1 Nao Profet Samuel i ded, mo olgeta laen* blong Isrel* oli kam wanples, oli krae from hem. Biaen, oli berem hem long ples blong hem long Rama.

Biaen long taem ya, Deved i go long draeples ya klosap long taon ya Paran, long saot. 2,3 Nao i gat wan man i stap, we i laen* blong Keleb, we nem blong hem Nabal. Hem i blong taon ya Maon, be i gat graon blong hem tu klosap long taon ya Kamel, mo hem i rij we i rij, i gat tri taosen sipsip blong hem mo wan taosen nani. Woman blong hem, nem blong hem Abigel, mo hem i naes we i naes, mo i gat hed, be man ya i wan had man, mo i man blong kros kwiktaem tu.

Nao long taem ya, man ya i stap long Kamel, i stap katem* hea blong ol sipsip blong hem blong wokem klos long hem, 4 mo Deved i stap long draeples. Mo taem Deved i harem nius blong samting ya, hem i save se bambae i gat lafet long en blong wok ya, 5 nao hem i sanem ten yang man blong hem oli go long Kamel blong luk man ya, blong talem halo long hem long nem blong hem. 6 Hem i talem se, "Yufala i go talem halo long Nabal wetem ol famle blong hem long nem blong mi. Yufala i talem long hem se, 7 ‘Deved i harem we yu stap katem hea blong ol sipsip blong yu, mo hem i wantem talemaot long yu we ol man blong lukaot long ol sipsip blong yu oli bin stap wetem mifala, mo mifala i no mekem wan samting nogud long olgeta. Oltaem, long taem ya we oli stap wetem mifala long Kamel, mifala i no stilim wan samting blong olgeta nating. 8 Sipos yu askem long olgeta, bambae oli save talem long yu. Mo naoia, mifala i kamtru long dei blong lafet ya, mo from ol samting ya, Deved i askem long yu blong yu kaen long mifala, yu tekem mifala i kam long haos blong yu. Hem i wan gudfala fren blong yu, mo mifala i olsem man blong wok nomo blong yu. Sipos yu save givim sam samting long mifala, plis yu givim.’ "

9 Nao ol yangfala ya oli go talemaot ol tok ya blong hem long Nabal, mo oli stap wet. 10 Be hem i talem se, "?Deved? ?Hu i save long pikinini blong Jese ya? !Tede, ples ya i fulap long ol slef* we oli ronwe long masta blong olgeta, oli kam! 11 ?Yufala i kam wea? !Ol kakae, mo wota, mo ol anamol ya we mi kilim blong lafet ya oli blong ol man ya we oli katem hea blong ol sipsip blong mi! !Mi mi no save givim ol samting ya long ol man we mi no save weples oli kam long hem!"

12 Nao ol yangfala ya oli aot, oli kambak long Deved, oli talemaot long hem olgeta tok ya we man ya i talem. 13 Nao hem i talem long ol man blong hem se, "!Yufala i taetem strap blong yufala! !Yufala i hangem naef blong faet blong yufala!" Nao olgeta evriwan oli go mekem olsem. Mo hem tu i taetem strap blong hem, mo i hangem naef blong faet blong hem, nao i livim tu handred man oli stap lukaot long olting blong olgeta, mo i tekem fo handred man oli go wetem hem.

14 Nao wan man blong wok blong Nabal i go talemaot long Abigel, woman blong man ya se, "Misis. ?Yu harem finis? Deved i sanem sam man blong hem oli aot long draeples, oli kam talem halo blong hem long Masta, be hem i sakem ol rabis tok i go long olgeta. 15 Be olgeta ya oli kaen tumas long mifala. Neva oli spolem mifala. Long taem ya we mifala i stap wetem olgeta long open ples, neva oli stilim wan samting blong mifala. 16 Long taem ya we mifala i stap wetem olgeta, we mifala i stap lukaot long ol sipsip blong yumi, be long dei mo long naet, olgeta ya oli stap lukaot gud long mifala. 17 Plis yu tingting gud long samting ya, nao yu tingbaot wanem samting we bambae yu mas mekem. Samting ya i save pulum bigfala trabol i kam long masta wetem yumi evriwan long ples ya. Yu save, hem i stronghed tumas, hem i no save harem narafala man."

18 Nao woman ya i hareap, i tekem tu handred bred,* mo tu botel waen we botel ya oli wokem long skin blong nani,* mo faef sipsip wetem twanti kilo bale* we oli rusum finis, mo wan handred bandel grep* wetem tu handred pasel frut blong figtri* we oli sandrae, mo i putum olgeta samting ya long ol dongki blong hem, 19 nao i talem long ol man blong wok blong hem se, "!Ale, yumi go! Yufala i go fastaem, mi biaen." Nao oli go, be hem i no talemaot samting ya long man blong hem.

20 Taem hem i stap pasraon long saed blong hil, hem i sek long Deved wetem ol man blong hem we oli stap kam. 21 Be Deved i bin talem finis se, "?From wanem mi mi lukaot gud long olting blong man ya long draeples? !I no gat wan samting nating blong hem we mi mi stilim! !Mi mi givhan gud long hem! !Be hemia nao fasin we hem i mekem long mi! 22 !Hemia tok blong mi! !Tede bambae mi kilim olgeta man ya evriwan oli ded, ol woman nomo bambae oli stap! !Sipos i brok delaet tumora we i gat wan long olgeta i stap yet, i gud Hae God i kilim mi mi ded!"* Be plante man oli ting se long fasin blong tok blong olgeta bifo, i tabu blong man i yusum nem blong hem long strong tok olsem, nao tok ya se ol enemi blong Deved, hem i blong haedem nem blong Deved nomo.

