1 Nao King Sol i talemaot long pikinini ya blong hem Jonatan wetem ol haeman blong hem, se hem i stap mekem plan blong kilim Deved i ded. Be Jonatan i lavem Deved tumas, 2 nao i go talemaot long hem se, "Naoia, papa blong mi i stap traem blong kilim yu yu ded. Plis, tumora long moning, yu go long open ples, yu faenem wan gud ples blong haed, nao yu haed long hem. !Be yu mas lukaot gud, a! 3 Bambae mi wetem papa blong mi, mitufala i kam long ples ya, klosap long ples we yu bambae yu stap haed long hem, nao long ples ya bambae mitufala i tokbaot yu, mo ol samting we hem i talem, bambae mi jes talemaot long yu biaen."

4 Nao long nekis dei, Jonatan i stap tok blong leftemap Deved long fes blong papa blong hem. Hem i talem se, "Papa, i nogud yu mekem wan samting nogud long man ya. Hem i man blong wok blong yu, mo neva hem i mekem wan samting we i nogud long yu. Ol samting we hem i bin mekem oli givhan tumas long yu. 5 Long taem ya we hem i kilim Golaeat, hem i rere blong letem laef blong hem, mo long taem ya, Hae God i mekem yumi win bigwan. Mo taem yu yu luk samting ya, yu tu yu glad from. Hem i no mekem wan samting nating we i rong. ?From wanem yu wantem mekem i nogud long hem? Yu yu no gat wan gudfala poen nating blong yu kilim hem from."

6 Nao ol tok ya blong hem i tanem tingting blong papa blong hem, nao papa blong hem i mekem wan strong promes long nem blong Hae God, se bambae hem i no kilim Deved. 7 Nao Jonatan i singaot Deved i kam, i talemaot ol tok ya long hem, mo i tekem hem i kambak long king, blong i wok blong hem bakegen olsem fastaem.

8 Nao ol man Filistia oli kamaot blong mekem faet bakegen, mo Deved i go faet long olgeta. Hem i winim olgeta we i meksavegud olgeta, nao oli ronronwe.

9 Nao wan dei, rabis devel ya we Hae God i bin sanem i kam long King Sol, hem i kam bigwan long hem bakegen. Nao king i stap sidaon insaed long haos blong hem, i stap holem spia blong hem, mo Deved tu i stap, i stap plei long gita blong hem. 10 Nao king i lego spia long Deved, i traem sperem hem i go pas long wol, be hem i mufwe, mo spia i go planem long wol, nao hem i girap, i ronwe.

11 ✝Nao long sem naet ya, king i sanem sam man i go blong gad long haos blong Deved, blong bambae oli kilim hem long moning. Be Mikal, woman blong Deved i talem long hem se, "Sipos yu no aot long ples ya long naet ya nomo, tumora, bambae yu yu ded." 12 Nao woman ya i givhan long hem blong i gotru long windo, mo i slakem hem i godaon long graon, nao hem i ronwe. 13 Nao woman ya i tekem wan aedol blong hem we oli katem long wud, i putum long bed, mo i tekem wan pilo we oli wokem long hea blong nani, i putum aedol ya i pilo long hem, nao i kavremap hem. 14 Nao taem ol man blong king oli kam blong holem Deved, woman ya i talem long olgeta se hem i sik, nao oli gobak.

15 Be king i sanem olgeta i gobak bakegen blong tekem hem, mo i talem se, "Yufala i go karem hem i kam wetem bed blong hem, blong mi kilim hem i ded." 16 Be taem oli go, oli luk aedol ya nomo i stap, i pilo long pilo ya, i stap slip long bed. 17 Nao taem king i harem nius blong samting ya, hem i tok long woman ya, i talem se, "?From wanem yu giaman long mi olsem? !Yu yu letem enemi blong mi ronwe!"

Be woman ya i talem se, "No, be hem i talem se sipos mi no givhan long hem blong i ronwe, bambae hem i kilim mi mi ded."

18 Nao taem Deved i ronwe, i go luk Profet Samuel long taon ya Rama, mo i talemaot long hem ol samting ya we King Sol i mekem long hem. Nao hem wetem profet ya, tufala i go long Naeot we i klosap long taon ya, mo tufala i stap long ples ya. 19 Nao sam man oli talemaot long king we hem i stap long ples ya, 20 mo king i sanem sam man blong hem oli go blong holem hem. Taem ol man ya oli gotru, oli luk we ol profet wetem Profet Samuel we i lida blong olgeta oli stap danis, mo oli stap talemaot ol tok we God i givim long olgeta, from we Spirit blong God i kam long olgeta, i holem olgeta. Nao Spirit ya i kam long ol man ya blong king tu, i holem olgeta, mo oli girap, oli go joen long olgeta, oli stap mekem sem samting.* blong God i kam long olgeta, i holem olgeta. Nao paoa ya i kam long ol man ya blong Sol tu, i holem olgeta, mo oli girap, oli go joen long olgeta, oli stap mekem sem samting. 21 Nao taem king i harem samting ya, hem i sanem sam man bakegen oli go. Be taem olgeta ya oli gotru, olgeta tu oli joen wetem olgeta, oli stap danis mo oli stap talemaot ol tok we God i givim long olgeta. Nao king i sanem sam man bakegen oli go we i mekem tri taem blong hem, be sem samting ya bakegen i kasem olgeta. 22 Ale, hem nomo i girap, i go long ples ya. Mo taem hem i kam kasem bigfala wel ya long Seku, hem i askem long ol man se, "?Profet Samuel mo Deved, tufala i stap wea?"

Mo oli talem long hem se, "Tufala i stap long Naeot."

23 Be taem hem i stap wokbaot blong go long ples ya, Spirit blong God i kam long hem, i holem hem, nao hem tu i stap danis, mo i stap talemaot ol tok we God i givim long hem, olwe gogo kasem Naeot.* blong God i kam long hem, i holem hem, nao hem tu i stap danis, mo i stap talemaot ol tok we God i givim long hem olwe gogo kasem Naeot. 24 ✝Nao long fes blong profet ya, hem i tekemaot ol klos blong hem, kalsong nomo i stap, nao i stap danis mo i stap talemaot tok we God i givim long hem, nao i foldaon, mo i stap ledaon wetem kalsong nomo go kasem tudak, mo i stap gogo kasem delaet bakegen. From samting ya nao, oli stap talem tok ya se, "?Olsem wanem? ?King tu i kam profet finis, no?"