1 Nao hem i tekem wan smol botel olifoel,* i kafsaedem i go long hed blong Sol, mo i kis long hem, nao i talem se, "Yumi ol laen* blong Isrel,* mo yumi ol man blong Hae God. Mo long oel ya, hem i makemaot yu se yu bambae yu kam king blong ol man blong hem. Bambae yu yu rul long mifala, mo yu lukaot long mifala, yu blokem ol enemi blong yumi. Mo saen blong soemaot we hem i jusumaot yu blong yu kam king blong mifala bambae i olsem.* yumi ol man blong Hae God, mo long oel ya, hem i makemaot yu se yu bambae yu kam king blong ol man blong hem. 2 Taem yu aot long ples ya tede, bambae yu go long distrik ya Benjamin,* mo bambae yu faenem tu man long Jeljaha klosap long beregraon blong Rejel ya bifo. Tufala ya bambae i talem long yu we oli faenem finis ol dongki ya we yu yu stap lukaot, mo we naoia, papa blong yu i no moa tingbaot ol dongki ya, be hem i stap wari long yu, mo i stap talem se, ‘?Bambae mi mekem olsem wanem blong faenem pikinini blong mi?’ 3 Mo taem yu aot long ples ya, nao yu go kasem tabu tri ya long Taboro, bambae yu luk wan narafala saen bakegen. Bambae yu luk tri man i stap kam blong go mekem sakrefaes long God long Betel. Wan long trifala ya bambae i stap holem rop blong tri smol nani, i stap lidim trifala i kam, mo narawan i stap karem tri bred,* mo narawan i stap karem wan botel we oli wokem long skin blong nani,* we i fulap long waen. 4 Bambae trifala i talem halo long yu, mo wan long trifala bambae i wantem givim tu bred long yu. Mo yu mas tekem bred ya. 5 Mo biaen, bambae yu go kasem Hil blong God long Gibea, long ples ya we ol soldia blong ol man Filistia oli stap long hem. Taem yu kam klosap long taon, bambae yu faenem wan grup blong ol profet we oli aot long ples blong wosip antap long hil, oli stap kamdaon. Olgeta ya bambae oli stap kilim gita, mo mandolin, mo tamtam, mo oli stap blu long bambu, mo oli stap danis, mo oli stap talemaot tok we God i givim. 6 Mo wantaem nomo, bambae Spirit blong Hae God i kam long yu, i holem yu, mo bambae yu tu, yu go joen wetem olgeta blong danis mo blong talemaot ol tok we God i givim long yu, nao bambae yu kam narafala man olgeta.* blong Hae God i kam long yu, i holem yu, mo bambae yu tu, yu go joen wetem olgeta blong danis mo blong talemaot ol tok we God i givim long yu, nao bambae yu kam narafala man olgeta. 7 Taem we ol samting ya oli kasem yu, bambae yu save mekem wanem samting we God i lidim yu blong mekem. 8 Biaen, bambae yu mas go wet long mi long Gilgal, go kasem seven dei, nao bambae mi kam luk yu long ples ya blong mekem sakrefaes. Bambae mi kilim ol anamol, nao sam long olgeta bambae mi bonem i bon evriwan blong mekem wosip long Hae God, mo sam long olgeta, bambae mi bonem haf, yumi kakae haf blong soemaot we yumi stap fren gud wetem hem. Mo long taem ya, bambae mi talemaot long yu ol samting we yu bambae yu mas mekem."

9 Nao taem tufala i seraot, God i mekem laef blong Sol i kam niuwan olgeta. Mo evri samting we Profet Samuel i bin talemaot long hem oli kasem hem long dei ya. 10 Taem hem wetem man ya blong hem, tufala i kasem Gibea, wan grup blong ol profet i kam mitim hem, nao wantaem nomo, Spirit blong God i kam long hem i holem hem, mo hem i go joen wetem olgeta, i stap danis, mo i stap talemaot ol tok we God i givim long hem.* blong God i kam long hem i holem hem, mo hem i go joen wetem olgeta, i stap danis, mo i stap talemaot ol tok we God i givim long hem. 11 Be taem olgeta we oli save hem oli luk ol samting ya we hem i stap mekem, oli stap asaskem long olgeta bakegen se, "!Ei! !Pikinini blong Kis ya! ?Wanem i kasem hem? ?Hem tu i kam profet finis, no?"

