Ang Pagdadalamhati ni Pablo Dahil sa mga Israelita
1 Ngayon, bilang mananampalataya kay Kristo, may sasabihin ako sa inyo. Totoo ito at hindi ako nagsisinungaling. Sa pamamagitan ng Banal na Espiritu, ang aking konsensiya ang nagpapatunay na 2 labis akong nalulungkot at nababalisa 3 dahil sa mga kalahi at kababayan kong Hudyo. Kung puwede lang sanaʼy ako na lang ang sumpain ng Diyos at mahiwalay kay Kristo, maligtas lang sila. 4 Bilang mga Israelita, itinuring sila ng Diyos na kanyang mga anak. Ipinakita niya sa kanila ang kanyang kadakilaan. Gumawa ang Diyos ng mga kasunduan sa kanila at ibinigay rin ang Kautusan sa kanila. Tinuruan sila ng tunay na pagsamba at maraming ipinangako ang Diyos sa kanila. 5 Ang kanilang mga ninunoʼy mga pinili ng Diyos, at sa kanilang lahi nagmula ang Mesias nang siyaʼy maging tao. Siya ang Diyos na makapangyarihan sa lahat na dapat purihin magpakailanman! Amen.
Ang Pagpili ng Diyos sa Israel
6 Hindi ito nangangahulugan na hindi natupad ang mga pangako ng Diyos sa lahi ni Israel dahil hindi sila sumampalataya, sapagkat hindi lahat ng mga Israelita ay kabilang sa mga taong pinili ng Diyos. 7 At hindi rin naman lahat ng nagmula kay Abraham ay maituturing na mga anak ni Abraham. Sapagkat sinabi ng Diyos kay Abraham, "Si Isaac na iyong anak ang pagmumulan ng ibibilang na lahi mo."9:7 Gen. 21:12. 8 Ang ibig sabihin, hindi lahat ng anak ni Abraham ay maituturing na anak ng Diyos, kundi ang mga anak lamang na ipinanganak ayon sa pangako. 9 Sapagkat ganito ang ipinangako ng Diyos sa kanya, "Babalik ako rito sa ganito ring panahon sa susunod na taon at magkakaroon ng anak na lalaki si Sara."9:9 Gen. 18:10, 14.
10 Ang anak na ito ay ang ating ninunong si Isaac. At nangyari nga na ang asawa niyang si Rebeca ay nagdalang-tao ng kambal. 11,12 Bago pa man ipanganak ang kambal, sinabi na ng Diyos kay Rebeca, "Maglilingkod ang nakatatanda sa nakababatang kapatid."9:11-12 Gen. 25:23. Sinabi ito ng Diyos noong wala pa silang nagagawang mabuti o masama, bilang patunay na ang pagpili niya ay batay sa sarili niyang pasya at hindi sa mabubuting gawa ng tao. 13 Gaya nga ng sinabi ng Diyos sa Kasulatan, "Minahal ko si Jacob, ngunit si Esau ay kinapootan ko."9:13 Mal. 1:2-3.
14 Kung gayon, ano ang dapat nating sabihin? Masasabi ba nating hindi makatarungan ang Diyos? Aba, hindi! 15 Sapagkat sinabi niya kay Moises:
"Mahahabag ako sa gusto kong kahabagan;
maaawa ako sa gusto kong kaawaan."9:15 Exo. 33:19.
16 Kaya ang pagpili ng Diyos ay hindi batay sa kagustuhan ng tao o sa paggawa niya ng mabuti, kundi sa awa ng Diyos. 17 Sapagkat ayon sa Kasulatan, sinabi ng Diyos sa Faraon, "Ginawa kitang hari para sa layuning ito: upang maipakita ko ang aking kapangyarihan sa pamamagitan mo at makilala ang pangalan ko sa buong mundo."9:17 Exo. 9:16. 18 Nangangahulugan ito na kinaaawaan ng Diyos ang gusto niyang kaawaan, at pinatitigas niya ang puso ng iba kaya hindi na talaga sila nakikinig.
19 Maaaring may magsabi sa akin, "Kung ganoon, bakit pa niya pinapanagot ang mga tao sa kanilang mga kasalanan? Ginagawa lang naman nila ang ayon sa kanyang kalooban?" 20 Ngunit sino ka para magreklamo sa Diyos? Tayoʼy mga nilikha lang ng Diyos, kaya hindi tayo dapat magreklamo. Nararapat bang sabihin ng nilikha sa lumikha sa kanya, "Bakit mo ako nilikha nang ganito?"9:20 Isa. 29:16; 45:9, 10. 21 Tulad ng isang magpapalayok, may karapatan siyang hubugin ang putik ayon sa gusto niya. May karapatan siyang gumawa ng dalawang uri ng sisidlan mula sa iisang tumpok ng putik: Ang isa ay espesyal, at ang isa naman ay karaniwan lang.
22 Ganoon din naman ang Diyos. Nais niyang ipakita ang kanyang kapangyarihan at matinding galit sa mga makasalanan, subalit minabuti niyang tiisin muna nang buong tiyaga ang mga taong dapat sanang parusahan at lipulin. 23 Ginawa niya ito upang ipakita kung gaano siya kadakila sa mga taong kinaaawaan niya, na inihanda na niya noon pa para sa kaluwalhatian. 24 Itoʼy walang iba kundi tayong mga tinawag niya, hindi lang mula sa mga Hudyo kundi mula rin sa mga Hentil. 25 Ito ang sinabi ng Diyos sa aklat ni Hosea:
"Ang dating hindi ko bayan
ay tatawagin kong, ‘bayan ko’.
At ang dating hindi ko mahal
ay tatawagin kong ‘mahal ko’."9:25 Hos. 2:23.
26 At,
"Sa mismong lugar
kung saan silaʼy sinabihang,
‘Kayoʼy hindi ko mga mamamayan,’
silaʼy tatawaging,
‘Mga anak ng Diyos na buháy.’ "9:26 Hos. 1:10.
27 Tungkol naman sa mga Israelita, sinabi ni Propeta Isaias:
"Kahit maging kasindami man ng buhangin
sa tabing-dagat ang lahi ni Israel,
kaunti lang ang maliligtas sa kanila.
28 Sapagkat mabilis at matindi
ang gagawing paghatol
ng Panginoon sa mundo."9:28 Isa. 10:22-23. Ito ay hango sa saling Septuagint.
29 Sinabi rin ni Isaias,
"Kung ang Panginoong Makapangyarihan
ay walang itinira sa ating lahi,
natulad na sana tayo
sa Sodoma at Gomora."9:29 Isa. 1:9.
Ang Hindi Pagsampalataya ng Israel
30 Ano ngayon ang ating masasabi? Ang mga Hentil na hindi nagsikap na maging matuwid ay itinuring ng Diyos na matuwid nang dahil sa kanilang pananampalataya. 31 Ngunit ang sambayanang Israel na nagsikap na maituring na matuwid sa pamamagitan ng pagsunod nila sa Kautusan ay nabigo. 32 Bakit sila nabigo? Sapagkat nagtiwala sila sa kanilang mga gawa at hindi sila sumampalataya kay Hesu-Kristo. Natisod sila sa "batong nakakatisod." 33 Gaya nga ng sinabi ng Diyos sa Kasulatan:
"Maglalagay ako sa Zion
ng batong katitisuran sa mga tao,
at magpapadapa sa kanila.
Ngunit hindi mapapahiya
ang mga sumasampalataya sa kanya."9:33 Isa. 8:14; 28:16.