1 ✝"Sipos yu yu gat gud nem long fes blong ol man, hemia i gud moa long yu, i winim we yu putum gudfala senta ya we praes blong hem i antap tumas. Nao dei ya we bambae yu yu ded long hem, bambae hem i bigfala dei moa blong yu, i winim dei ya we yu yu bon long hem.

2 "Sipos yu go long wan haos we dedman i stap long hem, we ol man oli stap krae long hem, hemia i save givhan moa long yu, i winim we yu go long wan haos we i gat lafet long hem, from we yumi ya we i stap laef yet, i stret blong yumi stap tingbaot oltaem, we bambae yumi evriwan i mas ded.

3 "Sipos yu stap harem nogud, hemia i save givhan moa long yu, i winim we yu stap laf. Maet samting ya i mekem fes blong yu i kam nogud, be i save mekem yu yu lan tu, nao bambae yu gat save moa.

4 "Man we i wantem glad oltaem nomo, hem i no gat hed. Man we i gat hed, hem i no save fogetem se bambae hem i save ded.

5 "Sipos ol waes man oli stap tok long yu blong stretem yu, hemia i save givhan moa long yu, i winim we ol man we oli no gat hed oli stap sing blong presem yu.

6 "Taem wan man we i no gat hed i laf, hemia i no minim wan samting nating, i olsem we yu sakem ol drae stik i go long faea, nao oli stap faefaerap.

7 "Nating we yu yu waes tumas, be sipos yu stap giaman long wan man nao yu stap stil long hem, hemia, yu stap mekem yu yu kam olsem man we i no gat hed. Mo sipos yu letem wan man i pem yu blong yu mekem wan samting we i no stret, hemia, yu spolem gudnem blong yu nomo.

8 "Taem man i statem wan wok, hem i save glad long hem, be taem hem i finisim, bambae i save harem gud moa. Mo man we i gat longfala tingting, hem i moa gud, i winim man we i stap flas.

9 ✝"I nogud yu yu man blong kros kwik. Mo i nogud yu holem kros blong yu i stap longtaem, from we hemia i fasin blong man we i no gat hed.

10 "I nogud yu stap talem se, ‘?From wanem we bifo ol samting i gud we i gud, i winim tede?’ Hemia i no tok blong man we i gat hed ya.

11 "Waes i wan samting we i gud yumi evriwan i kasem. Sipos yu kasem waes, hemia i olsem we yu kasem graon blong papa blong yu wetem olgeta samting we i stap long hem, we hem i promes finis, se bambae i blong yu. 12 Mane i save givhan blong mekem laef blong yu i gud, be waes tu i save mekem samting ya, mo hem i save go moa. Hem i save mekem we laef blong yu bambae i stap gud olwe.

13 "Yu mas tingting gud long ol samting we God i stap mekem. Sipos God i mekem wan samting i kruked, bambae i no gat man i save stretem. 14 Sipos evri samting long laef blong yu oli stap ron gud nomo, i gud yu glad long hem. Be sipos oli no ron gud, i gat tu samting we i moa gud yu stap tingbaot, wan we man i harem gud, mo narawan, we man i harem nogud. Tufala samting ya, God nomo i mekem, mo i no gat man i save makem wanem samting bambae i kamtru.

15 "Laef ya blong mi i blong nating nomo, be long taem ya we mi mi stap, mi luk plante samting. Mi luk we samtaem, gudfala man i save ded kwiktaem nomo, mo man we i nogud i save stap gogo i olfala gud. 16 From samting ya, i nogud yu stap traehad tumas blong kam gud moa, no blong kam waes moa, gogo i bitim mak. ?From wanem yu wantem kilim yu yu ded? 17 Mo long sem fasin tu, i nogud yu letem yu yu kam nogud we i nogud, no yu kam krangke we i krangke. ?From wanem yu wantem ded we i no kasem taem blong yu yet? 18 I nogud yu go tumas long tufala rod ya, i moa gud yu stap samples long medel. Sipos yu yu man blong ona long God, bambae yu no save lus.

19 "Waestok i save givhan moa long man, i winim we ten lida oli save givhan long wan taon.

20 "I no gat man long wol ya se i no save mekem mastik, we oltaem i stap mekem i stret nomo.

21 "I nogud yu stap lesin long evri toktok we man i stap talem. Maet samtaem yu harem man blong wok blong yu i singaot* trabol i kam long yu. 22 Mo yu save, plante taem, yu tu yu singaot trabol i kam long narafala man.

23 "Mi mi stap yusum waes ya we mi gat, blong traem ol tok ya we mi stap talem. Oltaem mi mi wantem tumas blong kam waes man tru, be mi no naf long hem, samting ya i strong tumas long mi. 24 ?Olsem wanem bambae man i save faenemaot mining blong laef? Mining blong hem i haed we i haed, mo i had blong yumi luksave. 25 Be nating, oltaem long laef blong mi, mi stap mekem tingting blong mi i strong blong mi lan, mo blong mi gat save. Mi mi wantem tumas blong kasem waes, mo blong faenem ol ansa blong ol kwestin blong mi. Mi wantem savegud from wanem man nogud i stap mekem i krangke, mo from wanem man we i no gat hed i stap mekem i krangke moa.

26 "Mi mi luk wan samting we i save mekem man i harem nogud moa, i winim ded. Hemia woman ya we fasin blong hem blong laekem man i holem man olsem wan trap, no wan net, mo we han blong hem we i putum i goraon long man i holem hem olsem wan jen.* wan samting we i save mekem yumi harem nogud moa, i winim ded, we hemia woman. Fasin blong hem we i laekem yu bambae i holem yu olsem wan trap, no wan net. Mo han blong hem we i putum i goraon long yu bambae i holem yu olsem wan jen. Man we i stap mekem ol samting we God i glad long hem, hem nomo i save ronwe long woman olsem, be man nogud i no save aot long trap blong hem. 27 Mi mi stap faenemaot ol samting ya smosmol nomo, long taem ya we mi stap lukaot ol ansa blong ol kwestin ya. 28 Mi stap lukaot ol narafala ansa, be mi no faenem wan nating. Long saed blong man, mi mi faenem we i gat wanwan nomo we mi save ona long olgeta, be long saed blong woman, mi no faenem wan woman nating we mi save ona long hem. 29 Mi faenemaot se taem God i mekem yumi, yumi stret nomo, be yumi nomo, yumi stap mekem laef blong yumi i paspas olbaot.