1 Nao Deved i aot long Naeot long Rama, i ronwe, i go luk fren blong hem Jonatan, i talem long hem se, "?Jonatan, wanem samting nogud we mi mi mekem? Mi no brekem wan loa. ?Wanem ya we mi mi mekem we i nogud long papa blong yu, we hem i wantem kilim mi from?"

2 Be Jonatan i talem se, "!No! !I no olsem! !Samting ya i no tru ya! !Hae God i no save letem yu yu ded! Papa blong mi i stap talem evri samting long mi. I nomata we bigfala samting no smol samting nomo, be hem i no save haedem long mi."

3 Be hem i talem se, "Papa blong yu i savegud we yu yu lavem mi tumas, mo wanem samting we hem i stap tingbaot blong mekem long mi, bambae hem i no save talemaot long yu, from we hem i save se sipos yu save tingting blong hem, bambae yu harem nogud tumas. Hae God i laef, i stap we i stap, mo long nem blong hem, mi mi talem tru long yu, se mi mi savegud we bambae i no longtaem, papa blong yu i kilim mi mi ded."

4 Nao Jonatan i talem se, "Ale, wanem samting we yu yu wantem, mi bambae mi mekem."

5 ✝Nao hem i talem se, "Tumora, bambae i Lafet* blong Niumun,* we i taem blong mi blong mi kakae wetem king. Be sipos yu ting se i oraet blong mi mi no stap, bambae mi aot, mi go stap long open ples, mi stap haed gogo kasem afta tumora long sapa. 6 Sipos papa blong yu i luk we mi mi no stap long tebol, nao i askem mi long yu, bambae yu talem long hem se mi mi askem long yu blong yu letem mi mi go kwiktaem long hom blong mi long Betlehem, from we hemia i taem blong sakrefaes ya we mifala evriwan long famle blong mi, mifala i stap mekem evri yia. 7 Sipos hem i talem se, ‘I gud nomo,’ hemia i min se bambae i oraet nomo long mi, be sipos yu luk we hem i kros, hemia nao i saen we hem i stap tingting blong spolem mi. 8 Plis yu mekem samting ya blong givhan long mi, mo yu holem promes ya we yu mekem long mi bifo, long nem blong Hae God. Be sipos mi bin mekem wan samting long papa blong yu we i no stret, i nogud yu tekem mi mi go long hem blong hem i kilim mi, i moa gud yu nomo yu kilim mi mi ded."

9 Be Jonatan i talem se, "No, yu no tingting olsem. Sipos mi luk we hem i stap tingting blong spolem yu, bambae mi mas talemaot long yu."

10 Nao hem i talem se, "?Ale, be sipos hem i kros, nao i faerap long yu, hu bambae i talemaot long mi blong mi save?"

11 Nao Jonatan i talem long hem se, "Yumitufala i go long open ples." Mo taem tufala i go, 12 hem i talem long hem se, "!Hae God i God blong yumi! !Prea blong mi we hem bambae i witnes blong yumitu! Tumora long taem olsemia, mo long nekis dei blong hem bakegen, bambae mi traem faenemaot tingting blong papa blong mi.* tumora long taem olsemia, mo long nekis dei blong hem bakegen, bambae mi traem faenemaot tingting blong papa blong mi. Sipos tingting blong hem i gud nomo long yu, bambae mi sanem tok i kam long yu. 13 Be sipos hem i stap mekem plan blong spolem yu, mi bambae mi talemaot long yu, mo bambae mi mekem rod blong yu, blong yu save ronwe, yu stap gud. Sipos mi no mekem samting ya, i gud Hae God i kilim mi mi ded. !Mo prea blong mi we Hae God bambae i stap wetem yu, olsem we fastaem, hem i stap wetem papa blong mi! 14 Nao sipos mi stap laef, plis yu no fogetem promes ya we yu yu mekem, se oltaem bambae yu stap lavem mi, olsem we oltaem Hae God i stap lavem yumi. Be sipos mi ded, 15 ✝bambae yu mas holem promes ya, nao oltaem bambae yu mas lavem ol pikinini blong mi, yu mas mekem i gud long olgeta.* 15 Bambae yu mas holem promes ya, nao oltaem bambae yu mas lavem ol pikinini blong mi, yu mas mekem i gud long olgeta. Mo sipos Hae God i kilim olgeta enemi blong yu, 16 bambae yu no mas brekem promes blong yumitufala. Sipos yu brekem promes ya, Hae God bambae i panisim yu." 17 Nao Jonatan i mekem Deved i promes bakegen blong lavem hem, mo blong mekem i gud long hem, from we Jonatan i lavem Deved tumas, mo i stap mekem i gud long hem olsem we i stap mekem i gud long hem nomo.

