nyak. Ikpa nyak nuŋ Arik ne nǝge nǝ gbu Sinei te ŋli amumun abaŋ ndi atei yi agɛn: Iwa Ajara. 25 Fena Ajara aklɛkli ndi gbu Sinei ne Arabiya ndi ne te anenen ne ntun ŋgɔŋ yi Urshelima, te ayi ne miŋ kɛ tǝ gɛn bǝn amunɔ maa. 26 Ama Urshelima ndi iyi ne shu ikinuŋ bai tǝ kǝ ba, neme wa iyah amɔr Saratu. 27 Tǝ ne cɛr:

<<Ubǝ mlak nyɛr, Uyi Iwa klu,

Waŋ ndi bane ŋli amumun ba;

Ru abɛm te zhin ŋgɔŋ,

Uwa waŋ ndi bau ne zen zhin ŋli ba;

Tǝ amumun abɛ iwa waŋ ndi ba yi ne zo gu gli bama ba

Inaŋ iwa waŋ ndi ayi ne lulum.>>

28 Azizaŋa, izhineba, akpa amuŋ, izhi yi amumun abe Arik nǝ kpa nyak maa, ndi Ishaku ane yimɛ. 29 Nǝ mkpaŋ yuŋɔ ivǝvǝn waŋ ndi nɛ ŋliu ir keŋ ndi aŋlimɛ ne nǝk waŋ ndi nɛ ŋliu ma iya tǝ ayi Izhu tsetser ye Arik; tǝ na yi anenen azǝzaŋa. 30 Tǝ ilɛ kɛ Arik ne di kikini? <<Yar iwa gɛne rumɔ bǝn vǝvǝn amaa, te izu iwa gɛne batei gab kinuŋ te nǝgu ba ne iki iyi izu iwa ne bun ami. 31 Fena, akpa amuŋ, bata yi amumun abɛ iwa gɛn ba, tayi abɛ iwa nǝ bun.