1 Lezi ngezinye njalo izaga zikaSolomoni, ezabhalwa yizinceku zikaHezekhiya inkosi yakoJuda:

2 Kuyinkazimulo kaNkulunkulu ukufihla indaba;

ukuchwayisisa indaba ludumo lwababusi.

3 Njengalokhu izulu liphakeme lomhlaba ujulile,

kanjalo imicabango yamakhosi kayifinyelelwa.

4 Susa amakhafutha ahlangene lesiliva

umkhandi athole ukulungisa isitsha sihle;

5 susa abantu ababi phambi kwenkosi,

isihlalo sayo sizaqiniswa ngokulunga.

6 Ungaziphakamisi phambi kwenkosi,

ungaziphendleli indawo phakathi kwezikhulu;

7 kuba ngcono ukuthi yona ithi, "Woza uhlale ngapha,"

kulokuthi yona ikwehlise phambi kwezikhulu.

Lokho okubonileyo ngawakho amehlo

8 ungaphangisi ukukubika emthethwandaba,

ngoba uzathini nxa umakhelwane wakho esekuyangisa?

9 Nxa ungaya edale lomakhelwane wakho

ungahambi usuhlabela imfihlo yenu,

10 funa lowo okuzwayo akuyangise

uhlale usungumuntu olebizo elibi.

11 Ilizwi elikhulunywe ngesikhathi esifaneleyo

linjengama-aphula egolide

ananyekwe emcepheni wesiliva.

12 Njengecici legolide kumbe umceciso wegolide elicengiweyo

kunjalo ukukhuza komuntu ohlakaniphileyo, kolalelayo.

13 Njengokuqanda kongqwaqwane ngesikhathi sokuvuna

sinjalo isithunywa esithembekileyo kwabasithumileyo;

sivuselela imiphefumulo yabaphathi baso.

14 Njengamayezi lomoya okungalethi izulu

unjalo umuntu ozikhukhumeza ngamandla angelawo.

15 Ngokubekezela inkosi ingancengwa ize ivume,

lolimi oluthambileyo lungalephula ithambo.

16 Nxa uthole inyosi, dlana okwaneleyo

ungedlulisi amalawulo, uzazihlanza.

17 Ungabi ngunsukuzonke endlini kamakhelwane wakho

uzacina usumdaka abesekuzonda.

18 Unjengesagila loba inkemba kumbe umtshoko obukhali

umuntu ofakaza amanga ngomakhelwane wakhe.

19 Njengezinyo elibuhlungu loba unyawo olwenyeleyo

kunjalo ukweyama emuntwini ongathembekanga

ngesikhathi sokuhlupheka.

20 Njengomuntu okhumula ibhatshi mhla kumakhaza,

loba njengokuthela iviniga phakathi kwesoda

unjalo ohlabelela izingoma emuntwini odabukileyo.

21 Nxa isitha sakho silambile siphe ukudla sidle;

nxa somile siphe amanzi sinathe.

22 Ngokwenza lokho, umokhela amalahle avuthayo ekhanda,

njalo uThixo uzakubusisa.

23 Njengomoya wasenyakatho uletha izulu,

lunjalo ulimi olulobuqili luvusa ulaka.

24 Kungcono ukuhlala ekhulusini lophahla lwendlu

kulokuhlala ndlu yinye lomfazi olomlomo.

25 Njengamanzi aqandayo emuntwini okhatheleyo,

zinjalo izindaba ezimnandi ezivela elizweni elikude.

26 Njengesiziba esidungekileyo loba umthombo ongcolileyo

unjalo umuntu olungileyo odedela umuntu omubi.

27 Kakukuhle ukudla inyosi wedlulise,

njalo kakulasithunzi ukuzidingela ukudunyiswa.

28 Njengedolobho eselidilikelwe ngumthangala walo

unjalo umuntu ongazithintiyo.