1 Bifo, i gat wan man i stap we nem blong hem Elkana. Man ya i stap long distrik ya Efrem,* long ples blong hil long taon ya Rama. Papa blong hem Jeroham, mo bubu blong hem Elihu. Olgeta ya oli kamaot biaen long Tohu, we i laen* blong Juf, we oli stap long distrik ya Efrem. 2 Elkana i gat tu woman blong hem, Hana mo Penina. Penina i stap karem pikinini be Hana i no gat. 3 Evri yia, Elkana i stap go long Silo blong mekem sakrefaes, mo blong mekem wosip long Hae God ya we i gat olgeta paoa. Long ples ya, Hofni mo Finehas, tufala pikinini blong pris* ya Ilae i stap, mo tufala i pris blong Hae God. 4 Oltaem, taem Elkana i mekem sakrefaes*, hem i stap givim wan pis mit long Penina, mo wanwan pis long ol pikinini blong hem. 5 Be nating we hem i lavem Hana tumas, hem i stap givim wan pis mit nomo long hem, from we Hae God i no letem hem i karem pikinini. 6 Mo from we Hae God i no letem hem i karem pikinini, oltaem Penina i stap jikim hem, we i mekem hem i harem nogud tumas from.* 6 Be from we Hae God i no letem hem i karem pikinini, oltaem Penina i stap jikim hem, we i mekem hem i harem nogud tumas from. 7 Fasin ya, Hana i stap luk evri yia nomo, taem olgeta oli go long haos blong Hae God blong mekem wosip. Oltaem, Penina i stap mekem i nogud long hem, mo from samting ya, oltaem hem i stap krae, mo i no wantem kakae. 8 Mo taem Elkana i luk samting ya, oltaem hem i stap talem long hem se, "?From wanem yu stap harem nogud, yu stap krae, mo yu no wantem kakae? Mi mi lavem yu tumas. ?Yu no harem se hemia i gud moa long yu, i winim we yu gat ten pikinini boe blong yu mo yu stap harem gud long olgeta?"

9,10 Wan dei, oli stap insaed long yad blong haos ya blong Hae God long Silo, mo taem oli kakae finis, Hana i stap harem nogud yet, i stap krae, nao i girap, i go prea long Hae God. Long taem ya, pris* ya Ilae i stap sidaon long ples blong hem klosap long doa blong haos ya. 11 ✝Nao Hana i mekem wan strong promes long Hae God se, "Hae God, yu yu gat olgeta paoa. !Mi mi woman blong wok blong yu nomo! Be plis yu sore long mi, yu luk long trabol blong mi, yu tingbaot mi. !Plis yu no fogetem mi! Sipos yu letem blong mi mi gat wan pikinini we i boe, mi mi promes se bambae mi givim hem long yu, blong hem bambae i man blong yu oltaem long laef blong hem. Mo blong soemaot we hem i man blong yu, neva bambae oli katem hea blong hem samtaem." 12 Nao hem i gohed, i mekem longfala prea long Hae God, mo pris ya i stap lukluk maot blong hem. 13 Maot blong hem i stap muvmuv, be voes blong hem i no kamaot, from we hem i stap prea kwaet nomo.

Be pris i ting se hem i drong, 14 nao i talem long hem se, "!Ei! !Yu no stap drong long ples ya! !Yu lego fasin ya!"

15 Be hem i talem se, "No Olfala, mi mi no drong ya. Mi mi no dring waen no sam narafala dring olsem. !Mi mi harem nogud ya! Mi stap prea long Hae God. Mi stap talemaot olgeta samting we i stap mekem mi mi trabol tumas. 16 Yu no ting se mi mi wan rabis woman. Mi stap prea olsem, from we mi harem nogud tumas."

17 Nao pris ya i talem long hem se, "Prea blong mi, we God ya blong yumi bambae i givim samting ya long yu we yu yu askem. Yu go. Tingting blong yu bambae i stap kwaet."

18 Nao Hana i talem se, "Plis yu mas tinghevi long mi oltaem." Nao hem i harem gud, i go afsaed, mo i kakae.

19 Nao long nekis dei, long eli moning, Elkana mo ol famle blong hem oli girap, oli mekem wosip long Hae God, nao oli gobak long ples blong olgeta bakegen long Rama. Nao Elkana mo Hana tufala i stap gogo, nao Hae God i ansa long prea blong Hana, 20 mo Hana i gat bel, nao i bonem wan boe, mo i putum nem blong hem se Samuel. Mo hem i talemaot mining blong nem ya se, "Mi mi askem long Hae God blong i givim pikinini ya long mi."

21 Nao long nekis yia blong hem, Elkana wetem ol famle blong hem oli gobak long Silo bakegen blong mekem sakrefaes long Hae God olsem we oli stap mekem evri yia, mo blong mekem spesel sakrefaes ya we Elkana i bin promes blong mekem long hem. 22 Be long taem ya, Hana i talem long hem se, "Bambae mi mi no kam. Taem we pikinini ya i kam bigwan, i livim titi, ale mi jes tekem hem i go long haos blong Hae God, nao bambae hem i stap olwe long ples ya."

23 Mo man blong hem i talem se, "I oraet nomo. Yu mekem olsem we yu ting se i gud. Yu save stap gogo kasem taem we hem i livim titi. Mo prea blong mi we Hae God bambae i mekem tok blong hem i kamtru."* i kamtru. Nao Hana i stap nomo long Rama, i stap lukaot long pikinini blong hem.

24 Nao Hana i stap lukaot long pikinini ya gogo i kam bigwan, i livim titi. Nao long taem we pikinini ya i smol boe yet, Hana i tekem hem i go long haos blong Hae God long Silo. Mo hem i tekem wan bul we i gat tri yia blong hem, wetem ten kilo flaoa, mo wan botel waen we botel ya oli wokem long skin blong nani.** 25 Nao taem oli kilim bul ya finis, oli tekem pikinini ya i go long pris* ya Ilae. 26 Nao woman ya i talem long hem se, "Olfala. ?Yu yu luksave mi? Mi mi woman ya we wan taem bifo, mi stap stanap long ples ya, mi stap prea long Hae God. 27 Mi mi askem wan pikinini long hem, mo hem i ansa long prea blong mi. 28 Nao from samting ya, mi mi kam blong givim pikinini ya i gobak long hem, nao oltaem long laef blong hem bambae hem i man blong wok blong hem."

Nao oli gohed blong mekem wosip long Hae God long ples ya.*