12 ✝Nao wan man we i stap long ples ya i talem se, "?Ol narafala profet ya oli kamaot wea? ?Hu i papa blong olgeta?" Mo i stat long taem ya oli stap talem se, "?Sol tu i kam profet finis, no?" 13 Mo taem Sol i no moa danis mo i no moa talemaot ol tok ya, hem i go long ples blong wosip antap long hil.

14 Nao wan papa blong hem i luk hem wetem man ya blong hem, mo i askem long tufala se, "?Ei, yutufala i kam wea?"

Mo Sol i talem se, "Mitufala i bin go lukaot ol dongki ya we oli lus, be taem mitufala i no faenem olgeta, mitufala i go luk Profet Samuel."

15 Nao papa ya blong hem i askem se, "?Be profet ya i talem wanem long yutufala?"

16 Mo hem i talem se, "Hem i talem long mitufala se oli faenem ol dongki ya finis." Be hem i no talemaot long hem, we profet ya i talem se bambae hem i kam king.

17 Nao Profet Samuel i singaot olgeta man oli kam wanples long Mispa blong oli harem tok blong Hae God. 18 Nao hem i talem long olgeta se, "Yumi ol laen* blong Isrel,* mo Hae God i God i blong yumi. Hem i talem se, ‘Taem ol olfala bubu blong yufala bifo oli stap long Ijip, mi mi sevem olgeta. Mi mi tekemaot olgeta long han blong ol man Ijip, mo long han blong ol narafala man we oli stap mekem olgeta oli harem nogud. 19 Mi mi God blong yufala ya we i kamaot biaen long olgeta, mo mi stap tekemaot yufala long ol trabol mo hadtaem we yufala i kasem. Be tede, yufala i no moa wantem blong mi mi rul long yufala, yufala i wantem blong mi jusumaot wan narafala man blong i kam king blong yufala. Oraet, yufala i seraot long ol laen blong yufala, nao yufala i kam pas long fes blong mi, blong mi jusumaot king blong yufala.’ "

20 Nao profet ya i mekem ol lida blong ol twelef laen ya oli kam pas long fes blong God, mo hem i sakem ol spesel ston,* mo nem blong laen blong Benjamin* i kamaot. 21 Nao hem i mekem ol lida blong ol famle long laen ya oli kam pas, mo nem blong famle blong Matri i kamaot. Nao ol man blong famle ya oli kam pas, mo nem blong Sol, we papa blong hem Kis, hem i kamaot.* nem blong Sol, we papa blong hem Kis, hem i kamaot. Be taem oli stap lukaot hem, oli no save faenem hem. 22 Nao oli prea, oli askem long Hae God se, "?Olsem wanem? ?Bambae i gat wan narafala man moa i kam?"

Nao Hae God i talem long olgeta se, "Sol i stap haed longwe, long medel blong olting blong yufala."

23 Nao oli resis i go, oli tekem hem i kam stanap long fes blong olgeta, mo oli luk we hem i longfala moa, i bitim olgeta evriwan. Hed blong olgeta i finis long solda blong hem nomo. 24 Nao profet i talem se, "!Hemia nao, man ya we Hae God i jusumaot! I no gat wan man long yumi we i olsem hem."

Nao olgeta man oli singaot bigwan se, "!Hurei! !Yu yu king blong mifala! !I gud yu stap longtaem!"

25 Nao profet i talemaot ol wok blong king wetem ol samting we hem i gat raet blong mekem. Mo hem i raetemdaon ol samting ya long buk,* we biaen i putumgud long ples blong mekem wosip long Hae God. Nao hem i sanem olgeta evriwan oli gobak long ol ples blong olgeta. 26 Mo King Sol tu i gohom bakegen long Gibea, mo samfala strong man blong faet we God i bin tok long tingting blong olgeta oli go wetem hem. 27 Be sam man we oli stap mekem hed oli talem se, "!Man ya i no naf nating! ?Olsem wanem bambae hem i sevem yumi?" Nao oli no givim presen long hem, from we oli no wantem hem. Be King Sol i no tok, hem i stap kwaet nomo.