1 Hae God,

plis yu tingbaot trabol ya we i kasem mifala.

Yu luk, mifala i sem tumas.

2 Ol graon blong mifala,

naoia oli stap long han blong ol strenja.

Ol man blong narafala ples,

naoia oli stap long ol hom blong mifala.

3 Ol enemi oli kilim ol papa blong mifala,

nao ol mama blong mifala oli kam wido.

4 Naoia, nating we wota we i blong mifala nomo,

mo faeawud we i blong mifala,

be mifala i mas pem.

5 Ol enemi oli stap fosem mifala tumas

blong mekem wok blong olgeta.

Nating we mifala i taed tumas

be oli no save givim spel long mifala.

6 Mifala i bin go long Ijip mo Asiria,

mifala i stap askem kakae long olgeta,

blong mifala i save stap laef.

7 Ol bubu blong mifala bifo oli mekem sin,

be olgeta evriwan oli ded finis,

mo naoia mifala i stap harem nogud

from sin ya blong olgeta.

8 Ol man ya we oli stap rulum mifala,

oli no gat nem, oli olsem slef* nomo,

mo i no gat man i save tekemaot mifala

long han blong olgeta.

9 Ol man blong kilim man

oli stap wokbaot olbaot long bus,

mo taem mifala i go lukaot kakae blong mifala,

be mifala i mas rere

blong lusum laef blong mifala.

10 Mifala i hanggri tumas

nao mifala i fiva from.

Mifala i fiva

gogo bodi blong mifala

i hot we i hot olsem faea.

11 Long tabu hil ya Saeon,*

be ol enemi oli fosem ol woman blong mifala

blong slip wetem olgeta.

Mo long evri vilej long Juda,*

oli fosem ol dota blong mifala tu

blong slip wetem olgeta.

12 Oli tekem ol lida blong mifala,

oli hangem olgeta,

oli no ona nating

long ol olfala blong mifala.

13 Oli fosem ol yang man blong mifala,

blong granem wit* i kam flaoa

long ol bigfala ston we i hevi tumas.

Ol pikinini boe blong mifala

oli stap karem ol wud we i hevi tumas.

14 Ol olfala blong mifala

oli no moa stap sidaon

long doa* blong stonwol blong taon ya,

mo ol yangfala blong mifala

oli no moa mekem stringban.

15 Naoia mifala i no moa save glad,

mifala i no moa stap danis,

mifala i stap krae nomo.

16 Ol samting we bifo

mifala i stap praod long hem,

naoia i no moa gat wan i stap.

Mifala i mekem sin,

nao trabol i kasem mifala.

17 Mifala i stap harem nogud tumas,

nao mifala i stap krae gogo

mifala i no moa save lukluk,

18 from we hil ya Saeon i stap

we i no gat man nating long hem,

mo i kam ples blong ol wael dog nomo.

19 Be yu, Hae God,

yu yu King we yu stap oltaem nomo.

Yu bambae yu stap rul

gogo i no save finis.

20 ?From wanem yu lego mifala

longtaem tumas olsem?

?Olsem wanem?

?Yu no save tingbaot mifala bakegen?

21 Plis yu tekem mifala i kambak long yu.

Plis yu leftemap mifala bakegen,

blong mifala i save harem gud bakegen olsem bifo.

22 ?No olsem wanem?

?Yu lego mifala olgeta?

?Kros blong yu bambae i no save finis?