1 Lungcono uqweqwe lwesinkwa umuntu elokuthula

kulendlu egcwele amagqibhagqibha okudla

kodwa kulengxabano.

2 Isisebenzi esihlakaniphileyo sizabusa indodana eyangisayo,

sizakwabelwa ilifa njengomunye wamadodana.

3 Isiliva sincibilikiselwa embizeni,

imvutho ngeyegolide

kodwa uThixo uhlola inhliziyo.

4 Umuntu oxhwalileyo uyazilalela izindebe ezimbi;

lomqambimanga uyalulalela ulimi olulomona.

5 Lowo ohleka umyanga weyisa uMenzi wakhe;

oklolodayo nxa konakele kayikuphepha isijeziso.

6 Abazukulu bangumqhele wabalupheleyo,

njalo labantwana baziqhenya ngabazali babo.

7 Izindebe zokutshinga azisifanelanga isiwula

zimbi kangakanani ke izindebe zamanga kumbusi!

8 Isivalamlomo siyintelezi kulowo osinikayo;

uyaphumelela kukho konke.

9 Ofihla ukona komunye uqinisa uthando,

kodwa okhuluma ngakho kokuphela

wehlukanisa abangane abasekhwapheni.

10 Ukukhuza kuyamqondisa umuntu olengqondo

kulokutshaya isiwula imvimvinya ezilikhulu.

11 Umuntu omubi udinga ukuhlamuka kuphela;

uzathunyelwa inxusa elilesihluku.

12 Kungcono ukuqondana lebhele

elithathelwe imidlwane yalo

kulokuhlangana lesiwula ebuthutheni baso.

13 Nxa umuntu ephindisela okuhle ngobubi,

ububi kabusoze basuka endlini yakhe.

14 Ukusungula inkani kunjengokubhidliza umduli wedamu;

ngakho yekela indaba ingakadaleki inkani.

15 Ukukhulula olecala lokugweba omsulwa

uThixo uyakuzonda kokubili.

16 Isizani imali esandleni sesiwula,

sivele singatshisekeli ukuzuza ukuhlakanipha?

17 Umngane ulothando ngezikhathi zonke,

lomzalwane uzalelwa izikhathi zenhlupheko.

18 Umuntu ongananzeleliyo uyaziwisela anike isibambiso

enceda umakhelwane wakhe.

19 Lowo othanda inkani uthanda isono;

lowo owakha isango eliphakemeyo udinga ukubhidlizwa.

20 Umuntu olenhliziyo exhwalileyo kaphumeleli;

lowo olimi lwakhe luyakhohlisa uwela ekuhluphekeni.

21 Ukuba lendodana eyisiwula kuthelela usizi;

akulakuthokoza kuyise wesiwula.

22 Inhliziyo ethokozayo ingumuthi omuhle,

kodwa umoya owephukileyo womisa amathambo.

23 Umuntu omubi wamukela isivalamlomo ensitha

ukuze ahlanekele indlela yokwahlulela.

24 Umuntu ohluzisisayo izinto ukhokhelwa yikuhlakanipha,

kodwa amehlo esiwula asabalala afike ekucineni komhlaba.

25 Indodana eyisiwula ithelela uyise

usizi lokudabuka kulowo owayizalayo.

26 Kakukuhle ukujezisa umuntu ongelacala,

loba ukufaka uswazi izisebenzi ngenxa yobuqotho bazo.

27 Umuntu ololwazi ubeka amazwi akhe ngokunanzelela,

njalo umuntu oqedisisayo kathukutheli ngokuphangisa.

28 Lesiwula kuthiwa sihlakaniphile nxa sithule,

kuthiwe siyaqedisisa nxa sibamba ulimi lwaso.