23,24 Taem woman ya i luk Deved, hem i jamdaon kwiktaem long dongki blong hem, nao i go nildaon long leg blong Deved, mo i bodaon we fes blong hem i go kasem graon, nao i talem se, "!Masta, plis yu harem mi! !Plis yu putum olgeta trabol ya i kam long mi! Sipos yu wantem, yu save kilim mi mi ded. 25 Plis yu no moa tingbaot man blong mi. Man ya i no save mekem wan gudfala samting. !Nem blong hem i min se "Hafmad", mo fasin blong hem i stret gud long nem ya! Masta, long taem ya we ol man blong wok blong yu oli kamtru, mi mi no stap. 26 Be Hae God nomo i stap blokem yu blong yu no kilim enemi ya blong yu i ded blong givimbak ol samting nogud ya we hem i mekem long yu. Hae God i laef, i stap we i stap, mo long fes blong hem, mi mi talem tru long yu, se ol enemi blong yu wetem olgeta we oli wantem spolem yu, hem bambae i panisim olgeta, stret olsem we hem bambae i panisim man blong mi. 27 Plis yu tekem presen ya we mi karem i kam, yu givim long ol man blong yu. 28 Mo plis yu fogivim mi from ol rabis fasin ya we mi mi mekem long yu. Hae God bambae i putumap yu yu kam king, mo bambae i mekem we oltaem wan long olgeta we bambae oli stap kamaot biaen long yu bambae i king, from we yu yu stap mekem ol faet olsem we hem i talem. Mo oltaem long laef blong yu, hem bambae i stap blokem yu blong yu no mekem wan samting nogud. 29 Sipos man i kam mekem faet long yu, i traem blong kilim yu, bambae yu no save kasem trabol. Hae God ya i God blong yu, mo hem bambae i stap lukaot gud long yu, olsem man we i stap lukaot gud long ol gudfala samting blong hem. Be ol enemi ya blong yu, hem bambae i sakem olgeta oli go lus, olsem we man i slingim ston long sling blong hem. 30 Hem bambae i mekem ol gudgudfala samting ya long yu, olsem we hem i promes, mo bambae hem i putumap yu yu kam king blong Isrel.* 31 Mo sipos yu bin kilim man we i stap mekem i stret nomo, no yu bin givimbak samting nogud we man i mekem long yu, long taem ya bambae yu mas sore, mo bambae yu mas harem nogud. Be sipos yu no mekem olsem gogo kasem taem ya, bambae yu save harem gud. Masta, long taem ya we hem bambae i stap givim ol gudgudfala samting ya long yu, plis yu tingbaot mi."

32 Nao Deved i talem long hem se, "!Mi mi presem Hae God! Hem i laef, i stap we i stap, mo hem i God blong yumi.* Hem nao i sanem yu blong yu kam mitim mi tede. 33 Mi talem tangkiu long hem from gudfala tingting ya blong yu, mo from samting ya we yu mekem naoia, we yu blokem mi, blong mi no go kilim man ya i ded, mo mi no go mi wan, blong givimbak ol samting nogud tu we hem i mekem long mi. 34 Hae God nomo i blokem mi blong mi no spolem yu. Mo long fes blong hem, mi talem tru long yu, se sipos yu yu no bin hareap blong kam mitim mi, tumora bambae i no kasem moning yet, be ol man blong wok blong man ya blong yu bambae oli ded evriwan, ol woman nomo bambae oli stap." 35 Nao Deved i tekem ol samting ya we woman ya i givim long hem, mo i talem long hem se, "Yu gohom, yu no wari. Bambae mi mekem olsem we yu yu wantem."

36 Nao woman ya i gobak long ples blong hem, mo taem hem i kamtru, man blong hem i stap long haos, i stap mekem lafet yet, we lafet ya i stret olsem wan lafet blong king. Hem i drong, we i harem gud tumas, mo from samting ya, woman ya i no talem wan samting long hem long naet ya. 37 Be long moning, taem drong blong hem i finis, woman ya i talemaot olgeta samting ya long hem. Hem i sek bigwan long samting ya, nao wan strong sik i kasem hem, we bodi blong hem i hafded from. 38 Hem i stap olsem go kasem ten dei, nao Hae God i kilim hem i ded.

39 Taem Deved i harem we man ya i ded, hem i talem se, "!Mi mi presem Hae God! !Mi mi man blong wok blong hem! Hem i blokem mi blong mi no mekem fasin we i nogud. Hem nomo i givimbak samting ya we man ya i mekem long mi. Hem nao i panisim man ya from rabis fasin ya blong hem."

Nao Deved i sanem tok i go long Abigel blong tufala i mared. 40 Ol man blong hem oli go long Kamel, oli talem long woman ya se, "Deved i sanem mifala i kam blong tekem yu yu go, blong yu mared long hem."

41 Nao hem i nildaon, mo i bodaon we fes blong hem i go kasem graon, nao i talem se, "I gud nomo. Mi mi olsem woman blong wok blong hem nomo. Mi mi rere blong wasem* leg blong ol man blong wok blong hem." 42 Nao kwiktaem nomo hem i girap, i tekem faef woman blong wok blong hem, mo i klaem long dongki blong hem, nao oli go wetem ol man ya. Nao hem i mared long Deved.

43 Deved i mared finis long Ahinoam we i woman Jisrehel, mo long taem ya, hem i mared bakegen long Abigel. 44 ✝Be fas woman ya blong hem Mikal, we i dota blong King Sol, king i givim finis long Palti we papa blong hem Laes, we i man Galim.