Mateus 8

Jisas i mekem wan man blong wok blong wan kapten blong ol soldia i gud bakegen

5 Taem Jisas i go insaed long taon ya Kapaneam, wan kapten blong ol soldia blong ol man Rom i kam luk hem, i krae long hem, i talem se, 6 "Masta*. Man blong wok blong mi i sik, i stap slip long haos blong mi. Haf bodi blong hem i ded, mo hem i stap harem nogud tumas."

7 Nao Jisas i talem long hem se, "Bambae mi kam, mi mekem hem i gud bakegen."

8 Be kapten ya i talem long hem se, "Masta, mi mi no wan gudfala man. Mi no naf blong yu kam insaed long haos blong mi. Yu jes talem wan tok nomo, nao bambae hem i oraet bakegen. 9 Mi tu mi stap aninit long man we i hae moa long mi, mo i gat ol soldia we oli stap aninit long mi. Sipos mi talem long wan soldia se, ‘Yu go,’ bambae hem i go. Mo sipos mi talem long wan narawan se, ‘Yu kam,’ bambae hem i kam. Mo sipos mi talem long wan man blong mi se, ‘Yu mekem samting ya,’ bambae hem i mekem."

10 Taem Jisas i harem tok ya, hem i sapraes tumas. Nao hem i talem long olgeta we oli biaen long hem se, "Tru mi talem long yufala. Nating we ol laen* blong Isrel*, be mi mi no faenem wan long olgeta nating we bilif blong hem i strong olsem bilif blong man ya. 11 ✝8.11: Luk 13.29Mi mi talem long yufala, se bambae i gat plante man oli aot long saed i go long is mo long saed i go long wes, oli kam. Bambae oli save sidaon wanples blong kakae wetem Ebraham mo Aesak mo Jekob*, long niufala wol ya we God i king long hem. 12 ✝8.12: Mat 22.13; 25.30; Luk 13.28Be ol man ya we God i singaot olgeta fastaem blong oli go insaed long niufala wol ya, bambae hem i sakem olgeta i go afsaed, long ples ya we i tudak, we ol man oli stap krae, mo oli stap harem nogud tumas, oli stap kakae tut blong olgeta from."

13 Nao Jisas i talem long kapten ya se, "Yu yu save gohom. Bambae samting ya i kamtru long yu, stret olsem we yu yu bilif." Mo stret long taem ya nao, bodi blong man ya blong wok blong hem i kam gud bakegen.