Mateus 4

Setan i traem Jisas blong mekem hem i foldaon

1 ✝ 4.1: Hib 2.18; 4.15 Nao Tabu Spirit i lidim Jisas i go long draeples, blong Setan* i traem hem. 2 Nao Jisas i livim kakae, blong i prea, mo i no kakae gogo kasem foti dei mo foti naet, mo biaen hem i hanggri tumas. 3 Nao Setan, man ya blong traem man, hem i kam talem long hem se, "Sipos yu yu Pikinini blong God, yu talem long ol ston ya blong oli kam bred*."

4 ✝ 4.4: Dut 8.3 Be Jisas i talem long hem se, "Baebol i talem se,

‘Man i no save laef long kakae nomo.

Evri tok we God i talem,

hemia nao samting blong mekem man i laef.’ "

5 Nao Setan i tekem Jisas i go long Jerusalem*, i putum hem long wan hae ples, antap long haos* blong God, 6 ✝4.6: Sam 91.11,12nao i talem long hem se, "Sipos yu yu Pikinini blong God, yu jam i godaon long graon, from we Baebol i tokbaot God, i talem se,

‘Hem bambae i talem long ol enjel blong hem,

blong oli stap lukaot long yu.

Nao bambae oli holem yu antap,

blong yu no bangem leg blong yu

long ston.’ "

7 ✝ 4.7: Dut 6.16 Be Jisas i talem long hem se, "Be Baebol i talem tu se,

‘Yu no save traem Hae God*

we i God blong yu.’ "

8 Nao bakegen, Setan i tekem Jisas i go antap long wan bigfala hil, mo i soemaot long hem olgeta kantri long wol ya wetem ol gudgudfala samting we oli gat. 9 Nao hem i talem long hem se, "Sipos yu bodaon long mi, yu mekem wosip long mi, bambae mi mi givim olgeta samting ya i go long yu."

10 ✝ 4.10: Dut 6.13 Be Jisas i talem long hem se, "!Setan! !Yu gowe long mi! Baebol i talem se,

‘Yu mas mekem wosip long Hae God

we i God blong yu,

mo bambae yu mas mekem wok blong hem nomo.’ "

11 Nao Setan i gowe long Jisas, mo ol enjel oli kam, oli stap lukaot long hem.