1 ✝Profet Amos, hem i man blong lukaot long sipsip, mo ples blong hem long taon ya Tekoa long Juda.* Long taem we King Usia i king long Juda, mo King Jeroboam, we papa blong hem King Jehoas, i king long Isrel,* profet ya i luk wan vison.* Long vison ya, God i givim ol tok long hem blong hem i go talemaot long ol laen* blong Isrel* long not. Hem i luk vison ya fastaem, bigfala etkwek ya we i kasem olgeta long taem blong King Usia, hem i kam biaen, we tu yia i pas finis. Ol tok we i stap long buk ya, hemia nao ol tok we God i talem long hem.

2 ✝Nao Profet Amos i talem se,

"Hae God i stap long hil ya Saeon,*

long Jerusalem.*

Hem i singaot i kam,

we voes blong hem

i faerap bigwan olsem tanda.

Ol gudgudfala gras

we ol sipsip oli stap kakae,

mo olgeta gras long hil ya Kamel

oli drae evriwan."

3 ✝Nao Profet Amos i talemaot we Hae God i talem se, "Ol man Damaskes* ya, oli stap mekem sin plante taem, we oli no save lego fasin ya. Oli mekem i strong tumas long ol man Gilead, oli spolemgud olgeta we oli no gat sore. Tru, mi talem long yufala, mi bambae mi panisim olgeta from ol rabis fasin ya blong olgeta. 4 Bambae mi bonem haos ya blong king, we King Hasael i bin wokem bifo, mo bambae mi bonem ol strong ples blong haed blong King Benadad tu. 5 Bambae mi brekemdaon ol doa* blong bigfala stonwol blong taon ya Damaskes, mo bambae mi tekemaot haeman blong taon ya Beteden, wetem ol man blong bigfala levelples ya Aven we i stap daon, long medel blong ol hil.* i stap long bigfala levelples ya daon long medel blong ol hil, we i ples blong mekem sin nomo. Bambae mi tekemaot king blong taon ya wetem ol man blong ples ya. Bambae mi tekemaot olgeta man Siria oli go wok slef* longwe long ples ya Kiri. Mi mi Hae God, mo hemia tok blong mi."

6 ✝Bakegen, Profet Amos i talemaot we Hae God i talem se, "Ol man Gasa ya, oli stap mekem sin plante taem, we oli no save lego fasin ya. Taem oli go mekem faet, nao oli winim wan ples, oli stap karemaot olgeta man blong hem evriwan, oli go salem olgeta long ol man Edom blong oli go wok slef,* be fasin ya i no stret nating. Tru, mi talem long yufala, mi bambae mi panisim olgeta from ol rabis fasin ya blong olgeta. 7 Bambae mi bonem olgeta samting blong taon ya Gasa, mo bambae mi bonem ol strong ples blong haed blong olgeta tu. 8 Bambae mi tekemaot king blong taon ya Asdod wetem king blong taon ya Askelon. Bambae mi panisim ol man blong taon ya Ekron, mo ol man Filistia we oli stap yet, bambae mi kilim olgeta oli ded. Mi mi Hae God, mo hemia tok blong mi."

9 ✝Bakegen, Profet Amos i talemaot we Hae God i talem se, "Ol man Taea ya, oli stap mekem sin plante taem, we oli no save lego fasin ya. Olgeta oli mekem promes blong fren gud wetem ol brata blong yufala, be biaen, oli no holem promes ya, oli girap, oli go mekem faet long olgeta ya bakegen, oli winim olgeta, nao oli karemaot olgeta evriwan oli go wok slef* long Edom. Tru, mi talem long yufala, mi bambae mi panisim olgeta from ol rabis fasin ya blong olgeta. 10 Bambae mi bonem olgeta samting blong taon ya blong olgeta, mo bambae mi bonem ol strong ples blong haed blong olgeta tu."

11 ✝Bakegen, Profet Amos i talemaot we Hae God i talem se, "Ol man Edom ya, oli stap mekem sin plante taem, we oli no save lego fasin ya. Olgeta oli brata blong yufala nomo, be oli girap, oli stap ronem yufala long not, oli stap kilim yufala, we oli no gat sore nating. Olgeta oli kros tumas, we oli no save lego kros blong olgeta nating. Tru, mi talem long yufala, mi bambae mi panisim olgeta from ol rabis fasin ya blong olgeta. 12 Bambae mi bonem taon ya Teman, mo mi bonem ol strong ples blong haed blong olgeta long taon ya Bojeraha."

13 ✝Bakegen, Profet Amos i talemaot we Hae God i talem se, "Ol man Amon ya, oli stap mekem sin plante taem, we oli no save lego fasin ya. Bifo, taem oli go mekem faet long ol man Gilead blong winim graon blong olgeta, oli holem ol woman we oli gat bel, nao oli katem bel blong olgeta i open, blong kilim olgeta i ded. Tru, mi talem long yufala, mi bambae mi panisim olgeta from ol rabis fasin ya blong olgeta. 14 Bambae mi bonem olgeta samting blong taon ya Raba we i kaptel blong olgeta, mo bambae mi bonem ol strong ples blong haed blong olgeta tu. Long taem blong faet, bambae ol enemi blong olgeta oli stap singaot bigwan, mo bambae oli stap kilim olgeta, olsem we hariken i kilimdaon evri samting. 15 Bambae ol enemi ya oli tekemaot king blong olgeta wetem ol haeman blong olgeta, oli tekem olgeta i go wok slef* long narafala ples. Mi mi Hae God, mo hemia tok blong mi."