1 Ol gol blong yumi

we fastaem i saen we i saen

naoia i no moa saen,

i kam doti we i doti.

Mo ol ston blong haos* blong Hae God,

naoia oli stap wanwan olbaot long ol rod.

2 Ol yang man blong Saeon,*

fastaem oli gudfala tumas

olsem gol we i beswan,

be naoia ol man oli stap spolemgud olgeta,

nao oli kam olsem graonpot

we i blong nating nomo.

3 Nating we wael dog,

be i stap fidimgud ol pikinini blong hem.

Be ol man ya blong mi

naoia oli kam olsem pijin ya ostrij*

we i stap mekem i strong tumas

long ol pikinini blong hem,

i no stap lukaot gud long olgeta.

4 Ol man ya oli stap letem

ol smosmol pikinini blong olgeta

oli stap hanggri mo oli tosta

gogo oli ded from.

Taem ol pikinini oli stap askem kakae,

be i no gat man i save givim kakae long olgeta.

5 Ol man we bifo

oli stap kakae ol nambawan kakae,

naoia oli stap ded nomo long rod from hanggri.

Olgeta we oli gruap long haos blong ol haeman,

naoia oli stap skrasem ol doti

blong faenem kakae blong olgeta.

6 ✝God i panisimgud ol man blong mi,

i winim we hem i panisim ol man Sodom bifo,

ples ya we hem i flatemgud wantaem nomo

long paoa blong hem.

7 Ol haeman blong yumi,

bifo oli klin gud,

bodi blong olgeta i saen olsem sno.

Oli strong, mo oli smat,

mo i no gat sik i kasem olgeta.

8 Be naoia oli stap olbaot long rod,

we man i no moa save luksave olgeta.

Fes blong olgeta i kam narafala,

mo skin blong olgeta

i fas gud long bun blong olgeta,

mo i kam drae olsem wud.

9 Olgeta we oli no gat kakae

nao oli hanggri gogo oli ded,

oli harem nogud moa i winim olgeta

we oli ded wantaem nomo

long naef blong faet.

10 ✝Trabol ya we i kasem ol man blong mi,

i mekem olgeta

oli mekem samting we i nogud olgeta.

Ol mama we fasin blong olgeta i gud tumas,

be oli girap oli kilim ol pikinini blong olgeta,

oli kukum olgeta blong oli kakae.

11 Hae God i kros tumas

nao i no moa save holem kros blong hem.

Hem i spolemgud Saeon long faea

we i bonemgud ples ya

gogo graon nomo i stap.

12 Bifo i no gat man i bilif se enemi i save go insaed

long ol doa* blong stonwol blong Jerusalem,*

nating we ol king blong ol narafala kantri,

be oli luk se oli no naf blong go insaed.

13 Be ol enemi oli go insaed,

from we ol profet blong ples ya oli mekem sin,

mo ol pris tu oli mekem i no stret.

Olgeta ya oli stap kilim ol stret man oli ded.

14 Ol lida blong ples ya oli stap go olbaot

long ol rod olsem ol blaen man.

Blad i fulap long han blong olgeta,

nao man i no save tajem olgeta,

mo nating we klos blong olgeta nomo,

be man i no save tajem.

15 Ol man oli stap singaot long olgeta se,

"!Ei! !Yufala i gowe!

!Yufala i doti long fes blong God ya!

!Yufala i no tajem mifala!"

Nao olgeta oli stap go olbaot long evri ples,

oli aot long wan ples

oli go stap long narafala ples,

be i no gat man i singaot olgeta

blong oli kam stap wetem hem.

16 Hae God i no moa tingbaot olgeta,

hem nao i mekem olgeta oli go wanwan.

Hem i no moa ona long ol pris

mo ol lida blong yumi.

17 Bifo yumi stap lukluk

blong man i kam givhan long yumi,

be no,

yumi stap lukluk blong nating nomo.

Yumi stap wet long kantri ya

we i fren blong yumi

blong i kam givhan long yumi,

be hem i no save mekem.

18 Ol enemi ya blong yumi

oli stap wajemgud yumi blong kilim yumi.

Nao from samting ya,

yumi no moa save wokbaot long taon blong yumi.

Taem blong yumi i finis nao.

19 Ol enemi ya oli save ron kwik tumas,

olsem we pijin ya igel*

i flae i kamdaon kwiktaem nomo.

Oli ronem yumi antap long ol hil,

mo oli haed long draeples

blong kasem yumi,

nao oli holem yumi.

20 King ya we Hae God i bin putumap,

we yumi trastem hem

blong hem i holem laef blong yumi,

i blokem yumi

blong ol enemi oli no kam insaed long ples blong yumi,

be ol enemi ya oli kam tekemaot hem,

oli karem hem i go.

21 Ol man Edom mo ol man Uj,

yufala i gohed, yufala i laf fastaem.

I gud yufala i glad

olsem we yufala i wantem.

Bambae trabol i kasem yufala yet ya.

Yufala tu bambae i wokbaot

olsem we yufala i drong

we yufala i stap neked nomo,

yufala i sem.

22 Ol man Jerusalem,

panis blong yumi from ol sin blong yumi

i finis nao.

Hae God bambae i no save letem

blong yumi stap wok slef* longtaem.

Be yufala ol man Edom,

Hae God bambae i panisim yufala tu,

bambae i mekem ol sin blong yufala

i stap long klia ples nomo.