1 Nao long taem ya we ol laen* blong Isrel* oli stap wanples, Profet Samuel i talem long olgeta se, "!Olgeta! Naoia, mi mi mekem finis samting ya we yufala i askem long mi blong mi mekem. Mi putumap king blong yufala finis, blong i rul long yufala, 2 mo naoia, hem i stap wetem yufala, blong i lidim yufala. !Be yufala i luk! Mi mi olfala finis. Hea blong mi i waet, mo tufala pikinini blong mi tufala i bigfala finis, i stap long ples ya wetem yufala. Mi mi bin lidim yufala longtaem, i stat long taem ya we mi mi yangfala, i kam kasem tede. 3 Naoia, mi mi stap long fes blong yufala. Sipos yufala i ting se mi bin mekem wan samting we i no stret, i gud yufala i tok long mi naoia long fes blong Hae God, mo long fes blong king ya blong yumi we hem i jusumaot. Sipos mi bin stilim buluk blong wan man, no dongki blong wan man, no mi bin giagiaman long wan man blong stilim sam samting blong hem, no mi bin mekem i strong tumas long wan man, no mi bin kasem mane long wan man blong haedem rong blong hem, i gud yufala i talemaot blong yumi stretem. Sipos mi bin mekem wan fasin olsem, naoia bambae mi givimbak samting ya we mi tekem."

4 Nao ol man oli talem se, "No, i no gat. Yu yu no bin giagiaman long mifala, mo yu no bin mekem i strong tumas long mifala, mo yu no bin tekemaot samsamting long mifala nating."

5 Nao profet i talem se, "Hae God wetem king ya we hem i jusumaot, tufala nao i witnes long tok ya blong yufala tede, we yufala i talem se mi mi no mekem wan samting nating we i rong."

Mo oli talem se, "Yes, Hae God nao i witnes blong yumi."

6 ✝Nao bakegen, profet i talem se, "Hae God ya, hem i putumap Moses mo Eron blong tufala i lidim ol olfala bubu ya blong yumi bifo, oli aot long Ijip. 7 Naoia, yumi stap stanap long fes blong hem, mo mi wantem blong yufala i tingting gud long ol bigbigfala wok ya we hem i mekem blong sevem yumi, i stat long taem blong ol olfala bubu blong yumi bifo, kam kasem yumi tede. 8 ✝Bifo, olfala stamba ya blong yumi Jekob* wetem ol famle blong hem oli go stap long Ijip, nao biaen, ol man Ijip oli stap mekem i strong tumas long ol bubu ya blong yumi we oli stap kamaot biaen long hem. Nao olgeta ya oli krae long Hae God blong i givhan long olgeta, mo hem i sanem Moses mo Eron, blong tufala i go tekemaot olgeta long Ijip, tufala i lidim olgeta gogo oli kamtru long kantri ya.* ya blong yumi we oli stap kamaot biaen long hem oli krae long Hae God blong i givhan long olgeta, mo hem i sanem Moses mo Eron, blong tufala i go tekemaot olgeta long Ijip, tufala i lidim olgeta gogo oli kam stap long kantri ya. 9 ✝Hae God i God blong olgeta, be taem oli stap finis long graon ya, oli no moa tingbaot hem. Nao hem i letem king blong Moab wetem ol man blong hem oli kam winim olgeta, mo biaen hem i letem Siseraha wetem ol soldia blong taon ya Hajoro, i kam mekem faet long olgeta, oli winim olgeta. Mo biaen bakegen, hem i letem ol man Filistia oli kam winim olgeta. 10 ✝Nao long taem ya ol olfala bubu ya blong yumi oli krae long hem bakegen blong i givhan long olgeta. Oli talem se, ‘!Hae God! !Mifala i mekem i nogud! Mifala i gowe long yu. Mifala i stap mekem wosip long ol pija blong tufala god ya Bal* mo Astate. Plis yu tekemaot mifala long han blong ol enemi ya blong mifala, yu sevem mifala, nao bambae mifala i mekem wosip long yu nomo.’ 11 ✝Nao hem i sanem Barak, mo biaen, Gideon, mo biaen bakegen, Jeftaha, mo laswan, hem i sanem mi.* mo biaen, Bedan, mo biaen bakegen, Jeftaha, mo laswan, hem i sanem mi. Mifala ya, mifala i stap tekemaot yufala long han blong ol enemi blong yumi, mifala i stap sevem yufala, nao yufala i stap gud. 12 ✝Be taem yufala i luk we King Nahas blong Amon klosap i kam blong mekem faet long yumi, yufala i no moa wantem we Hae God i King blong yumi, nao yufala i talem long mi se, ‘Mifala i wantem wan king blong i rul long yumi.’

