1 "Ol flae we oli ded insaed long wan botel senta oli save mekem senta ya i sting, mo long sem fasin, smol samting nomo we man we i no gat hed i mekem i save spolem bigfala wok we man we i waes i mekem.

2 "Man we i waes, oltaem hem i stap mekem ol samting we i stret, be man we i no gat hed, oltaem hem i stap mekem ol samting we i nogud. 3 I isi nomo blong ol man oli luksave man we i no gat hed. Ol strenja nomo, be taem oli luk hem long rod, oli save wantaem nomo se man ya i no gat hed. Oltaem nomo, man olsem i stap soemaot fasin blong hem.

4 "Sipos yu stap wok blong king, nao hem i kam kros long yu, i nogud yu go talem long hem, se bambae yu finis long hem. Nating we yu mekem i nogud tumas long hem, be sipos yu stap kwaet, plante taem bambae hem i save fogivim yu.

5 "I gat wan narafala fasin we i no stret nating, we mi luk long wol ya, we i stap kamaot long wok blong ol king. 6 Oltaem oli stap putumap ol man we oli no gat hed blong oli holem ol nambawan wok, be oli stap tingting nating long ol rijman. 7 Plante taem, mi luk we ol slef* oli stap wokbaot long hos, be ol haeman oli wokbaot long leg nomo, olsem we oli slef.

8 ✝"Man we i wantem digim hol blong mekem trap, bambae i save foldaon long hol ya bakegen. Mo man we i wantem brekem wol blong haos blong gotru, snek we i stap long wol ya bambae i save kakae hem. 9 Man we i stap katem ston blong wokem haos bambae i save karekil long ston ya. Mo man we i stap splitim wud bambae i save karekil long wud ya. 10 Sipos akis blong yumi i no sap, mo yumi no sapenem, bambae yumi mas taetem bun nomo blong yusum. Be i moa gud yumi mekem plan fastaem, nao biaen bambae yumi wok. 11 Sipos yumi save fasin blong kwaetem snek blong i no kakae yumi, be yumi no mekem, nao hem i kakae yumi fastaem, hemia yumi no win nating. 12 Tok blong man we i waes i stap mekem ol man oli ona long hem, be tok blong man we i no gat hed i stap spolem hem nomo. 13 Taem man olsem i stat blong talem wan samting, tok blong hem i olbaot nomo, mo taem hem i finis, tok blong hem i go krangke olgeta. 14 Fasin blong man olsem, hem i tok we i tok, i stap gohed nomo we i no save weples bambae i finis.

"I no gat man we i save ol samting we bambae oli kamtru. I no gat wan man nating we i save talemaot long yumi ol samting we bambae oli hapen long ples blong hem biaen long taem we hem i ded.

15 "Man we i stap hadwok tumas gogo i taed we i taed, hem i no gat hed, i olsem man we i no save faenem rod blong gobak long haos blong hem.

16 "Kantri we king blong hem i yangfala nomo mo ol lida blong hem oli stap mekem lafet gogo kasem delaet, ol man blong hem bambae oli kasem trabol. 17 Be kantri we king blong hem, hem nomo i stap makem rod blong hem, mo ol lida blong hem oli stap kakae long stret taem nomo blong oli strong blong wok, mo oli no save drong, ol man blong hem bambae oli save harem gud.

18 "Sipos wan man i les tumas blong wokemgud haos blong hem, bambae haos ya i lik, mo i no longtaem, bambae ruf blong hem i brobrok.

19 "Gudfala kakae i save mekem yumi harem gud, mo waen i save mekem yumi glad, be mane, hem i save givim ansa long evri problem.*.

20 "Nating we yumi stap tok smosmol nomo, be i nogud yumi stap tokbaot king. Nating we yumi stap long bedrum blong yumi, be i nogud yumi stap tokbaot ol rijman. Bambae wan pijin i girap i go talemaot tok blong yumi long olgeta.