1 Wasephendula uZofari umNahama wathi:

2 "Imicabango yami ekhathazekileyo ingifuqa ukuthi ngiphendule

ngoba sengikhubekile kakhulu.

3 Ngizwa kulokukhuzwa okungilulazisayo

njalo ukuzwisisa kwami kungifuqela ukuthi ngiphendule.

4 Ngempela uyakwazi ukuthi kwakuvele kunjani lendulo,

kusukela ukubekwa komuntu emhlabeni,

5 ukuthi injabulo yomubi imfitshane,

intokozo yongakholwayo ngeyomzuzwana nje.

6 Loba ukuzigqaja kwakhe kufika emazulwini

lekhanda lakhe lithinta emayezini,

7 uzabhubha okwaphakade, njengobulongwe bakhe;

labo abake bambona bazakuthi, ‘Ungaphi kanti?’

8 Njengephupho uyanyamalala angabe esabonwa njalo,

axotshwe njengombono webusuku.

9 Ilihlo elake lambona kalisayikumbona njalo;

indawo yakhe ingeke ibe isambona.

10 Abantwabakhe bazazincengela ebayangeni

ngezandla zakhe abuyisele inotho yakhe.

11 Amadlabuzane obutsha alawo emathanjeni akhe

azalala kanye laye othulini.

12 Loba ububi bumnandi emlonyeni wakhe,

ebufihla ngaphansi kolimi lwakhe,

13 loba esehluleka ukutshiyana labo

abugcine emlonyeni wakhe,

14 kodwa ukudla kwakhe kuzahloba esiswini sakhe;

kuzaphenduka kube yibuhlungu bezinyoka ngaphakathi kwakhe.

15 Uzayihlanza yonke inotho ayiginyayo;

uNkulunkulu uzakwenza isisu sakhe sikuhlanze konke.

16 Uzamunya ubuhlungu bezinyoka;

amazinyo ebululu azambulala.

17 Akayikuyikholisa imifula,

leyomifula egeleza uluju lolaza.

18 Lokho akuginqeleyo kumele akubuyise engakudlanga;

akayikuyikholisa inzuzo yokuthengiselana kwakhe.

19 Ngoba ubebancindezela abayanga basala bengelalutho;

wathumba izindlu angazakhanga.

20 Ngempela akayikudeda kulobubuhwaba bakhe;

ngeke azisindise ngenotho yakhe.

21 Akusela lutho angabe esaludla;

ukuphumelela kwakhe kakuyikuma.

22 Phakathi kwenotho yakhe uzahlaselwa zinhlupho;

ubuhlungu buzamehlela ngamandla.

23 Nxa esesigcwalisile isisu sakhe,

uNkulunkulu uzabhodlisela ulaka lwakhe oluvuthayo kuye

akhwele ehle ngezidutshulo phezu kwakhe.

24 Lanxa angaze abalekele isikhali sensimbi

umtshoko wethusi uzamciba.

25 Uyawuhwatsha emhlane wakhe,

umcijo wawo ocazimulayo awuhwatshe esibindini.

Uzangenwa yikwesaba okukhulu;

26 umnyama omkhulu uyilindele inotho yakhe.

Umlilo ongungumayo uzamqeda

utshise lokho okuseleyo ethenteni lakhe.

27 Amazulu azabembula ububi bakhe;

umhlaba uzamvukela.

28 Isikhukhula sizayithwala indlu yakhe,

kungamanzi azimpophoma mhla wosuku lolaka lukaNkulunkulu.

29 Sinjalo isiphetho uNkulunkulu asimisele ababi,

ilifa abalikhethelwe nguNkulunkulu."