18 Nao hem i talem se, "Tumora i Lafet blong Niumun, mo from samting ya, sipos yu yu no stap long ples blong yu long taem blong kakae, bambae papa blong mi i save wantaem. 19 Mo afta tumora, sipos hem i luk samting ya bakegen, bambae i mas askem yu. I gud yu go long ples ya we yu haed long hem bifo, yu haed bakegen long hip ston ya, yu stap.* yu stap. 20 Nao bambae mi sut long tri ara i go long ples ya, olsem we mi stap sutum wan mak, 21 mo bambae mi sanem yang boe blong wok blong mi i go blong lukaot ol ara ya. Sipos mi singaot long hem se, ‘!Ei! !Hemia ol ara ya i stap klosap long yu saed i kam! !Yu pikimap!’, hemia i min se ol samting i oraet nomo long yu, bambae yu save kamaot. Hae God i laef, i stap we i stap, mo long nem blong hem, mi mi talem tru long yu, se trabol bambae i no save kasem yu. 22 Be sipos mi singaot long boe ya se, ‘!Ei! !Ol ara ya, hemia longwe, narasaed i go!’, hemia i min se yu mas ronwe, from we Hae God nao i stap sanem yu yu gowe. 23 Mo long saed blong promes ya we yumitufala i jes mekem naoia, Hae God bambae i stap wajem yumitufala, blong bambae yumitufala i holemtaet promes ya oltaem."

24 Nao Deved i go haed long open ples ya.

Nao long taem blong Lafet* blong Niumun,* King Sol i kam long kakae blong lafet ya, 25 i sidaon long ples blong hem we i stap sidaon long hem oltaem, long saed i go long wol, mo Jonatan i sidaon long ples blong hem, mo Abnere i sidaon long saed blong king. Be ples blong Deved i no gat man long hem. 26 Be king i no talem wan samting long dei ya, from we hem i ting se maet wan samting i kasem Deved, i mekem hem i no klin long fes blong Hae God. 27 Be long nekis dei blong lafet ya, Deved i no stap bakegen long ples blong hem, nao king i askem long Jonatan se, "?From wanem Deved i no kam long kakae ya yestedei mo tede bakegen?"

28 Be hem i talem se, "No, hem i askem long mi blong mi letem hem i go long Betlehem. Hem i talem se, 29 ‘Plis yu letem mi mi go, from we ol famle blong mi bambae oli mekem lafet blong sakrefaes long ples ya, mo brata blong mi i talem se mi mi mas go. Sipos yu yu fren blong mi, plis yu letem mi mi go luk olgeta.’ Taswe hem i no stap long ples blong hem long tebol blong yu."

30 Be king i kros long hem we i kros we i kros, nao i tok long hem, i talem se, "!Yu pikinini blong rod! !Naoia mi save we yu stap saed wetem man ya, yu stap spolem nem blong yu wetem nem blong mama blong yu! 31 !Ating yu no save! !Sipos man ya i laef i stap, bambae yu yu no save kam king blong kantri ya samtaem! !Yu go naoia! !Yu tekem hem i kam! !Hem i mas ded!"

32 Be hem i askem se, "?Hem i mas ded from wanem? ?Hem i mekem wanem?"

33 Nao taem king i harem tok ya, hem i lego spia long hem blong sperem hem i ded. Nao long taem ya, Jonatan i savegud we papa blong hem i minim tru blong kilim Deved. 34 Nao hem tu i kros tumas, i girap, i aot long tebol, mo i no kakae long dei ya, we hemia namba tu dei blong lafet ya. Hem i harem nogud tumas from fasin ya we papa blong hem i tok nogud tumas, i spolem nem blong Deved.

35 Nao long moning, Jonatan i aot, i go long open ples blong luk Deved, olsem we tufala i agri finis. Hem i tekem wan yang boe i biaen long hem, 36 nao i talem long hem se, "Yu resis, yu go pikimap ol ara ya we bambae mi sut long hem." Nao boe ya i stat resis, mo hem i sut long wan ara, nao ara ya i go bitim boe ya, i go foldaon longwe. 37 Taem boe ya i kasem ples we ara i foldaon long hem, Jonatan i singaot i go long hem se, "!Ei! !Ara ya i stap longwe, narasaed i go! 38 !Yu no stap stanap long ples ya! !Yu hareap!" Nao boe ya i go pikimap ara ya, i tekem i kambak long hem, 39 be hem i no save mining blong samting ya, Jonatan mo Deved tufala nomo i save. 40 Nao Jonatan i givim bonara blong hem long boe ya, i talem long hem blong i tekem i gobak long taon.

41 Taem boe ya i go finis, Deved i kamaot long hip ston we i stap long ples ya, i kam luk Jonatan, i nildaon, i bodaon tri taem, we fes blong hem i kasem graon. Nao tufala i kis long tufala, we tufala i stap krae tumas. Jonatan i stap harem nogud tumas, be Deved i stap harem nogud moa. 42 Nao Jonatan i talem long Deved se, "Prea blong mi we God bambae i stap wetem yu. Yumitufala i bin mekem wan promes long yumitu long nem blong hem, mo hem bambae i mekem rod blong yumitufala wetem ol pikinini blong yumitufala, mo olgeta we bambae oli kamaot biaen long yumitufala, blong yumi evriwan bambae i stap holem promes ya, gogo i no save finis." Nao tufala i seraot. Deved i aot long ples ya, mo Jonatan i kambak long taon.