1 ✝Nao Deved i go long Nob* blong luk pris* ya Ahimelek. Mo taem pris ya i luk hem, hem i kamaot blong mitim hem we i fraet, i seksek, nao i askem long hem se, "?From wanem yu kam long ples ya yu wan nomo, i no gat man i kam wetem yu?"

2 Nao hem i talem se, "Mi mi kam long ples ya long bisnes blong king. Be hem i blokem mi se bambae mi no talemaot bisnes ya long wan man. Ol man blong mi bambae oli mitim mi long wan ples we mi talem long olgeta finis. 3 ?Yu yu gat sam kakae i stap, we yu save givim long mi? Mi wantem faef bred* no wanem kakae we yu gat."

4 Nao pris i talem long hem se, "I no gat narafala bred, tabu bred* ya nomo i stap. Be sipos ol man blong yu oli no bin slip wetem woman* las naet, bambae yu save tekem."

5 Nao hem i talem se, "No, ol man blong mi oli no slip wetem woman. Oltaem, taem mifala i go long bisnes blong mifala nomo, be oli stap lukaot gud long olgeta, blong oli stap klin oltaem long fes blong Hae God. Be naoia we mifala i kam long spesel wok blong king, oli stap lukaot gud moa long olgeta."

6 ✝Nao pris i givim ol tabu bred ya long hem from we hemia nomo bred we hem i gat. Oli bin tekemaot long tabu tebol finis, blong putum ol niuwan i go blong jenisim.

7 Long taem ya, i gat wan man blong king i stap, we i bos blong ol man blong lukaot long buluk blong hem. Oli holem hem long ples ya, blong hem i stretem sam bisnes blong hem long fes blong Hae God. Man ya i wan man Edom, we nem blong hem Doeg.

8 Nao Deved i talem long pris ya se, "?Yu gat wan spia no naef blong faet we yu save givim long mi? King i hareap tumas long mi, nao i mekem we mi mi no gat taem blong tekem naef blong faet blong mi, no wan narafala samting blong faet."

9 ✝Nao pris i talem se, "I gat wan naef blong faet i stap, hemia blong Golaeat, man Filistia ya we yu yu kilim bifo long levelples ya Elaha, long medel blong ol hil. Mi rolemapgud long wan kaliko, mi putum i stap biaen long efod.* Sipos yu wantem, yu save tekem. Hemia nomo i wan samting blong faet we mi gat long ples ya."

Nao hem i talem se, "!Hemia nao! I no gat narawan samples we i gud moa i winim hemia. Yu givim long mi."

10 Nao Deved i aot long ples ya, i stap ronwe long King Sol, i go stap wetem King Akis blong taon ya Gat, long Filistia. 11 ✝Nao ol haeman blong king ya oli talem long hem se, "Hemia Deved ya we i king blong kantri blong hem. Hemia nao man ya we ol woman oli stap leftemap nem blong hem, oli stap danis, oli stap singsing se,

‘King Sol i kilim plante taosen man,

be Deved i kilim plante plante

taosen moa,

winim hem.’ "

12 ✝Toktok ya blong olgeta i mekem Deved i fraet tumas long king ya. 13 ✝Nao taem we olgeta oli kam klosap long hem, hem i stap giagiaman se i krangke. Mo taem oli traem holem hem, hem i mekem olsem we i krangke tru. Hem i stap skrasem doa* blong bigfala stonwol blong taon ya long han blong hem, mo i stap mekem wota blong maot blong hem i rondaon long mustas blong hem. 14 Nao king i talem long ol haeman ya blong hem se, "!Yufala i luk! !Man ya i krangke ya! ?From wanem yufala i tekem hem i kam long mi? 15 !Mi mi gat plante krangke man finis long ples ya! ?From wanem yufala i tekem narawan bakegen i kam long haos blong mi, blong i stap spolem mi long krangke blong hem?"