1 Nao Nomi i talem long Rut se, "Dota blong mi. I gud mi lukaot wan man, blong i tekem yu, blong yu save gat ples blong yu we yu save stap gud long hem. 2 Yu yu save, man ya Boas we yu stap wok wetem ol woman blong wok blong hem, hem i wan famle blong man blong mi, we i stret blong hem i tekem yu. Yu lesin. Long sapa ya, taem we win i blu, hem wetem ol man blong hem bambae oli go klinimaot ol skin blong bale,* blong tekem kakae blong hem. 3 I gud yu go swim, yu putum senta, mo yu putum gudfala klos blong yu mo kot blong yu, nao yu go long ples we bambae hem i stap wok long hem. Be yu no mas letem blong hem i save we yu yu stap long ples ya. Taem hem i kakae finis, 4 nao i go blong slip, bambae yu mas luklukgud ples ya, nao yu mas go tekemaot blangket long leg blong hem, mo yu mas slip klosap long leg blong hem. Nao hem bambae i talemaot long yu wanem samting we bambae yu mekem."

5 Nao Rut i talem se, "I gud. Bambae mi mekem olgeta samting ya we yu yu talem."

6 Nao hem i go swim, i putum senta, i putum klos blong hem, nao i go haed klosap long ples ya we oltaem oli stap klinimaot ol kakae blong bale long hem, olsem we Nomi i talem. 7 Taem Boas i kakae, mo i dring gogo i harem gud, hem i go slip klosap long hip blong bale. Nao Rut i wokbaot smosmol i go, i tekemaot blangket long leg blong Boas, nao i ledaon klosap long leg blong hem. 8 Long medel naet, man ya i sek, i wekap, i tanem hem, nao i sapraes blong luk we wan woman i stap ledaon klosap long leg blong hem, 9 nao hem i talem se, "!Ei! ?Hu ya?"

Nao woman ya i talem se, "Mi Rut ya, woman blong wok blong yu. Yu yu wan famle blong man blong mi, mo i stret blong yu tekem mi. Plis yu tekem mi, mi woman blong yu."

10 Nao hem i talem se, "Rut. Prea blong mi we Hae God bambae i blesem yu, from we fasin ya we yu mekem naoia, i gudfala moa, i winim ol samting we yu mekem long mama blong man blong yu. Yu yu no go blong faenem wan yang man we i rijman no i puaman, blong yu mared long hem, be yu ona long famle blong mifala. 11 Yu no fraet. Olgeta man long ples ya oli save we yu yu wan gudfala woman. Bambae mi mekem olgeta samting ya we yu talem. 12 ✝I tru we mi mi wan famle blong man blong yu, be i gat wan man i stap, we i klosap moa long man blong yu, i winim mi. 13 I gud yu stap long ples ya go kasem moning, nao long moning bambae mi traem askem long hem. Sipos hem i glad blong tekem yu blong lukaot long yu, bambae i olsem. Be sipos no, mi talem tru long yu long nem blong Hae God ya we i laef, i stap we i stap, se mi bambae mi tekem yu, mi lukaot long yu. Yu save stap long ples ya go kasem moning."

14 Nao hem i slip long ples ya, klosap long leg blong man ya, go kasem moning. Be taem i haftudak yet, hem i girap, from we Boas i fraet se i nogud man i save we woman ya i kam stap long ples ya. 15 Nao Boas i talem long hem se, "Yu tekemaot longfala kot ya blong yu, yu stretem long ples ya, blong mi kafsaedem sam bale i go long hem." Nao hem i mekem olsem, mo Boas i kafsaedem bale i go long hem we klosap i kasem twanti kilo. Nao hem i givhan long Rut blong i leftemap kot ya we i fulap long bale, nao Rut i karem, i gobak long taon.

16 Nao taem hem i kamtru long haos, Nomi i askem long hem se, "Dota blong mi. ?Olsem wanem?"

Nao hem i talem long hem se, "O, man ya i kaen tumas long mi, mo hem i promes se bambae i stretem bisnes blong mared blong mi. 17 Mo hem i givim bale ya long mi, from we i talem se, ‘I nogud yu gobak long mama blong man blong yu, we yu no gat samting long han blong yu.’ "

18 Nao Nomi i talem long hem se, "I gud yumi wet nomo blong luk ol samting we bambae i kamtru, from we man ya bambae i no save sidaon, gogo i stretem bisnes ya tede."