1 Nao Hae God i toktok bakegen long Profet Jona, i talem se, 2 "Jona. Yu go long bigfala taon ya Nineve, yu talemaot tok blong mi we bambae mi givim long yu." 3 Nao hem i girap, i go long Nineve olsem we Hae God i talem long hem. Taon ya i bigwan we i bigwan, we man i save wokbaot tri dei blong kasem narasaed blong hem. 4 ✝Nao hem i go insaed long taon ya, i wokbaot wan ful dei, mo biaen, hem i talemaot tok ya long olgeta. Hem i talem se, "Olgeta. !Yufala i lukaot! !Foti dei nomo i stap, nao God bambae i spolemgud bigfala taon ya blong yufala!"

5 Nao ol man Nineve oli bilif long tok ya blong God. Mo olgeta man, i stat long ol haeman i go kasem ol olbaot man, oli tanem tingting blong olgeta from ol rabis fasin blong olgeta, nao oli livim kakae, mo oli putum ol rabis klos blong soemaot we oli harem nogud tumas from sin blong olgeta.

6 Taem king blong Nineve i harem nius ya, hem i aot long jea blong hem, nao i tekemaot flas klos blong hem, i putum rabis klos, i go sidaon long asis faea. 7 Nao hem i sanem tok i go long ol man Nineve, i talem se, "Mi mi king blong yufala. Mi wetem ol haeman blong mi, mifala i putum tok ya, se yumi evriwan, ol man, wetem ol buluk mo ol sipsip blong yumi, bambae yumi no kakae wan samting, yumi no dring wan samting. 8 Yumi mas putum ol rabis klos nomo, mo yumi mas fasem ol rabis blangket long ol anamol blong yumi, olsem klos blong olgeta. Mo yumi evriwan i mas prea strong long God, mo yumi mas lego ol rabis fasin blong yumi, mo yumi no moa mekem i strong tumas long ol man blong spolem olgeta. 9 Sipos God i luk ol samting ya, maet hem i save jenisim tingting blong hem, i no moa kros long yumi, nao bambae yumi no save ded."

10 Taem God i luk ol samting ya we oli mekem, mo we oli lego ol rabis fasin blong olgeta, hem i jenisim tingting blong hem, i no panisim olgeta olsem we hem i talem fastaem.