1 Nao Boas i go long bigfala doa* blong stonwol blong taon ya, we i ples we ol man oli mekem miting long hem, nao i sidaon i wet. Nao i no longtaem, famle ya blong Elimelek we i klosap moa long Elimelek i winim hem, we hem i bin tokbaot finis long Rut, hem i pas long ples ya. Nao hem i talem long man ya se, "Ei, brata. Yu kam sidaon long ples ya." Mo man ya i kam sidaon wetem hem. 2 Nao hem i singaot ten lida blong olgeta long taon ya, i talem long olgeta se, "Plis, yufala i kam sidaon long ples ya." Nao olgeta oli kam sidaon, 3 mo hem i talem long man ya se, "Nomi i aot long Moab, i kambak long ples ya finis, mo hem i wantem salem pis graon ya we i blong Elimelek ya we i famle blong yumi. 4 Nao mi mi wantem talemaot long yu, se sipos yu wantem pis graon ya, i gud yu pemaot long fes blong ol man ya we oli stap sidaon long ples ya, mo long fes blong ol lida ya blong yumi. Sipos yu wantem, i gud yu pemaot. Be sipos yu no wantem, i gud yu talemaot long mi blong mi save, from we yu yu fas man we yu gat raet blong pemaot, be sipos yu yu no pem, mi mi seken man we mi gat raet blong pemaot."

Nao man ya i talem se, "Mi bambae mi pemaot."

5 Nao hem i talem se, "Oraet, sipos yu pemaot graon ya long Nomi, semtaem nomo bambae yu tekem woman Moab ya Rut, we i wido blong man ya we i ded.* woman Moab ya Rut, we i wido blong man ya we i ded. Long fasin ya, bambae i gat pikinini blong karem nem blong man ya bakegen, long graon blong hem."

6 Nao man ya i talem se, "Sipos i olsem, mi mi no save yusum raet blong mi blong pemaot graon ya, from we bambae i spolem ol bisnes blong graon blong mi. I gud yu tekem ples blong mi, yu pemaot graon ya. Mi mi no save tekem."

7 ✝Long kastom blong yumi bifo, taem we man i pemaot graon long narafala man, no tufala i jenjenisim graon blong tufala, i gat wan fasin i stap blong makem bisnes ya. Oltaem, man we i salem graon i mas tekemaot sandel blong hem, i givim long man we i pemaot graon ya, blong soemaot we ol bisnes blong graon ya i stret.

8 Nao taem man ya i talem long Boas se, "I gud yu yu pemaot graon ya," hem i tekemaot sandel blong hem, i givim long Boas.* 9 Nao Boas i talem long ol lida blong olgeta mo long ol narafala man blong ples ya se, "Yufala evriwan i witnes blong mi. Tede, mi mi pemaot olgeta samting ya long Nomi. Naoia, olgeta samting we i blong Elimelek, mo blong Kilion, mo blong Malon oli blong mi. 10 ✝Mo woman Moab ya Rut, we i wido blong Malon, mi pemaot hem blong i kam woman blong mi, blong bambae i gat pikinini blong karem nem blong man ya bakegen long graon ya blong hem. Nao nem blong dedman ya bambae i no save lus long fes blong ol brata blong hem, mo long fes blong yumi evriwan long ples ya blong hem. Tede, yufala evriwan i witnes blong mi long bisnes ya."

11 ✝Mo ol lida wetem ol narafala man long ples ya oli talem se, "Yes, i gud. Mifala i witnes blong yu. Prea blong mifala we Hae God bambae i mekem we woman ya we i kam long haos blong yu, bambae i olsem Rejel mo Lea bifo, we tufala i bonem ol pikinini blong Jekob* ya bifo, we yumi kamaot biaen long hem. Nao bambae yu yu kam wan rijman, mo yu kam wan haeman long taon ya blong yumi.* 12 ✝Ol pikinini we Hae God bambae i givim long yutufala, bambae oli mekem famle blong yu i olsem famle blong Peres, we papa blong hem Juda* ya bifo, mo mama blong hem Tamara."

13 Nao Boas i tekem Rut i go long ples blong hem, mo tufala i mared. Mo Hae God i blesem woman ya, nao hem i gat bel, mo i bonem wan boe. 14 Nao ol woman oli talem long Nomi se, "!Nomi! !Yumi presem Hae God! Tede hem i givim wan smol bubu blong yu long Rut, blong bambae i lukaot long yu. Pikinini ya bambae i kam wan haeman blong yumi ol laen* blong Isrel.* 15 Hem bambae i mekem laef blong yu i kam niuwan bakegen, mo taem yu kam olfala, hem bambae i lukaot long yu. Woman ya we i bonem hem, hem i lavem yu tumas. Sipos yu gat seven pikinini boe blong yu blong givhan long yu, be bambae oli no save givhan gud long yu, olsem we woman ya i mekem." 16 Nao Nomi i tekem pikinini ya, i karem hem, nao i stap lukaot long hem.

17 Nao ol woman ples blong hem oli putum nem blong pikinini ya se Obed, mo oli stap talem se, "Naoia, Nomi i gat wan pikinini blong hem."

Obed ya, hem i papa blong Jese, mo Jese i papa blong King Deved.

18 Ol laen blong Peres ya bifo i olsem. Peres i bonem Hesron, 19 mo Hesron i bonem Ram, mo Ram i bonem Aminadab, 20 mo Aminadab i bonem Nason, mo Nason i bonem Salmon, 21 mo Salmon i bonem Boas, mo Boas i bonem Obed, 22 mo Obed i bonem Jese, mo Jese i bonem Deved.