1 ✝Bakegen, Profet Amos i talemaot we Hae God i talem se, "Ol man Moab ya, oli stap mekem sin plante taem, we oli no save lego fasin ya. Olgeta oli no save tinghevi long ol bun blong king blong Edom. Oli girap, oli bonem ol bun ya blong wokem laem long hem. Tru, mi talem long yufala, mi bambae mi panisim olgeta from ol rabis fasin ya blong olgeta. 2 Bambae mi bonem olgeta ples blong olgeta. Ol strong ples blong haed blong ol man blong taon ya Keriot, bambae mi bonem olgeta evriwan. Bambae i gat bigfala faet, we ol enemi blong ol man Moab ya bambae oli stap singsingaot bigwan, mo oli stap blu long ol bigfala pupu blong olgeta, nao long faet ya, ol man Moab ya bambae oli ded. 3 Mi bambae mi kilim king blong olgeta, wetem ol lida blong olgeta oli ded. Mi mi Hae God, mo hemia tok blong mi."

4 Bakegen, Profet Amos i talemaot we Hae God i talem se, "Ol man Juda* ya, oli stap mekem sin plante taem, we oli no save lego fasin ya. Olgeta oli tanem baksaed long ol tok blong mi, mo oli no obei nating long ol tok we mi mi putum. Fasin blong ol narafala god ya we ol bubu blong olgeta bifo oli stap mekem wosip long olgeta, hem i pulum olgeta oli gowe long mi finis. Tru, mi talem long yufala, mi bambae mi panisim olgeta from ol rabis fasin ya blong olgeta. 5 Bambae mi bonem olgeta ples blong olgeta. Ol strong ples blong haed blong olgeta long Jerusalem,* bambae mi bonem olgeta evriwan."

6 Mo bakegen, Profet Amos i talemaot we Hae God i talem se, "Ol man Isrel.* !Yufala i stap mekem sin plante taem, we yufala i no save lego fasin ya! !Tru, mi talem long yufala, mi bambae mi panisim yufala from ol rabis fasin ya blong yufala! Ol stret man we oli no save pem ol kaon blong olgeta long yufala, be yufala i stap salem olgeta oli kam slef* blong ol narafala man. Sam long olgeta oli pua tumas, we oli stap kaon blong pem sandel nomo, be yufala i salemaot olgeta. 7 Olgeta we oli no strong, mo oli no gat paoa, yufala i stap purumbut long olgeta, mo ol puaman, yufala i stap blokem olgeta blong oli no save kasem ol samting we oli gat raet blong kasem. Fasin blong yufala, man i tekem woman slef blong hem, blong i slip wetem hem, nao pikinini blong hem i girap, i go slip wetem sem woman ya bakegen. Fasin ya i mekem nem blong mi i kam nogud olgeta. 8 Kaliko blong ol puaman we yufala i holem fastaem, blong letem olgeta oli kaon long yufala, be long naet, yufala i no givimbak long olgeta. Yufala i yusum blong mekem bed blong yufala long ol ples blong mekem wosip. Waen ya we ol man oli stap givim long yufala blong pemaot ol faen we yufala i putum long olgeta, yufala i stap yusum blong dring long haos* blong mi.

9 ✝"Be mi nao mi kilim ol laen* blong Amoro* evriwan oli ded blong tekem yufala i kam stap long ples ya. Nating we olgeta ya oli longlongfala man, olsem ol tri ya sida,* mo oli strong tumas olsem oktri,* be mi mi flatemgud olgeta evriwan. 10 Bifo, taem yufala i stap long Ijip, mi nao mi tekemaot yufala, mo long foti yia ya we yufala i stap wokbaot long draeples, mi mi stap lidim yufala. Mo biaen, graon ya we fastaem i blong ol laen blong Amoro, mi mi givim i go long yufala. 11 ✝Mo mi jusumaot sam long ol pikinini blong yufala blong oli kam profet, mo sam blong oli kam spesel man blong mi, we nem blong olgeta Nasiraet* ?Tok ya i tru, no nogat? 12 Ol Nasiraet* ya, i tabu blong oli dring, be yufala i girap, yufala i mekem olgeta oli dring waen, mo yufala i blokem ol profet ya blong mi, blong oli no talemaot tok blong mi long ol man. 13 Naoia, bambae mi panisim yufala, we bambae yufala i stap krae from, olsem we wil blong kat i stap krae, taem we kat i fulap tumas. 14 Long taem ya, ol strong man blong resis bambae oli no save ronwe. Ol strong man bambae oli no moa strong, mo ol lariken man blong faet bambae oli no moa save sevem laef blong olgeta. 15 Ol man blong sut long bonara bambae oli fraet, oli ronwe, mo ol strong man blong resis, bambae oli traem ronwe, be bambae oli kanduit. Mo ol man blong ron long hos bambae oli traem ronwe, be bambae oli no save sevem laef blong olgeta. 16 Ol nambawan man blong faet, be long taem ya, bambae oli sakem ol samting blong faet blong olgeta, oli resis, oli ronwe. Mi mi Hae God, mo hemia tok blong mi."