1 Nao Hae God i givim tok blong hem long Moses bakegen, 2-5 ✝blong hem i go talemaot long ol laen* blong Isrel.* Hem i talem se, "Mi mi Hae God, mi God blong yufala. Fastaem yufala i stap long kantri ya Ijip, mo naoia mi stap tekem yufala i go long kantri ya Kenan,* be bambae yufala i no mas folem ol fasin nogud blong ol man blong tufala kantri ya. Yufala i mas obei long ol loa blong mi, mo yufala i mas folem ol tingting blong mi. Sipos yufala i mekem olsem, bambae yufala i gat laef.

6 "Mi mi Hae God. I tabu blong wan long yufala i go slip wetem wan famle blong hem.

7 "I tabu blong man i go slip wetem stret mama blong hem, from we woman ya i bonem hem. Fasin olsem i soemaot we hem i no ona long papa blong hem nating.

8 ✝"Mo i tabu blong man i go slip wetem woman we i narafala woman blong papa blong hem. Fasin ya tu i soemaot we hem i no ona long papa blong hem nating.

9 ✝"Mo i tabu blong man i go slip wetem stret sista blong hem we tufala i gat sem papa mo sem mama, no sista blong hem we papa blong tufala i bonem gel ya fastaem long narafala woman, no we mama blong tufala i bonem gel ya fastaem long narafala man. Nating we tufala i gruap long sem haos no wan i gruap long narafala haos, be i tabu blong man i mekem olsem.

10 "Mo i tabu blong man i go slip wetem smol bubu gel blong hem. Nating we boe blong hem i bonem gel ya, no gel blong hem i bonem, be i tabu blong man i mekem olsem. Fasin ya bambae i spolem nem blong hem.

11 "Mo i tabu blong man i go slip wetem gel we narafala woman blong papa blong hem i bonem fastaem long narafala man. Gel ya i wan sista blong hem.

12 ✝"Mo i tabu blong man i go slip wetem sista blong papa blong hem, from we i klosap tumas long papa blong hem.

13 "Mo i tabu blong man i go slip wetem sista blong mama blong hem, from we i klosap tumas long mama blong hem.

14 "Mo i tabu blong man i go slip wetem woman blong wan narafala papa blong hem. Fasin ya i soemaot we hem i no ona long narafala papa ya blong hem nating.

15 ✝"Mo i tabu blong man i go slip wetem woman blong stret pikinini blong hem from we woman ya i woman blong pikinini blong hem. I tabu blong man i mekem olsem.

16 ✝"Mo i tabu blong man i go slip wetem woman blong brata blong hem. Fasin ya bambae i soemaot we hem i no ona long brata blong hem nating.

17 ✝"Mo i tabu blong man we i stap slip wetem wan woman i girap, i go slip wetem dota blong woman ya, no wetem smol bubu gel blong woman ya. Trifala ya i wan famle nomo. Fasin ya i no stret nating.

18 "Mo i tabu blong man i tekem sista blong woman blong hem i kam narafala woman blong hem long taem we woman blong hem i stap laef yet.

19 ✝"Mo i tabu blong man i go slip wetem woman long taem we sik blong woman i stap long hem, from we woman olsem i doti long fes blong mi.

20 ✝"Mo i tabu blong man i go slip wetem woman blong narafala man, from we fasin ya bambae i mekem man ya i doti long fes blong mi.

21 ✝"Mi mi Hae God, mi God blong yufala, mo i tabu blong wan long yufala i kilim pikinini blong hem, i bonem long faea blong mekem sakrefaes long god ya Molek, from we fasin ya bambae i spolem hae nem blong mi.

22 ✝"Mo i tabu blong man i go slip wetem narafala man, from we fasin ya i nogud we i nogud olgeta.

23 ✝"Mo i tabu blong man no woman i go long anamol. Fasin ya i krangke, mo i mekem man i doti long fes blong mi.

24 "Olgeta fasin ya oli save mekem yufala i doti long fes blong mi. Bambae yufala i no mas mekem olgeta, from we yufala i mas klin long fes blong mi. Ol man Kenan oli hiten man, mo ol fasin ya nao i mekem olgeta i doti long fes blong mi. From samting ya, bambae mi ronemaot olgeta blong tekem yufala i go stap long kantri ya. 25 Ol fasin ya blong olgeta i mekem graon blong olgeta i kam doti long fes blong mi, nao mi bambae mi spolem graon ya, mi mekem i kam nogud, mo graon ya bambae i mekem we olgeta oli aot long hem. 26,27 Ol man ya oli stap mekem ol samting we i nogud we i nogud olgeta, we i mekem graon ya blong olgeta i kam doti long fes blong mi, be yufala i no mas mekem ol samting ya. Nating we yufala i laen blong Isrel, no yufala i narafala man, be yufala evriwan i mas obei long ol loa blong mi, mo yufala i mas folem ol tingting blong mi. 28 Mo sipos yufala i obei long ol tok ya blong mi, graon ya bambae i no kam nogud long yufala, nao bambae hem i no mekem yufala tu i aot long hem, olsem we bambae i mekem long olgeta. 29 Be sipos man i mekem wan nomo long ol samting ya we i nogud we i nogud, be bambae mi mi no moa save kaontem hem, se i man blong mi.* long 7.20.

30 "Mi mi Hae God, mi God blong yufala, mo yufala i no mas folem ol fasin nogud ya blong olgeta ya we oli stap fastaem long kantri ya we bambae yufala i go long hem. Bambae yufala i no mas mekem ol samting we i mekem yufala i doti long fes blong mi, yufala i mas folem ol tok ya we mi mi givim long yufala."