1 Nao Profet Joel i talemaot we Hae God i talem se, "Long taem ya, mi bambae mi mekem ol man Jerusalem* wetem ol narafala man Juda* oli gat plante samting bakegen. 2 Mi bambae mi tekem ol man blong olgeta kantri oli kam wanples long bigfala levelples ya long medel blong ol hil we nem blong hem "Bigfala Levelples blong Jehosafat*". Nao long ples ya, bambae mi jajem olgeta, from olgeta samting we oli mekem long ol spesel man blong mi, ol laen* blong Isrel*. Oli mekem we olgeta oli go olbaot long ol ples we i no stret ples blong olgeta, mo oli seraot ol graon long kantri ya Isrel we i kantri blong mi. 3 Oli sakem ol spesel ston* blong faenemaot se hu nao bambae i tekem ol man ya we oli winim olgeta long taem blong faet. Oli salem ol boe mo ol gel blong olgeta ya blong oli kam slef*, mo ol mane we oli kasem, oli yusum blong pem woman blong rod, mo blong pem waen blong olgeta.

4 ✝ ✝"Ol man Taea, mo ol man Saedon, mo ol man Filistia. ?Weswe? ?Yufala i luk se mi mekem wan samting i rong, taswe yufala i wantem givimbak long mi? Sipos i olsem, naoia nomo mi rere blong givimbak long yufala. 5 Yufala i tekemaot finis ol silva mo ol gol blong mi, mo ol gudgudfala samting blong mi, yufala i karemaot i go long ol haos blong ol god blong yufala. 6 Mo ol man Jerusalem wetem ol narafala man Juda, yufala i tekemaot olgeta i gowe long kantri blong olgeta, yufala i go salem olgeta long ol man Gris. 7 Naoia, mi bambae mi tekemaot olgeta bakegen long ol ples ya we yufala i salem olgeta i go long hem. Mo bambae mi mekem sem fasin long yufala, olsem we yufala i mekem long olgeta. 8 Bambae mi mekem we ol narafala man oli salem ol boe mo ol gel blong yufala long ol man Juda, mo bambae ol man Juda oli salem olgeta long ol man Seba we oli stap longwe tumas long yufala. Mi mi Hae God, mo hemia tok blong mi."

9,10 ✝Nao profet i talemaot we Hae God i talem long ol man blong karem tok blong hem, blong oli go talemaot long ol man blong ol narafala kantri se,

"Yufala i mas mekemrere blong faet.

Yufala i singaot ol soldia blong yufala

oli kam wanples.

Ol aean we yufala i stap yusum

blong brebrekem graon,

yufala i mas hamaremgud olgeta

blong oli kam naef blong faet.

Mo ol huknaef blong yufala,

yufala i mas hamaremgud olgeta

blong oli kam spia blong yufala.

Yufala i mas mekemrere ol soldia blong yufala,

nao yufala evriwan i mas kam joen long faet.

Man we i no strong,

be hem tu i mas joen long faet ya.

11 Yufala we i stap klosap,

yufala i mas hareap, yufala i kam.

Yufala i mas kam wanples

long bigfala levelples ya

long medel blong ol hil."

Nao profet i prea, i talem se,

"Hae God.

Yu yu mas sanem ol soldia blong yu

oli kam kilim olgeta ya."

12 Mo bakegen, hem i talemaot we Hae God i talem se,

"Ol laen blong Isrel.

Olgeta man blong ol narafala kantri

oli mas mekemrere

blong oli kam long Bigfala Levelples ya blong Jehosafat.

Nao long ples ya,

mi bambae mi sidaon blong jajem ol kantri ya

we oli stap raonabaot long yufala.

13 ✝Ol man ya,

fasin blong olgeta i nogud we i nogud.

Yufala i mas flatemgud olgeta,

olsem we man i go katemdaon

wit* long garen* blong hem,

we i flatemgud.

Yufala i mas purumbut long olgeta,

olsem we man i purumbut long ol grep*,

blong mekem waen,

gogo wota blong hem i ronaot,

i fulap long hol blong hem,

i stap kafkafsaed."

14 Nao profet i talem se,

"I gat plante plante taosen man

oli kam hivap long bigfala levelples ya,

from we Dei blong Hae God i stap kam klosap.

Long dei ya,

hem bambae i jajem olgeta man

long ples ya.

15 Long dei ya,

san mo mun mo ol sta

bambae oli no moa saen."

16 ✝Nao Profet Joel i talem se,

"Hae God i stap long Hil ya Saeon*,

long Jerusalem*.

Hem i singaot bigwan i kam,

we voes blong hem i olsem voes blong laeon.

Voes blong hem i kamaot long ples ya,

we i faerap bigwan olsem tanda,

nao graon mo skae tufala i seksek.

Be ol laen* blong Isrel*,

hem i stap lukaot gud long olgeta.

Hem nomo i sefples blong ol man ya blong hem."

17 Mo bakegen, profet i talemaot we Hae God i talem se,

"Ol laen blong Isrel.

Bambae yufala i save

se mi mi Hae God,

mi God blong yufala.

Mi stap long Saeon,

tabu hil* ya blong mi.

Taon ya Jerusalem bambae i wan tabu ples,

mo bambae ol strenja

oli no moa save winim hem bakegen.

18 "Long taem ya,

olgeta hil bambae oli fulap gud

long plantesen blong grep*,

mo bambae i gat plante buluk

olbaot long ol hil,

mo bambae i gat plante springwota

olbaot long Juda*.

Wan springwota

bambae i aot long haos* blong mi,

i ron i kam,

mo wota ya bambae i ron i go

long bigfala levelples ya Sitim*

19 "Bambae kantri ya Ijip i kam wan draeples,

mo Edom bambae i kam nogud olgeta,

we i no moa gat wan samting

i save stap long hem,

from we olgeta ya nao

oli kam spolem ol man Juda,

oli kilim ol stret man ya

long ples blong olgeta.

20,21 Rabis fasin ya we oli mekem long olgeta ya,

mi bambae mi givimbak long olgeta,

mo bambae mi no save fogivim olgeta,

mi no save tekemaot sin blong olgeta.

Be kantri ya Juda

mo bigfala taon blong hem Jerusalem,

oltaem bambae i gat ol man long hem

gogo i no save finis.

Mo mi Hae God

bambae mi stap oltaem

long Hil ya Saeon."