HIBRUS 1

God i yusum Pikinini blong hem blong tok long yumi

1 Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin. 2 Be naoia we i klosap taem we wol ya bambae i finis, hem i yusum Pikinini blong hem blong toktok long yumi. Pikinini ya, hem i stap wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.