1 Nao Hae God i givim ol rul long Moses mo Hae Pris Eron 2 blong tufala i go talemaot long ol laen* blong Isrel.* Hem i talem se, "Sipos wan man i gat wan sik long samting blong hem, nao i gat wota blong sik ya i stap ronaot, wota ya i doti long fes blong mi. 3 Nating we sik ya i mekem man ya i no save pispis no hem i save pispis, be wota ya i doti yet, mo i mekem man ya i doti long fes blong mi. 4 Nao sipos man ya i sidaon long wan bed, no i ledaon long hem, bambae bed ya tu i kam doti long fes blong mi. 5,6 Mo sipos narafala man i tajem bed ya, no i sidaon long wan samting we man ya i sidaon long hem, hem i mas wasem ol klos blong hem, mo i mas swim, mo bambae hem i stap doti long fes blong mi go kasem long sapa. 7 Mo sipos narafala man i tajem bodi blong man we i gat sik ya, hem i mas wasem ol klos blong hem, mo i mas swim, mo bambae hem tu i stap doti olsem go kasem long sapa. 8 Mo sipos man we i gat sik ya i spet long wan narafala man we i klin long fes blong mi, man ya i mas wasem ol klos blong hem, mo i mas swim, mo bambae hem tu i stap doti olsem go kasem long sapa. 9 Mo sipos man we i gat sik ya i sidaon long wan sadel blong dongki no kamel no wanem, bambae sadel ya i kam doti long fes blong mi. 10 Mo sipos wan man i tajem sadel ya, no blangket we sadel ya i sidaon long hem, no i karem wan samting olsem, hem i mas wasem ol klos blong hem, mo i mas swim, mo bambae hem tu i stap doti olsem go kasem long sapa. 11 Mo sipos man we i gat sik ya i no wasem han blong hem, be i tajem narafala man, narafala man ya i mas wasem ol klos blong hem, mo i mas swim, mo bambae hem i stap doti olsem go kasem long sapa. 12 Sipos man we i gat sik ya i tajem wan graonpot, ol man oli mas brebrekem graonpot ya, no sipos hem i tajem wan besin we oli wokem long wud, ol man oli mas wasemgud besin ya.

13 "Nao sipos sik ya i finis, mo wota ya i no moa ronaot, man ya i mas stap olsem go kasem seven dei bakegen, nao i mas wasem ol klos blong hem, mo i mas swim long wota we oli kasem long springwota, nao bambae i kam klin bakegen long fes blong mi. 14 Mo long namba eit dei blong hem, hem i mas tekem tu sotleg* no tu nawimba, i kam givim long pris long doa blong yad blong Haos Tapolen blong mi. 15 Nao pris i mas kilim wan long tufala pijin ya blong mekem spesel sakrefaes blong tekemaot sin blong man ya, mo i mas kilim narawan blong mekem sakrefaes ya we i blong bonem i bon evriwan blong mekem wosip long mi. Long fasin ya bambae i mekem man ya i kam klin bakegen long fes blong mi.

16 "Mo bakegen, enitaem, sipos wota blong man i sut i kamaot long bodi blong hem, bambae samting ya i mekem hem i doti long fes blong mi, nao man ya i mas swim evriwan, mo bambae hem i stap doti long fes blong mi go kasem long sapa. 17 Sipos wota ya i go long wan samting we oli wokem long kaliko no long skin blong anamol, oli mas wasem samting ya, mo bambae samting ya i stap doti long fes blong mi go kasem long sapa. 18 Mo sipos man wetem woman, tufala i slip wanples, biaen, tufala i mas swim, mo bambae tufala i stap doti long fes blong mi go kasem long sapa.

19 "Mo sipos wan woman i gat sik blong woman, bambae hem i kam doti long fes blong mi, mo bambae i stap doti olsem go kasem seven dei. Mo sipos man no woman i tajem hem long taem ya, bambae hem tu i kam doti long fes blong mi, mo bambae hem i stap doti olsem go kasem long sapa. 20 Mo sipos woman olsem i sidaon long wan samting, no i ledaon long wan samting, bambae samting ya i kam doti long fes blong mi. 21-23 Mo sipos man no woman i tajem bed blong woman olsem, no wan samting we woman olsem i sidaon long hem, hem i mas wasem ol klos blong hem, mo i mas swim, mo bambae i stap doti olsem go kasem long sapa. 24 Mo sipos wan man i slip wetem wan woman olsem, sik blong woman ya bambae i mekem hem tu i doti long fes blong mi, mo bambae i stap doti olsem go kasem seven dei. Mo sipos man ya i ledaon long wan bed, bed ya tu bambae i kam doti long fes blong mi.

25 "Mo sipos wan woman i gat wan sik, we i mekem we sik blong woman i no kam long hem long stret taem blong hem, i stap kam oltaem nomo, no i mekem we sik ya i kam long stret taem blong hem be i no finis kwik, i stap gohed longtaem, bambae woman ya i kam doti long fes blong mi, mo bambae i stap doti olsem gogo kasem we sik ya i finis long hem. Sik ya i mekem woman ya i doti, sem mak nomo olsem we hem i gat sik blong woman. 26 Nao long taem ya we hem i gat sik ya, sipos hem i ledaon long wan bed, no i sidaon long wan samting, bed ya no samting ya bambae i kam doti long fes blong mi. 27 Mo sipos man no woman i tajem wan long ol samting ya, hem tu bambae i kam doti long fes blong mi, mo i mas wasem ol klos blong hem, mo i mas swim, mo bambae i stap doti olsem go kasem long sapa. 28 Mo sipos sik ya i finis long woman olsem, hem i mas stap olsem go kasem seven dei bakegen, nao bambae hem i kam klin long fes blong mi. 29 Mo long namba eit dei blong hem, hem i mas tekem tu sotleg no tu nawimba, i kam givim long pris long doa blong yad blong Haos Tapolen blong mi. 30 Mo pris i mas kilim wan long tufala pijin ya blong mekem spesel sakrefaes long hem blong tekemaot sin blong woman ya, mo i mas kilim narawan blong mekem sakrefaes ya we i blong bonem i bon evriwan blong mekem wosip long mi. Long fasin ya, bambae woman olsem i kam klin bakegen long fes blong mi."

31 Nao Hae God i talem se, "Yutufala i mas tok strong long ol man ya blong mi, blong oli no mestem rod long ol samting ya we i save mekem yufala i kam doti long fes blong mi. Haos Tapolen blong mi i stap stret long medel blong yufala, mo yufala i no mas mekem hem i kam doti olsem. Sipos yufala i mekem i kam doti, bambae yufala i mas ded from.

32,33 "Hemia nao ol rul blong olgeta we oli doti long fes blong mi. Man we i gat wan sik i stap long samting blong hem nao wota blong sik ya i stap ronaot, mo man we wota blong man i sut i kamaot long bodi blong hem, mo woman we i gat sik blong woman, mo woman we i stap luk sik blong hem long taem we i no stret taem blong hem, mo man we i go slip wetem woman we i gat sik blong woman, olgeta ya oli kam doti long fes blong mi, mo hemia nao ol rul we oli mas folem."