1 UJobe wasephendula wathi:

2 "Sengezwa izinto ezinengi ezifana lalezi;

lingabaduduzi ababi lina lonke!

3 Zizaphela nini inkulumo zokubhuda kwenu lokhu?

Kuyini okulihluphayo laphikelela nje lidaza inkani?

4 Lami bengingakhuluma njengani

aluba yini elisesikhundleni sami;

ngabe ngikhupha inkulumo ezimnandi ngilisola

ngize nginikine ikhanda lami.

5 Kodwa umlomo wami ngabe uyaliqinisa;

induduzo yezindebe zami idedise inhlungu zenu.

6 Kodwa nxa ngikhuluma, ubuhlungu obukimi kabudedi;

loba ngingaze ngithule, kabupheli.

7 Ngeqiniso, Nkulunkulu, usungiqede amandla;

usuyitshabalalisile yonke imuli yami.

8 Usungibophile sekuyibo ubufakazi balokho;

lokucikizeka kwami kuyakhula kungilahla.

9 UNkulunkulu uyanginxwanela angidlikize ngolaka lwakhe,

angigedlele amazinyo;

isitha sami singinyonkoloze ngamehlo ahlabayo.

10 Abantu bavula imilomo yabo bengihoza;

bangimakala esihlathini bengihlambaza

babambane bangihlanganyele.

11 UNkulunkulu usenginikele ebantwini ababi

wangiphosela ezandleni zezigangi.

12 Konke kwakukuhle kimi, kodwa wangibhidliza;

wangixhakalaza ngentamo wangichoboza.

Usengenze ngaba yinto yakhe yokunenjwa;

13 abacibi bemtshoko bakhe bangihanqile.

Ungiciba izinso zami engelazwelo

achithele inyongo yami phansi.

14 Ungisukela njalonjalo;

angidumele njengebutho.

15 Sengithungele isembatho sesaka emzimbeni wami

ngathukuza ibunzi lami othulini.

16 Ubuso bami sebubomvu ngokukhala,

amathunzi anzima ahonqolozela amehlo ami;

17 kodwa izandla zami kaziluqhelanga udlakela,

lomkhuleko wami uhlanzekile.

18 Awu mhlaba, ungaligqibeli igazi lami;

sengathi lokukhala kwami kungaze kwacitshwa lanini!

19 Lakhathesi ufakazi wami usezulwini;

umeli wami uphezulu khonale.

20 Umeli wami ngumngane wami

nxa amehlo ami empompoza inyembezi kuNkulunkulu;

21 uyamncengela umuntu kuNkulunkulu

njengomuntu encengela umngane wakhe.

22 Kusasele iminyakana engemingaki

andubana ngiye lapho kungabuywa khona."