13 "Oraet, naoia yufala i gat king blong yufala, olsem we yufala i wantem. Yufala i bin krae from king, mo naoia, Hae God i putumap man ya i king blong yufala. 14 Hae God i God blong yumi, mo sipos yufala i stap ona long hem, mo yufala i stap mekem ol wok blong hem, mo yufala i stap lesin long hem, mo yufala i stap obei long ol tok blong hem, mo sipos yufala wetem king ya blong yufala, yufala i stap folem hem oltaem, bambae olgeta samting i oraet nomo long yufala. 15 Be sipos yufala i no lesin long hem, mo yufala i no obei long ol tok blong hem, bambae hem i agensem yufala wetem king ya blong yufala.*

16 "Oraet, bambae yufala i luk wan bigfala samting we Hae God bambae i mekem long fes blong yufala. Yufala i no gowe, yufala i stap long ples ya. 17 Yufala i save we naoia i taem blong tekemaot wit* long garen.* Hemia i no taem blong ren, i taem blong bigsan. Be bambae mi mi prea, mo Hae God bambae i sanem tanda mo ren i kam. Mo taem tufala samting ya i kamtru, bambae yufala i luksave se fasin ya we yufala i mekem, we yufala i askem blong yufala i gat king, hem i wan sin we i nogud tumas long fes blong hem."

18 Nao hem i prea, mo long sem dei ya nomo, Hae God i sanem tanda mo ren i kam, nao ol man oli fraet tumas long hem, mo long profet ya blong hem. 19 Oli talem long hem se, "Plis olfala, yu prea bakegen from mifala. !Yu yu man blong Hae God! Plis yu prea long hem, blong mifala i no ded. Naoia mifala i luksave se mifala i mekem plante samting we i nogud, mo antap long ol samting ya, mifala i mekem i nogud bakegen we mifala i askem blong mifala i gat king."

20 Nao hem i talem long olgeta se, "!Yufala i no fraet! I tru we yufala i bin mekem ol rabis fasin ya, be naoia, yufala i no mas gowe long Hae God. Yufala i mas biaen long hem long olgeta tingting blong yufala. 21 Yufala i no mas lego hem, blong go biaen long ol narafala god ya. !Olgeta oli rabis nomo! !Oli no save givhan long yufala! !Oli no save sevem yufala nating! 22 Hae God i mekem wan strong promes* finis long yufala, se hem bambae i no save lego yufala. Hem i talem finis se yufala i man blong hem. 23 Mo long saed blong mi, oltaem bambae mi mi stap prea from yufala. Sipos mi lego fasin ya, hemia mi mekem sin agens long Hae God ya. Oltaem, bambae mi stap tijim yufala long ol fasin we i gud, mo we i stret blong yufala i mekem. 24 Yufala i mas obei long Hae God. Yufala i mas putum tingting blong yufala i stap strong long hem oltaem, mo yufala i mas biaen long hem long olgeta tingting blong yufala. Mo oltaem, yufala i mas tingbaot ol bigbigfala wok ya we hem i mekem finis blong yufala. 25 Be sipos yufala i stap gogohed blong mekem sin oltaem, bambae hem i spolem yufala yet, wetem king ya blong yufala."